சிறப்பு செய்திகள்

தேனியில் புதிய அரசு கால்நடை கல்லூரி அமைக்க முதற்கட்டமாக ரூ.94.72 கோடி நிதி ஒதுக்கீடு – துணை முதலமைச்சர் தகவல்

தேனி

தேனியில் புதிய அரசு கால்நடை கல்லூரி அமைக்க முதற்கட்டமாக ரூ.95.72 கோடிக்காக நிதி ஒதுக்கீடு செய்யப்பட்டுள்ளது என்று துணை முதலமைச்சர் ஒ.பன்னீர்செல்வம் தெரிவித்தார்.

துணை முதலமைச்சர் ஓ.பன்னீர்செல்வம் தொடர் முயற்சியால், தேனி மாவட்டம், பெரியகுளம் வட்டத்திற்குட்பட்ட தேவதானப்பட்டி அருகில் செயல்பட்டு வரும் கல்வி டிரஸ்ட் வளாகத்தில் தமிழ்நாடு கால்நடை மற்றும் விலங்கு அறிவியல் பல்கலைக்கழகத்தின் சார்பில் தற்காலிகமாக அமையவுள்ள அரசு கால்நடை கல்லூரி மற்றும் ஆராய்ச்சி நிலையம் அமைப்பதற்கான இடத்தினையும், தேனி வட்டத்திற்குட்பட்ட தாடிச்சேரி கிராமத்தில் புதிய அரசு கால்நடை கல்லூரி மற்றும் ஆராய்ச்சி நிலையம் அமைப்பதற்கான இடத்தினையும் துணை முதலமைச்சர் ஓ.பன்னீர்செல்வம் மாவட்ட ஆட்சித்தலைவர் ம.பல்லவி பல்தேவ், தமிழ்நாடு கால்நடை மருத்துவ பல்கலைக்கழக துணைவேந்தர் முனைவர் சி.பாலசந்திரன் மற்றும் பதிவாளர் பா.டென்சிங் ஞானராஜ் ஆகியோர் முன்னிலையில் பார்வையிட்டு ஆய்வு மேற்கொண்டார்.

ஆய்வுக்குப்பின் துணை முதலமைச்சர் ஓ.பன்னீர்செல்வம் தெரிவித்ததாவது:-

தேனி மாவட்டத்தில் புதிய கால்நடை மருத்துவக்கல்லூரி மற்றும் ஆராய்ச்சி நிலையம் அமைத்திட தமிழக சட்டப்பேரவையில் 110 விதியின் கீழ் அறிவிக்கப்பட்டது. பல்வேறு உயரிய கால்நடை இனங்களை தமிழகம் தன்னகத்தே கொண்டுள்ளது. தமிழகத்தில் காங்கேயம், பர்கூர், உம்பளச்சேரி, ஆலம்பாடி மற்றும் புலிக்குளம் ஆகிய ஐந்து வகையான மாட்டினங்களையும், சென்னை சிகப்பு, மேச்சேரி, திருச்சி கறுப்பு, கோயம்புத்தூர் வெள்ளை, நீலகிரி, வேம்பூர், கீழக்கரிசல், செவ்வாடு மற்றும் கச்சக்கட்டி கறுப்பு ஆகிய பத்து செம்மறி ஆட்டினங்களையும், கன்னி, கொடி மற்றும் சேலம் கறுப்பு ஆகிய மூன்று வெள்ளாட்டினங்களையும், கோம்பை, சிப்பிப்பாறை, கன்னி மற்றும் ராஜபாளையம் ஆகிய நான்கு நாய் இனங்களையும் கொண்டுள்ளது.

கால்நடை வளம் நிறைந்த தேனி மாவட்டத்தில் , 1,10,275 மாடுகள், 1,423 எருமைகள், 47,699 செம்மறி ஆடுகள், 95,388 வெள்ளாடுகள் மற்றும் 809 பன்றிகள் உள்ளன. தேனி மாவட்டத்தில் அமையப்பெற்றுள்ள பால் உற்பத்தியாளர்கள் கூட்டுறவு ஒன்றியம், அதற்குட்பட்ட பால் குளிரூட்டும் நிலையம் மற்றும் 215 மேற்பட்ட கூட்டுறவு பால் உற்பத்தியாளர் சங்கங்களின் மூலமாக இந்த மாவட்டத்தில் நாளொன்றுக்கு 1.50 இலட்சம் லிட்டர் பால் கொள்முதல் செய்யப்படுகிறது.

இவ்வாறு கால்நடை வளத்தில் சிறந்து விளங்கும் தேனி மாவட்டத்தில் கால்நடை சார்ந்த வளர்ச்சி திட்டங்களை மேலும் துரிதப்படுத்துவதற்கும், கால்நடை பண்ணையாளர்களின் வாழ்வாதாரத்தை உயர்த்தவும் தமிழக அரசு ஆறாவது கால்நடை மருத்துவக்கல்லூரி மற்றும் ஆராய்ச்சி நிலையத்தை தேனி மாவட்டத்தில் உள்ள வீரபாண்டி கிராமத்தில் ரூ.265.00 கோடி செலவில் நிறுவுவதாக அறிவித்து, அதில் முதற்கட்டமாக முதலாம் ஆண்டிற்கு ரூ.94.72 கோடிக்கான நிதியினை ஒதுக்கீடு செய்து உத்தவிட்டுள்ளது.

தமிழ்நாடு கால்நடை மருத்துவ அறிவியல் பல்கலைக்கழகத்தின் கீழ் தற்போது சென்னை , நாமக்கல் , ஒரத்தநாடு , திருநெல்வேலி. மற்றும் சேலம் ஆகிய ஐந்து கால்நடை மருத்துவக்கல்லூரி மற்றும் ஆராய்ச்சி நிலையங்கள் உள்ளன. தேனி மாவட்டத்தில் புதிய கால்நடை மருத்துவக்கல்லூரி மற்றும் ஆராய்ச்சி நிலையம் நிறுவப்படுவதால் அண்டை மாவட்டங்களான மதுரை, விருதுநகர் மற்றும் திண்டுக்கலில் உள்ள கால்நடை மற்றும் கோழியின பண்ணையாளர்களின் தேவைகளை பூர்த்தி செய்திட இயலும்.

மேலும், இக்கல்லூரி அமையவுள்ள இடம் கேரள மாநிலத்தின் எல்லையாக இருப்பதால், பால், இறைச்சி மற்றும் முட்டை பதப்படுத்துவதற்கும் விற்பனை செய்வதற்கும் ஏராளமான வாய்ப்புகள் உள்ளன.மேலும், தற்சமயம் அரசு கால்நடை கல்லூரி மற்றும் ஆராய்ச்சி நிறுவனம் தொடங்குவதற்கு தேனி மாவட்டத்தில் தனியார் கட்டடம் தேர்வு செய்யப்பட்டு, அதன்மூலம் 2020-21-ம் கல்வியாண்டிற்கான 40 மாணவ, மாணவிகள் சேர்க்கை நடைபெற அரசால் அறிவுறுத்தப்பட்டு, பெரியகுளம் வட்டத்திற்குட்பட்ட தேவதானப்பட்டி அருகில், கல்வி டிரஸ்ட் என்ற தனியார் கட்டத்தில் தொடங்கிட நடவடிக்கைகள் மேற்கொள்ளப்பட்டுள்ளது. இக்கல்லூரி கால்நடை மற்றும் கோழி வளர்ப்பில் ஆர்வமுள்ள விவசாயிகள் மற்றும் தொழில்முனைவோரின் தரமான சேவைகள் மற்றும் திறன் மேம்பாட்டுக்கு உதவும்.

இக்கல்லூரியின் கட்டடமானது, 2.5 ஏக்கர் பரப்பளவில் உள்ளது. இக்கட்டடம் மூன்றடுக்குகளை கொண்டு, போதுமான இடவசதியும் உள்ளது. அதில் நிர்வாக பகுதி, வகுப்பறைகள், ஆய்வகம், நூலகம், ஆசிரியர்கள் தனி அறை, உணவகம், வாகன நிறுத்தம் உள்ளிட்ட அடிப்படை வசதிகள் அனைத்தும் ஏற்படுத்தப்பட்டுள்ளது. மேலும், மாணவ, மாணவிகளுக்கென தனி, தனி தங்கும் விடுதி வசதிகள் ஏற்படுத்திட நடவடிக்கைகள் மேற்கொள்ளப்பட்டுள்ளது.

இக்கல்லூரியில் பயில உள்ள மாணவ, மாணவிகள் கால்நடை சார்ந்த அடிப்படை பயிற்சிகள் மேற்கொள்வதற்கு ஏதுவாக, 10 கி.மீட்டர் தொலைவில் பெரியகுளம் அரசு கால்நடை மருத்துவமனை அமைந்துள்ளது. மேலும், கற்றலுக்கு தேவையான அனைத்து கல்வி உபகரணங்கள் மற்றும் அடிப்படை வசதிகள் அனைத்தும் ஏற்படுத்தப்படவுள்ளது.

தேனி மாவட்ட மாணவ, மாணவியர்கள் மட்டுமின்றி தமிழகத்தில் உள்ள பல்வேறு மாவட்டங்களைச் சேர்ந்த மாணவ, மாணவியர்களும், பிற மாநிலங்களைச் சேர்ந்த மாணவ, மாணவியர்களும் கால்நடை மருத்துவ கல்வி பயின்று பயன்பெறும் வகையில், அரசால் ஏற்படுத்தப்பட்டுள்ள அரசு காப்பினை பெற்றுள்ளது.

இவ்வாறு துணை முதலமைச்சர் ஓ.பன்னீர்செல்வம் தெரிவித்தார்.

இந்த ஆய்வின் போது, கம்பம் சட்டமன்ற உறுப்பினர் எஸ்.டி.கே.ஜக்கையன், மாவட்ட வருவாய் அலுவலர் க.ரமேஷ், பெரியகுளம் சார் ஆட்சியர் செல்வி டி.சிநேகா, மாவட்ட ஊரக வளர்ச்சி முகமையின் திட்ட இயக்குநர் பெ.திலகவதி, தேனி அரசு கால்நடை மருத்துவக்கல்லூரி தனி அலுவலர் மரு.முருகேசன்,பெரியகுளம் வட்டாட்சியர் ரத்தினமாலா, சம்பந்தப்பட்ட துறை அலுவலர்கள் உடனிருந்தனர்.