தற்போதைய செய்திகள்

தி.மு.க. செய்த திட்டங்களை பட்டியலிட தயாரா?ஸ்டாலினுக்கு, அமைச்சர் எஸ்.பி.வேலுமணி சவால்

நீலகிரி, பிப்.9-

தி.மு.க. செய்த நலத்திட்டங்களை பட்டியலிட தயாரா? என்று ஸ்டாலினுக்கு அமைச்சர் எஸ்.பி.வேலுமணி சவால் விடுத்துள்ளார்.

நீலகிரி மாவட்டம், உதகை சட்டமன்றத் தொகுதி நிர்வாகிகள் ஆலோசனை கூட்டம் நடைபெற்றது. இக்கூட்டத்திற்கு மாவட்ட கழக செயலாளர் கப்பச்சி வினோத் தலைமை தாங்கினார். மாவட்ட கழக துணைச் செயலாளர் கோபாலகிருஷ்ணன் வரவேற்றார். கழக அமைப்புச் செயலாளர்கள் கே.ஆர்.அர்ஜுனன், புத்திசந்திரன், குன்னூர் தொகுதி சட்டமன்ற உறுப்பினர் சாந்தி ராமு ஆகியோர் முன்னிலை வகித்தனர்.

இக்கூட்டத்தில் கழக அமைப்பு செயலாளரும், கோவை புறநகர் தெற்கு மாவட்ட கழக செயலாளரும், நகராட்சி நிர்வாகம், ஊரக வளர்ச்சி மற்றும் சிறப்புத்திட்டங்கள் செயலாக்கத்துறை அமைச்சருமான எஸ்.பி.வேலுமணி பேசியதாவது:-

புரட்சித்தலைவி அம்மா அவர்களின் வழியில் விவசாயிகளின் விடிவெள்ளி முதலமைச்சர் எடப்பாடி கே.பழனிசாமி தமிழகத்தில் பொற்கால ஆட்சி நடத்தி வருகிறார். தமிழக மக்களின் முன்னேற்றத்துக்கு எண்ணற்ற நலத்திட்டங்களை முதலமைச்சர் செயல்படுத்தி வருகிறார்.

16.43 லட்சம் ஏழை எளிய விவசாயிகள் கூட்டுறவு சங்கத்தில் பெற்ற பயிர்கடன் ரூ.12,110 கோடியை தள்ளுபடி செய்வதாக சட்டமன்றத்தில் 110 விதியின் கீழ் முதலமைச்சர் அறிவித்திருந்தார். இது தமிழக விவசாயிகளுக்கு கிடைத்த மிகப்பெரிய பரிசாகும்.

சாதாரண விவசாய குடும்பத்தில் பிறந்தவர் என்பதால் தான் விவசாயிகள் பெரும் கஷ்டங்களை தெரிந்து அவர்கள் பயன்பெறும் வகையில் இத்திட்டத்தை முதலமைச்சர் அறிவித்துள்ளார். இதை பொறுக்க முடியாத ஸ்டாலின் பொய் பிரசாரம் செய்து மக்கள் மனதில் குழப்பத்தை ஏற்படுத்தி அதன்மூலம் அரசியல் ஆதாயம் தேட முயற்சி செய்கிறார்.
பொய் சொல்வதற்கு நோபல் பரிசு கொடுக்க வேண்டும் என்றால் அது தி.மு.க. தலைவர் ஸ்டாலினுக்கு கொடுக்கலாம். என்ன பேசுகிறார் என்று அவருக்கே தெரியாது.

இப்போது தான் வானத்தில் இருந்து வந்தவர்போல் எல்லாருக்கும் நல்லது செய்வது போல் பேசி வருகிறார் ஸ்டாலின். ஆனால் அவர் ஆட்சியில் இருக்கும்போது தமிழகத்திற்கு எந்த திட்டத்தையும் கொண்டு வந்ததில்லை. 2006 முதல் 2011 வரை துணை முதலமைச்சராக இருந்தார் ஸ்டாலின், அதுமட்டுமல்ல 10 வருடத்திற்கும் மேலாக காங்கிரஸ் தலைமையில் நடந்த ஆட்சியில் மத்திய அரசின் அமைச்சரவையில் அங்கம் வகித்தனர். தமிழகத்திற்கு துரோகம் மட்டுமே செய்து விட்டு இப்போது ஆட்சியில் இல்லாத போது மக்களுக்கு நல்லது செய்வது போல் பொய் சொல்லி ஏமாற்றி வருகிறார். ஸ்டாலின் உள்ளாட்சித்துறை அமைச்சராக இருந்தபோது மக்களுக்கு செய்த நலத்திட்டங்களை பட்டியலிட முடியுமா?.

கழக ஆட்சியில் பல்வேறு மக்கள் நலததிட்டங்களை செயல்படுத்தியதன் மூலம் மத்திய அரசிடமிருந்து 143 விருதுகளை உள்ளாட்சித்துறை பெற்றுள்ளது. முதலமைச்சர் எடப்பாடி கே.பழனிசாமி ஏழை மாணவர்கள் மருத்துவப்படிப்பில் சேர 7.5 சதவீதம் உள் இடஒதுக்கீடு பெற்றுத்தந்துள்ளார். 2000 மினி கிளினிக் உட்பட எண்ணற்ற நலத்திட்டங்களை நிறைவேற்றி உள்ளார். ஆகவே நீலகிரி மாவட்டத்தில் கழகத்திற்கு வெற்றி வாய்ப்பு பிரகாசமாக உள்ளது. கழகத்தின் வெற்றியை இலக்காக கொண்டு நிர்வாகிகள் பணியாற்ற வேண்டும்.

இவ்வாறு அமைச்சர் எஸ்.பி.வேலுமணி பேசினார்.