தற்போதைய செய்திகள்

அரசியலில் தத்துக்குட்டி ஸ்டாலின்,கத்துக்குட்டி உதயநிதி – அமைச்சர் கே.டி.ராஜேந்திரபாலாஜி பதிலடி

சென்னை

மக்களின் வளர்ச்சிக்காக தொடர்ந்து பாடுபட்டவர் எங்கள் அம்மா என்றும் அவர் பெயரை ரயில் நிலையத்திற்கு வைத்ததை விமர்சனம் செய்யும் தகுதி அரசியலில் தத்துக்குட்டி ஸ்டான்,கத்துக்குட்டி உதயநிதிக்கு கிடையாது என்று அமைச்சர் கே.டி.ராேஜேந்திரபாலாஜி் தெரிவித்துள்ளார்.

சென்னை மெட்ரோ ரயில் நிலையங்களுக்கு அண்ணா, எம்ஜிஆர், புரட்சித்தலைவி அம்மா பெயர்களை முதலமைச்சர் எடப்பாடி கே.பழனிச்சாமி சூட்டியுள்ளார். அதன்படி ஆலந்தூர் மெட்ரோ ரயில் நிலையம் அறிஞர் அண்ணா ஆலந்தூர் மெட்ரோ ரயில் நிலையம் என பெயர் மாற்றம் செய்யப்பட்டுள்ளது.

இதேபோல சென்ட்ரல் மெட்ரோ நிலையம் புரட்சி தலைவர் எம்.ஜி.ராமச்சந்திரன் சென்ட்ரல் மெட்ரோ நிலையம் என பெயர் மாற்றப்பட்டுள்ளது. புறநகர் பேருந்து நிலையம் மெட்ரோ புரட்சித்தலைவி டாக்டர் ஜெ. ஜெயலலிதா கோயம்பேடு என மாற்றி தமிழக அரசு உத்தரவிட்டுள்ளது. இதற்கு பலரும் வரவேற்பு தெரிவித்த நிலையில் எதிர்ப்பு தெரிவித்த திமுக இளைஞரணி செயலாளர் உதயநிதிஸ்டாலினுக்கு தமிழக பால்வளத்துறை அமைச்சர் கே.டி.ராஜேந்திரபாலாஜி கடும் கண்டனம் தெரிவித்துள்ளார்.

இது குறித்து விருதுநகர் மாவட்ட கழக பொறுப்பாளரும் தமிழக பால்வளத்துறை அமைச்சருமான கே.டி.ராஜேந்திரபாலாஜி தனது டுவிட்டர் பக்கத்தில் கூறியிருப்பதாவது:-

சர்க்காரியா கமிஷனால் விஞ்ஞான ரீதியாக ஊழல் செய்தவர்கள் என குற்றஞ்சாட்டப்பட்டவர்கள். திருட்டு ரயில் ஏறி சென்னை வந்தவர்கள்.சட்டத்தையும், சமூகத்தையும் ஏமாற்றி செல்வ செழிப்பானவர்கள். தன் வாழ்க்கையை தியாகம் செய்து தமிழ்நாட்டின் வளர்ச்சிக்காகவும், தமிழ் மக்களின் உரிமைக்காகவும் உரிமைக்குரல் கொடுத்த எங்கள் அம்மா அவர்களின் பெயரை மெட்ரோ ரயில் நிலையத்திற்கு முதல்வர் எடப்பாடியார் சூட்டியது, தமிழக மக்களின் நீண்ட நாள் ஏக்கப் பெருமூச்சு. இதை குறை கூறும் தகுதி அரசியல் கத்துக்குட்டியான உனக்கும் கிடையாது உனக்கு கத்துக்கொடுத்த தத்துதக்குட்டிக்கும் கிடையாது.

இவ்வாறு அமைச்சர் கே.டி.ராஜேந்திரபாலாஜி பதிவிட்டுள்ளார்.