தற்போதைய செய்திகள்

நாமக்கல் அரசு மருத்துவ கல்லூரி மற்றும் மருத்துவமனை கட்டும் பணிகள் – அமைச்சர் பி.தங்கமணி நேரில் பார்வையிட்டார்

நாமக்கல்

நாமக்கல் மாவட்ட ஆட்சியர் அலுவலக பெருந்திட்ட வளாகத்தில் கட்டப்பட்டு வரும் நாமக்கல் அரசு மருத்துவ கல்லூரி மற்றும் மருத்துவமனை கட்டடங்களின் கட்டுமான பணிகளை மின்சாரம், மதுவிலக்கு மற்றும் ஆயத்தீர்வைத்துறை அமைச்சர் பி.தங்கமணி நேரில் பார்வையிட்டார். மாவட்ட ஆட்சித்தலைவர் கா.மெகராஜ், காவல் கண்காணிப்பாளர் ச.சக்தி கணேசன் ஆகியோர் உடனிருந்தனர்.

நாமக்கல் அரசு மருத்துவ கல்லூரி மற்றும் மருத்துவமனை கட்டடங்களின் கட்டுமான பணிக்கு முதலமைச்சர் 05.03.2020 அன்று அடிக்கல் நாட்டினார். நாமக்கல் அரசு மருத்துவ கல்லூரிக்கு 5 கட்டடங்கள் 3,28,161 சதுர அடி பரப்பளவில் ரூ.112.32 கோடி மதிப்பீட்டிலும், மருத்துவமனைக்கு 9 கட்டடங்கள் 4,48,333 சதுர அடி பரப்பளவில் ரூ.157.21 கோடி மதிப்பீட்டிலும், இருப்பிட கட்டடங்கள் 8 எண்ணிக்கையில் 2,29,998 சதுர அடி பரப்பளவில் ரூ.69.22 கோடி மதிப்பீட்டிலும் கட்டப்பட்டு வருகின்றன.

மருத்துவ கல்லூரி கட்டடமானது தரை தளம் மற்றும் 5 மாடிகளுடனும், மருத்துவமனை கட்டடங்கள் வாகனம் நிறுத்தும் தளம், தரைதளம் மற்றும் 6 மாடிகளுடனும், விடுதி கட்டடங்கள் வாகனம் நிறுத்தும் தளம், தரைதளம் மற்றும் 5 மாடிகளுடனும் கட்டப்பட்டு வருகின்றன.

இந்த பணிகள் நடைபெற்று வருவதை அமைச்சர் பி.தங்கமணி நேரில் பார்வையிட்டார். மேலும் பணிகளை விரைந்து முடிக்குமாறு ஒப்பந்ததாரர்களுக்கு உத்தரவிட்டார். மேற்கண்ட பணிகளை தொடர்ந்து கண்காணித்து பணிகள் தரமாக நடைபெறுவதை உறுதி செய்யுமாறு பொதுப்பணித்துறை அலுவலர்களுக்கு அறிவுறுத்தினார்.இந்த ஆய்வின் போது மாவட்ட வருவாய் அலுவலர் துர்காமூர்த்தி, நாமக்கல் அரசு மருத்துவ கல்லூரி முதல்வர் மரு.சாந்தா அருள்மொழி, பொதுப்பணித்துறை அலுவலர்கள் உட்பட அரசுத்துறை அலுவலர்கள் கலந்து கொண்டனர்.