தமிழகம்

முதலமைச்சர் கணினி தமிழ் விருதுக்கு விண்ணப்பிக்க காலஅவகாசம் நீட்டிப்பு

தமிழக அரசு அறிவிப்பு

சென்னை

முதலமைச்சர் கணினி தமிழ் விருதுக்கு விண்ணப்பிக்க கால அவகாசம் நீட்டிக்கப்பட்டுள்ளதாக தமிழக அரசு தெரிவித்துள்ளது.

இது குறித்து அரசு வெளியிட்டுள்ள செய்திக்குறிப்பில் கூறப்பட்டிருப்பதாவது:-

தகவல் தொழில் நுட்ப வளர்ச்சிக்கேற்ப, உலகமெலாம் கணினி வழித் தமிழ் மொழி பரவ செய்யும் வகையில் கணினித் தமிழ் வளர்ச்சிக்காக சிறந்த தமிழ் மென்பொருள் உருவாக்குபவர்களை ஊக்குவிக்கும் வகையில் முதலமைச்சர் கணினித் தமிழ் விருது என்ற பெயரில் தமிழ் வளர்ச்சித்துறை வாயிலாக விருது வழங்கப்படுகிறது. இவ்விருது பெறுபவருக்கு விருதுத் தொகையாக ரூ.1 லட்சம், ஒரு பவுன் தங்கப்பதக்கம் மற்றும் தகுதியுரை வழங்கப்படுகிறது.


அவ்வகையில் இவ்வாண்டு (2020) முதலமைச்சர் கணினித் தமிழ் விருதுக்கு தனியாள் மற்றும் நிறுவனத்திடமிருந்து, தமிழ் வளர்ச்சிக்கான மென்பொருள்கள் வரவேற்கப்பட்டு, விருதுக்கான விண்ணப்பம் வந்த சேரவேண்டிய இறுதி நாள் 31.12.2020 என ஏற்கெனவே செய்தி வெளியிடப்பட்டது.

தற்பொழுது விருதுக்கு விண்ணப்பிக்கும் காலம் மேலும் 26.02.2021 வரை நீட்டிக்கப்படுகிறது. போட்டிக்கு அனுப்பப்படவுள்ள மென்பொருள்கள் 2017, 2018, 2019-ம் ஆண்டுகளில் தயாரிக்கப்பட்டதாக இருத்தல் வேண்டும். இவ்விருதுக்குரிய விண்ணப்பம் மற்றும் விதிமுறைகளை தமிழ் வளர்ச்சித்துறையின் வலைத்தளத்தில் இலவசமாக பதிவிறக்கம் செய்துகொள்ளலாம்.

விண்ணப்பங்களை தமிழ் வளர்ச்சி இயக்குநர், தமிழ் வளர்ச்சி வளாகம், தமிழ்ச்சாலை, எழும்பூர், சென்னை – 600 008 என்ற முகவரிக்கு 26.2.2021-க்குள் அனுப்பி வைக்க வேண்டும். மேலும் இது தொடர்பாக தொலைபேசி எண்கள்: 044- 28190412/ 044- 28190413 ஆகியவற்றிலும் தொடர்பு கொள்ளலாம்.

இவ்வாறு அரசு செய்திக்குறிப்பில் கூறப்பட்டுள்ளது.