திருச்சி

முதலமைச்சராக எடப்பாடியார் மீண்டும் வெற்றிவாகை சூடுவார்- மு.பரஞ்ஜோதி பேச்சு

திருச்சி

எத்தனை அவதூறு வந்தாலும் சரி, முதல்வர் மீண்டும் தமிழகத்தின் முதலமைச்சராக வெற்றிவாகை சூடுவார் என்று திருச்சி புறநகர் வடக்கு மாவட்ட கழக செயலாளரும், முன்னாள் அமைச்சருமான மு.பரஞ்ஜோதி கூறினார்.

கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமியை அவதூறாகவும், கழக அரசின் செயல்பாடுகளைப் பற்றி பொய் பிரச்சாரமும் செய்துவரும் தி.மு.க இளைஞரணி செயலாளர் உதயநிதியை கண்டித்து திருச்சி புறநகர் வடக்கு மாவட்ட கழகம் சார்பில் முசிறியில் மாபெரும் கண்டன ஆர்ப்பாட்டம் நடைபெற்றது.

இந்த கண்டன ஆர்ப்பாட்டத்திற்கு தலைமை வகித்த திருச்சி புறநகர் வடக்கு மாவட்ட கழக செயலாளரும், முன்னாள் அமைச்சருமான மு.பரஞ்ஜோதி பேசியதாவது:-

புரட்சித்தலைவி அம்மாவின் பொற்கால ஆட்சியை நடத்திக்கொண்டிருக்கும் நமது முதலமைச்சர் எடப்பாடியார் இந்தியாவிலே முதன்மையான மாநிலமாக தமிழகத்தை கொண்டு செல்லக்கூடிய பணியில் தன்னை முழுமையாக ஈடுபடுத்தி கொண்டிருக்கிறார். ஒவ்வொரு குடும்பத்திற்கும் பல்வேறு நன்மைகளை செய்யக்கூடியவராக திகழ்ந்து கொண்டிருக்கிறார்.

நம்மைப்போல சேலம் மாவட்டத்தில் ஒரு சாதாரண குக்கிராமத்தில் விவசாய குடும்பத்தில் பிறந்து, அ.இ.அண்ணா தி.மு.கவில் ஒரு அடிமட்ட தொண்டனாக தன்னுடைய அரசியல் வாழ்க்கையைத் தொடங்கி, பல்வேறு தேர்தல்களை சந்தித்து தமிழகத்தின் முதலமைச்சராக இன்று வெற்றிநடை போட்டுக் கொண்டிருக்கிறார்.

இதைப் பொறுத்துக்கொள்ள முடியாத தி.மு.க தலைவர் மு.க.ஸ்டாலினின் வழிகாட்டுதலின்படி அவருடைய மகன் உதயநிதிஸ்டாலின் நமது முதலமைச்சர் அண்ணன் எடப்பாடியாரை அவதூறாக பேசிக்கொண்டிருப்பதை தமிழகத்தில் இருக்கக்கூடிய ஒன்றரை கோடி அ.இ.அண்ணா தி.மு.க தொண்டர்கள் எல்லாம் வேதனைப்பட்டதின் வெளிப்பாடுதான் இந்த கண்டன ஆர்ப்பாட்டம்.

இந்தக் கண்டன ஆர்ப்பாட்டத்தில் எழுச்சியோடு இருக்கக்கூடிய நமது திருச்சி புறநகர் வடக்கு மாவட்டத்திலுள்ள 4 சட்டமன்றத் தொகுதிகளை உள்ளடக்கிய கழகத்தின் நிர்வாகிகள், கழகத்தின் செயல்மறவர்கள், மகளிர் அணி சகோதரிகள் உள்ளிட்ட கழகத்தின் அத்தனை பேருடைய கண்டன எழுச்சியை பார்க்கின்ற நேரத்தில், ஆக்ரோஷமாக இங்கே கூடி இருக்கக்கூடிய கழகத் தொண்டர்களின் உணர்வுகளை எல்லாம் பார்க்கும் நேரத்தில், எத்தனை சதி செய்தாலும, எத்தனை சோதனை வந்தாலும், எத்தனை அவதூறுகள் வந்தாலும் அதையெல்லாம் முறியடித்து இந்த திருச்சி புறநகர் வடக்கு மாவட்டத்தில் இருக்கக்கூடிய முசிறி, ஸ்ரீரங்கம், மண்ணச்சநல்லூர், துறையூர் ஆகிய 4 சட்டமன்ற தொகுதியிலும் கழகம்தான் மாபெரும் வெற்றி பெறும் என்கின்ற எழுச்சியை நம்மால் பார்க்க முடிகின்றது.

ஒரு சாதாரண விவசாய குடும்பத்தில் பிறந்தவர்தான் நம்மில் ஒருவராக, அனைவருடனும் இனிமையாக பழகக்கூடியவராக விளங்கும் முதலமைச்சர் எடப்பாடியார் விவசாயப் பெருமக்கள் பொங்கல் பண்டிகையை மகிழ்ச்சியுடன் கொண்டாட வேண்டும் என்பதற்காக இப்பொழுது பொங்கல் தொகுப்புடன் 2500 ரூபாயை வழங்கியிருக்கிறார். இதுபோன்று விவசாயிகளுக்கு இந்தியாவில் எந்த முதலமைச்சரும் செய்யமுடியாத திட்டத்தை நிறைவேற்றி உள்ளதால் விவசாயிகளின் வாழ்த்துக்களையும், தமிழக மக்களின் ஒட்டுமொத்த பாராட்டினையும் பெற்றுள்ளார் நமது முதலமைச்சர் அண்ணன் எடப்பாடியார்.

இதையெல்லாம் பொறுத்துக் கொள்ளமுடியாத தி.மு.க தலைவர் மு.க.ஸ்டாலின் தனது மகன் உதயநிதி ஸ்டாலினை வைத்து இன்றைக்கு நமது முதலமைச்சர் எடப்பாடியார் மீது அவதூறுகளை பரப்பிக்கொண்டிருக்கிறார். இன்றைக்குக் கூட தினமலர் நாளிதழின் 4-ம் பக்கத்தில் உதயநிதி ஸ்டாலினுடைய பேச்சை தமிழக மக்கள் கண்டிப்பதை விட தி.மு.கவைச்சேர்ந்த முன்னணி தலைவர்கள் கூட “ஒரு கத்துக்குட்டியை கொண்டுவந்து அரசியலில் விட்டதன் விளைவால்தான் இதுபோன்ற நிலைமை ஏற்பட்டுள்ளது” என்று சொல்லி வேதனைப் படக்கூடிய அளவிற்கு இன்றைக்கு நிலைமை இருக்கின்றது என்பதை தமிழக மக்கள் எண்ணிப் பார்க்கவேண்டும்.

சமீபத்தில் நம்முடைய முதலமைச்சர் எடப்பாடியார் திருச்சி மரக்கடையில் நடைபெற்ற கழக தேர்தல் பிரச்சாரக் கூட்டத்தில் பேசியபொழுது, திருச்சி மாவட்டத்தினுடைய முன்னாள் அமைச்சர், தி.மு.க. முதன்மைச் செயலாளர் கே.என்.நேரு ஒரு அனுபவமுள்ள மூத்த அரசியல்வாதி. அப்படிப்பட்ட ஒரு அரசியல்வாதி உதயநிதி ஸ்டாலினுக்கு கார் கதவை திறந்து விடுவது மிகுந்த வேதனை அளிக்கின்றது என்று குறிப்பிட்டார்கள். தி.மு.கவினருடைய வேதனையின் வெளிப்பாட்டை நம்முடைய முதலமைச்சரே குறிப்பிட்டார்கள். அந்த அளவிற்கு தி.மு.கவின் நிலைமை எங்கோ போய்க் கொண்டு இருக்கின்றது என்பதை நீங்கள் எண்ணிப் பார்க்க வேண்டும்.

உதயநிதி ஸ்டாலின் போன்ற கத்துக்குட்டிகள் நமது முதலமைச்சர் அண்ணன் எடப்பாடியார் மீது சேற்றை வாரி இறைத்தாலும் அதெல்லாம் தமிழக மக்கள் பூக்களாக அவர் மீது போட்டுக் கொண்டிருக்கிறார்கள் என்பதை வரலாறு உணர்த்திக் கொண்டே இருக்கிறது.

எனவே, இங்கு இருக்கக்கூடிய கழகத்தின் நிர்வாகிகள் தொண்டர்கள் அத்துணை பேருடைய சார்பாக உதயநிதி ஸ்டாலினுக்கு நமது கடும் கண்டனத்தை தெரிவித்துக்கொள்கின்றோம். எப்பொழுதுமே அவர்களுடைய பாரம்பரியம் என்ன என்பது உங்களுக்கு நன்றாகத் தெரியும்.

நல்ல பாரம்பரியம் இருந்தால்தான் நல்ல வார்த்தைகள் வரும். தரங்கெட்ட வழியில் வந்தக் காரணத்தினால் இதுபோன்ற தரம் தாழ்ந்த பேச்சுக்களை பேசிக்கொண்டே இருக்கிறார்கள் என்பதை தமிழக மக்கள் நன்றாக உணர்ந்து கொண்டுதான் இருக்கிறார்கள்.எத்தனை தடை வந்தாலும் சரி. எத்தனை கேலி சொற்கள் வந்தாலும் சரி. எத்தனை அவதூறு வந்தாலும் சரி. அவற்றையெல்லாம் உடைத்தெறிந்து நம்முடைய முதலமைச்சர் எடப்பாடியார் மீண்டும் தமிழகத்தின் முதலமைச்சராக வெற்றிவாகை சூடுவார்கள்.

இவ்வாறு முன்னாள் அமைச்சர் மு.பரஞ்ஜோதி பேசினார்.

இந்நிகழ்ச்சியில் கழக எம்.ஜி.ஆர் இளைஞரணி செயலாளரும், முன்னாள் அமைச்சருமான் என்.ஆர்.சிவபதி, கழக சட்டமன்ற உறுப்பினர்கள் பரமேஸ்வரிமுருகன், எம்.செல்வராஜ், முன்னாள் அமைச்சர்கள் கு.ப.கிருஷ்ணன், டி.பி.பூனாட்சி, ப.அண்ணாவி, மாவட்டக் கழக அவைத்தலைவரும், முன்னாள் சட்டமன்ற உறுப்பினருமான பிரின்ஸ் எம்.தங்கவேல், முன்னாள் சட்டமன்ற உறுப்பினர்கள் டி.இந்திராகாந்தி, எஸ்.ரத்தினவேல், மல்லிகாசின்னசாமி, முன்னாள் மாவட்ட கழக செயலாளர் சுப்பு(எ)பே.சுப்ரமணியன் உள்ளிட்ட ஏராளமான கழக நிர்வாகிகள் கலந்துகொண்டனர்.