தற்போதைய செய்திகள்

பெண்களை பற்றி இழிவாக யார் பேசினாலும் கண்டிப்போம் – கழக செய்தி தொடர்பாளர் கோகுல இந்திரா

சென்னை

பெண்களை பற்றி யார் இழிவாக பேசினாலும் அரசியலுக்கு அப்பாற்பட்டு கண்டிக்கப்பட வேண்டிய ஒன்று. ஆனால் தொடர்ந்து திமுக தலைவர், உதயநிதி ஆகியோர் பெண்களை இழிவாக பேசி வருகின்றனர். மரியாதை நிமித்தமாக காலில் விழுவதை பற்றி விமர்சிப்பது ஏற்றுக்கொள்ள முடியாது என்று கழக செய்தி தொடர்பாளர் கோகுல இந்திரா கண்டனம் தெரிவித்தார்.

சென்னை அண்ணா நகர் எம்.எம்.டி.ஏ காலனியில் முதலமைச்சர் எடப்பாடி கே. பழனிசாமியை இழிவாக பேசி வரும் திமுக தலைவர் ஸ்டாலின், கனிமொழி, உதயநிதி ஆகியோரை கண்டித்து அதிமுக சார்பில் கண்டன ஆர்ப்பாட்டம் நடைபெற்றது. முன்னாள் அமைச்சரும், கழக செய்தி தொடர்பாளருமான கோகுல இந்திரா தலைமையில் ஆர்ப்பாட்டம் நடைபெற்றது.

இந்த ஆர்ப்பாட்டத்தின் போது திமுக தலைவர் ஸ்டாலின், உதயநிதி, கனிமொழிக்கு எதிராக கோசங்கள் எழுப்பப்பட்டது. இதனை தொடர்ந்து செய்தி தொடர்பாளர் கோகுல இந்திரா செய்தியாளர்களை சந்தித்த பொழுது, தமிழக முதலமைச்சர் என்றும் பாராமல் ஒருமையில் பேசிவருவது கண்டிக்கத்தக்கது. கனிமொழி மற்றும் ஆ.ராசா மீது 2 ஜி வழக்குகள் உச்சநீதிமன்றத்தில் நிலுவையில் உள்ளது.

இதனால் அவர்களும் குற்றவாளிகளாக தான் உள்ளனர். முதலமைச்சரை பற்றி விமர்சிக்க திமுகவினருக்கு தகுதியில்லை. திமுக ஆட்சியில் பெண்களுக்கு பாதுகாப்பு இல்லை. தொடர்ந்து திமுக நடத்தும் கிராம சபை கூட்டங்களில் திமுக தலைவர் பெண்கள் முன்பு அநாகரீகமாக நடந்து வருகிறார். பொதுமக்கள் கேட்கும் கேள்விகளுக்கு பதில் சொல்ல முடியாமல் வன்முறையை கையாண்டு வெளியேற்றுகிறார்.

அதிமுக பொதுச்செயலாளராக இருந்த அம்மாவை பற்றியும் முதலமைச்சர் எடப்பாடி பழனிசாமி பற்றியும் இழிவாக பேசியது கண்டிக்கத்தக்கது. பெண்களின் தனிப்பட்ட வாழ்க்கையை பற்றி பேச யாருக்கும் உரிமையில்லை. அம்மா என்ற காரணத்தால் மரியாதை நிமித்தமாக ஆசிர்வாதம் வாங்க காலில் விழுவது வழக்கம். அந்த நிகழ்வை பற்றி விமர்சிப்பது ஏற்றுக்கொள்ளமுடியாது.

திமுக தலைவர் முன்பே சட்டமன்ற உறுப்பினர் கீழ்தரமான வார்த்தையால் பேசியதையும் கண்டுக்கொள்ளாமல் உள்ளார். அதிமுகவில் பெண்களை மரியாதை குறைவாக பேசியிருந்தால் கட்சியிலிருந்து நீக்கப்பட்டிருப்பார்கள். பெண்களை பற்றி இழிவாக யார் பேசினாலும் அரசியல் பாராமல் கண்டிப்போம். அரசியலை அரசியலாக எதிர்கொள்ள தயார். ஆனால் தனிப்பட்ட விமர்சனங்களை முன்வைப்பது ஏற்றுக்கொள்ள முடியாது.

இவ்வாறு கழக செய்தி தொடர்பாளர் கோகுல இந்திரா தெரிவித்தார்.

இந்நிகழ்ச்சி டி.வள்ளுவன் என்.எஸ்.விஜயன், பவானி சங்கர், ஜீவா, தீனன், தமிழ்ச்செல்வன், ரங்கராஜன், ஸ்ரீராம், ராஜேந்திரன், ஸ்ரீதர், கண்ணன் ஏ,எஸ்,ராஜூ, பச்சையப்பன், வெங்கடேசன், அனிஷ்குமார், புருஷோத்தமன், தேவா, கோகுல், கேசவன், பக்தவச்சலம், சுனில், ராஜேஷ், கூடல் கோவிந்தன், குப்பன், சடையன், வாசுகி, பவானிசங்கர், வள்ளி, விஜயா, பேபி மற்றும் கழக நிர்வாகிகள் திரளாக கலந்து கொண்டனர்