தற்போதைய செய்திகள்

ஆற்றில் மூழ்கி பலியானோரின் உடல்கள் பிரேத பரிசோதனைக்கு லஞ்சம்-ஆத்திரமடைந்த பொதுமக்கள் சாலை மறியல்

திண்டுக்கல்
ஆற்றில் மூழ்கி இறந்த 4 பேர்களின் உடல்களை பிரேத பரிசோதனைக்கு திண்டுக்கல் அரசு மருத்துவமனை ஊழியர்கள் லஞ்சம் கேட்டதால் ஆத்திரமடைந்த பொதுமக்கள் சாலை மறியலில் ஈடுபட்டனர். இதனால் பரபரப்பு ஏற்பட்டது.

திண்டுக்கல் அருகே என்.பாறைபட்டியை சேர்ந்தவர் சக்திவேல் (வயது30). இவர் அரசு உதவி பெறும் பள்ளியில் ஆசிரியராக பணிபுரிந்து வந்தார். இவர் நேற்றுமுன்தினம் தனது மனைவி அர்ச்சனா (வயது 22), உறவினரின் குழந்தை ஐஸ்வர்யா (வயது 14), அர்ச்சனாவின் அண்ணன் மகள் சத்ய பாரதி (வயது 11) ஆகியோருடன் வீட்டிற்கு அருகே உள்ள சந்தனவர்த்தினி ஆற்றில் உள்ள குட்டையில் குளிக்கச் சென்றனர்.

அப்போது எதிர்பாராதவிதமாக இரு சிறுமிகள் குட்டையில் மூழ்கினர். அவர்களை காப்பாற்ற சென்ற சக்திவேலும் அர்ச்சனாவும் தண்ணீரில் மூழ்கி பரிதாபமாக உயிரிழந்தனர். சம்பவம் குறித்து கேள்விப்பட்டவுடன் திண்டுக்கல் தாலுகா போலீசார் தீயணைப்பு போலீசாரின் துணையோடு நான்கு பேர்களின் உடல்களை திண்டுக்கல் அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

இந்நிலையில் நேற்று இறந்தவர்களின் உடல்களை பிரேத பரிசோதனை செய்ய வேண்டுமானால் லஞ்சம் கொடுக்க வேண்டும் என பிரேத பரிசோதனை செய்யும் ஊழியர்கள் கேட்டதாக தெரிகிறது. இதனால் ஆத்திரமடைந்த சக்திவேலின் உறவினர்கள் அரசு மருத்துவமனை முன்பாக சாலை மறியலில் ஈடுபட்டனர்.
இதுகுறித்து சக்திவேலின் உறவினர்கள் கூறியதாவது:-

இறந்தவர்களின் உடல்களுக்கு தலா ரூ.3 ஆயிரம் வீதம் 12 ஆயிரம் லஞ்சமாக தர வேண்டும் என பிரேத பரிசோதனை செய்யும் ஊழியர்கள் கேட்டனர். அதனை வழங்கினோம். மேலும், பிரேத பரிசோதனை முடிந்தவுடன் அவர்களது உடல்களை துணியால் மூடுவதற்கும், ஆம்புலன்சில் உடல்களை அனுப்பி வைப்பதற்கும் தலா ரூ.5000 வீதம் ரூ.2000 லஞ்சம் தர வேண்டும் என கேட்டனர். இதனால் அதிர்ச்சி அடைந்த நாங்கள் அரசு மருத்துவமனை ஊழியர்களையும், நிர்வாகத்தையும் கண்டித்து சாலை மறியலில் ஈடுபட்டு உள்ளோம் என்றனர்.

சுமார் ஒரு மணிநரம் சக்திவேலின் உறவினர்கள் சாலை மறியலில் ஈடுபட்டதால் போக்குவரத்து கடுமையாக பாதிக்கப்பட்டது. சம்பவம் குறித்து தகவல் அறிந்து வந்த நகர் வடக்கு காவல் நிலைய போலீசார், சக்திவேலின் உறவினர்களிடம் சமாதான பேச்சுவார்த்தையில் ஈடுபட்டு அவர்களை மீண்டும் மருத்துவமனைக்குள் அனுப்பி வைத்தனர்.

இச்சம்பவத்தின் போது சாலை மறியலில் ஈடுபட்ட ஒரு பெண் திடீரென மயக்கம் அடைந்ததால் அப்பகுதியில் பெரும் பரபரப்பு ஏற்பட்டது.ஆற்றில் மூழ்கி பலியானோரின் உறவினர்கள் ஏற்கனவே துயரத்தில் இருக்கும் சூழ்நிலையில் உடல்களை பிரேத பரிசோதனை செய்ய லஞ்சம் கேட்ட ஈவு,இரக்கமற்ற அரசு மருத்துவமனை ஊழியர்களை என்ன செய்வது என்று தெரியவில்லை என்று பொதுமக்கள் மிகுந்த வேதனையுடன் கூறினர்.