தற்போதைய செய்திகள்

கழக அரசுக்கு கிடைக்கும் நல்லபெயரை கெடுக்க சிலர் திட்டமிட்டு போராட்டம் – அமைச்சர் பி.தங்கமணி குற்றச்சாட்டு

நாமக்கல்

கழக அரசுக்கு கிடைக்கும் நல்ல பெயரை கெடுக்க சிலர் திட்டமிட்டு போராட்டம் நடத்துகிறார்கள் என்று அமைச்சர் பி.தங்கமணி குற்றம் சாட்டியுள்ளார்.

நாமக்கல் மாவட்ட ஆட்சியர் அலுவலக பெருந்திட்ட வளாகத்தில் உள்ள விளையாட்டு மைதானத்தில், சமூக நலத்துறை சார்பில் ஏழைப்பெண்களின் திருமணத்திற்கு நிதி உதவியுடன் தாலிக்கு தங்கம் வழங்கும் விழா நடைபெற்றது. இந்நிகழ்ச்சிக்கு மாவட்ட ஆட்சித்தலைவர் கா.மெகராஜ் தலைமை வகித்தார்.

இந்த விழாவில் கழக அமைப்புச் செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி, கழக மகளிரணி இணைச் செயலளாரும் சமூக நலன் மற்றும் சத்துணவுத் திட்டத்துறை அமைச்சருமான டாக்டர் வெ.சரோஜா ஆகியோர் கலந்துகொண்டு நாமக்கல் மாவட்டத்தை சேர்ந்த 1874 பயனாளிகளுக்கு, 15 கோடியே 62 லட்சத்து 27 ஆயிரத்து 192 ரூபாய் மதிப்பில் தாலிக்கு தங்கம் மற்றும் திருமண நிதிஉதவி ஆகியவற்றை வழங்கினர்.

பின்னர் அமைச்சர் பி.தங்கமணி செய்தியாளர்களிடம் கூறியதாவது:-

வேளாண் விளை நிலங்களில் உயர்மின் கோபுரங்கள் அமைக்கும் போது விவசாயிகளுக்கு நாங்கள் வழங்கிய அரசாணைப்படி நிவாரண தொகை வழங்கப்பட்டு வருகிறது. இதுதொடர்பாக இரண்டு, மூன்று முறை, விவசாய சங்கங்கள், பிரதிநிதிகளுடன் பேச்சுவார்த்தை நடத்தப்பட்டுள்ளது.

எந்த மாவட்டத்தில் அரசால் அறிவிக்கப்பட்ட தொகை வரவில்லையோ அந்த விவசாயிகள் தங்களது விபரங்களை அந்தந்த மாவட்ட ஆட்சியரிடம் வழங்கினால் உடனடியாக நிவாரணம் வழங்கப்படும் என பேச்சுவார்த்தையின்போது தெரிவித்திருந்த நிலையில், இதுவரை அதுகுறித்த பட்டியலை விவசாய சங்கங்கள், பிரதிநிதிகள் வழங்கவில்லை.

இது விவசாயிகளின் அரசு, முதலமைச்சர் கூட விவசாய கடனை அவர்கள் கேட்காமலேயே 12 ஆயிரத்து 110 கோடி ரூபாயை தள்ளுபடி செய்து இருக்கிறார். கழக அரசுக்கு நல்ல பெயர் வந்து விடக்கூடாது என்பதற்காக சிலர் திட்டமிட்டு போராட்டம் நடத்துகிறார்கள்.

இவ்வாறு அமைச்சர் பி.தங்கமணி கூறினார்.