தற்போதைய செய்திகள்

மேட்டுப்பாளையம் வட்டத்தில் கரையோரப் பகுதிகளில் வசிக்கும் மக்களுக்கு மாவட்ட நிர்வாகம் மூலம் எச்சரிக்கை – அமைச்சர் ஆர்.பி.உதயகுமார் பேட்டி

சென்னை:-

மேட்டுப்பாளையம் வட்டத்தில் கரையோரப் பகுதிகளில் வசிக்கும் மக்களுக்கு மாவட்ட நிர்வாகம் மூலம் எச்சரிக்கை விடுக்கப்பட்டுள்ளது என்று அமைச்சர் ஆர்.பி.உதயகுமார் தெரிவித்தார்.

சென்னை எழிலகத்தில் வருவாய்த்துறை அமைச்சர் ஆர்.பி.உதயகுதார் செய்தியாளர்களுக்கு பேட்டி அளித்தார்.

இந்த வருடம் தென்மேற்கு பருவமழை கடந்த ஜூன் மாதம் துவங்கி பெய்து வருகிறது. இதனால் தமிழகத்தில் இதுவரை சராசரியாக 203 மி.மீ பெய்துள்ளது. இது தென்மேற்கு பருவமழை கால சராசரியை விட 41 சதவீதம் குறைவு. தற்போது நீலகிரி மாவட்டத்தில் 03.08.2020 அன்று சராசரியாக 62.64 மி.மீ மழை பெய்துள்ளது, குறிப்பாக மேல்பவானி, அவலாஞ்சி, கவுல்பஜார், எமரால்டு, தேவலா, கிளன்மார்கென் மற்றும் நடுவட்டம் ஆகிய இடங்களில் அதிக மழை பெய்துள்ளது.

இதன் காரணமாக பில்லூர் அணையின் நீர்மட்டம் அதன் முழு கொள்ளவை அடையவுள்ளதால் அணையின் பாதுகாப்பு கருதி நேற்று காலை 9.00 மணி அளவில் தண்ணீர் திறந்துவிடப்பட உள்ளது என்ற பில்லூர் செயற்பொறியாளர் அறிவிப்பின்படி கோயம்பத்தூர் மாவட்டம் மேட்டுப்பாளையம் வட்டத்தில் கரையோரப் பகுதிகளில் வசிக்கும் மக்களுக்கு மாவட்ட நிர்வாகம் மூலம் எச்சரிக்கை செய்யப்பட்டுள்ளது.

தற்போது பில்லூர் அணையின் நீர்மட்டம் 96.5 அடியாகவும் நீர் வரத்து 12000 கன அடியாக உள்ளது. சென்னை வானிலை ஆராய்ச்சி மையம் தன்னுடைய அறிக்கையில் நேற்று நீலகிரி மற்றும் கோயம்புத்தூர் மாவட்டங்களில் கனமழை பெய்வதற்கு வாய்ப்புள்ளது என்று தெரிவித்துள்ளது.

நீலகிரி மாவட்டம், கூடலூர் 609 மி.மீ, பந்தலூர் 177 மி.மீ,குந்தா 741 மி.மீ மழை பெய்துள்ளது. பலத்த மழையின் காரணமாக கூடலூர் வட்டம், கூடலூர் 1 கிராமத்தில் அத்திப்பாளி மற்றும் புத்தூர் வயல் ஆகிய இடங்களில் வெள்ளப்பெருக்கு ஏற்பட்ட காரணத்தால் அத்திப்பாளி என்ற இடத்தில் 103 நபர்கள் மீட்கப்பட்டு அத்திபாளி அரசு ஆரம்ப பள்ளியிலும், புத்தூர் வயல் என்ற இடத்தில் 124 நபர்கள் மீட்கப்பட்டு அரசு மேல்நிலை பள்ளியிலும் பாதுகாப்பாக தங்க வைக்கப்பட்டு அவர்களுக்கு உணவு மற்றும் இதர அடிப்படை தேவைகள் அளிக்கப்பட்டுள்ளன.

கூடலூர் வட்டத்தில் ஒரு வீடும், பந்தலூர் வட்டத்தில் இரண்டு வீடுகளும் மேற்படி மழையால் பகுதி சேதம் அடைந்துள்ளன. கூடலூர் வட்டம், கூடலூர் கிராமம், கே.கே.நகர் என்ற இடத்தில் சிறிய அளவில் நிலச்சரிவு ஏற்பட்டது. அது தற்போது சரி செய்யப்பட்டது. ஏனைய இடங்களில் பாதிப்புகள் ஏதும் இல்லை. உதகை – கூடலூர் தேசிய நெடுஞ்சாலையில் கனமழை காரணமாக மரம் சாய்ந்ததில் போக்குவரத்து தடைபட்டது.

தற்போது மரம் அகற்றப்பட்டு போக்குவரத்து சீர்செய்யப்பட்டது. மீட்பு பணியில் வருவாய்த்துறை, ஊரக வளர்ச்சித்துறை, நெடுஞ்சாலைத்துறை, தீயணைப்புத்துறை மற்றும் காவல் துறை ஆகிய துறைகளில் இருந்து 112 அலுவலர்கள் பணியில் ஈடுபடுத்தப்பட்டுள்ளனர். செஞ்சிலுவைச் சங்கம் தன்னார்வலர்கள் மற்றும் சத்திய சாய் டிரஸ்ட் தன்னார்வலர்கள் மீட்பு பணிகளில் அரசுக்கு உதவி செய்து வருகின்றனர். மேலும் தற்போது வரை எவ்வித உயிர் சேதமும் ஏற்படவில்லை.
இவ்வாறு அமைச்சர் ஆர்.பி.உதயகுமார் கூறினார்.

உடன் பேரிடர் மேலாண்மை ஆணையர் முனைவர் டி.ஜகந்நாதன், பேரிடர் மேலாண்மை இணை இயக்குநர் ஆர்.பன்னீர் செல்வம் இருந்தனர்.