தற்போதைய செய்திகள்

குறை தீர்க்கும் மேலாண்மை திட்டம் இன்னும் ஒருவாரத்தில் தொடக்கம் – முதலமைச்சர் அறிவிப்பு

சென்னை, பிப். 8-
குறை தீர்க்கும் மேலாண்மை திட்டம் இன்னும் ஒரு வாரத்தில் தொடங்கப்படும் என்று முதலமைச்சர் எடப்பாடி கே.பழனிசாமி அறிவித்துள்ளார்.

முதலமைச்சர் எடப்பாடி கே. பழனிசாமி திருவள்ளூர் மாவட்டம், ஆவடியில் நடைபெற்ற கழக இளைஞர் பாசறை, இளம் பெண்கள் பாசறை மற்றும் தகவல் தொழில்நுட்பப்பிரிவு நிர்வாகிகளுடனான கலந்துரையாடல் கூட்டத்தில் பேசியதாவது.

பெட்டியில் மனு போடுவது அந்த காலத்தோடு முடிந்து விட்டது. இப்போது எல்லாம், அனைவர் கைகளிலும் செல்போன் உள்ளது. குடிநீர்பிரச்சனையா, சாலைப் பிரச்சனையா அதை முதலமைச்சரின் உதவி மையம் மற்றும் ஒருங்கிணைக்கப்பட்ட குறைதீர்க்கும் மேலாண்மைத் திட்டம் இன்னும் ஒரு வார காலத்தில் துவக்க இருக்கின்றோம். ஒரு போட்டோ போட்டால் போதும், அது நேரடியாக முதலமைச்சருக்கு வரும். அதற்கு உதவி மையம் எண் 1100. உங்களுடைய இல்லத்தில் இருந்தே பிரச்சனைகளை அரசின் கவனத்திற்கு கொண்டு வருவதற்கு இந்த திட்டம் துவக்கப்பட உள்ளது. இது போன்ற பல்வேறு திட்டங்கள் மாண்புமிகு அம்மாவின் அரசு செயல்படுத்தி வருகிறது.

இந்தப்பகுதியில் கூட பல்வேறு பாலப்பணிகள், சாலைபணிகள் நிறைவேற்றப்பட்டுள்ளது. பருத்திப்பட்டு ஏரி ரூ.29.50 கோடி மதிப்பீட்டில் புதுப்பிக்கப்பட்டுள்ளது. ஆவடி மாநகராட்சியில் பாதாள சாக்கடைத் திட்டம், குடிநீர் இணைப்பு திட்டம் நிறைவேற்றப்பட்டு மக்கள் பயன்பாட்டுக்கு கொண்டுவரப்பட்டுள்ளது. ஆவடி நகராட்சியை மாநகராட்சியாக தரம் உயர்த்திய அரசு அம்மாவின் அரசு.

தேர்தல் களத்தில் இளைஞர், இளம் பெண்கள் பாசறை மற்றும் தகவல் தொழில் நுட்ப பிரிவினர் முழு ஈடுபாட்டோடு பணியாற்றிட வேண்டும். நமக்கு கிடைக்க வேண்டிய வாக்குகளை சிந்தாமல் சிதறாமல் கழக வேட்பாளர்களுக்கு கிடைத்திட அனைவரும் ஒன்றிணைந்து பணியாற்றிட வேண்டும். தேர்தல் என்பது மிகவும் சவாலான ஒன்று அந்த சவால்களை முறியடித்து வெற்றி பெறச் செய்வது தான். உங்களுடைய தலையாய பணியாக இருக்க வேண்டும்.

இவ்வாறு முதலமைச்சர் எடப்பாடி கே.பழனிசாமி பேசினார்.