மதுரை

வரும் சட்டமன்ற தேர்தலில் கழகத்திற்கு வாக்களிப்போம்-மதுரை மாவட்ட விவசாயிகள் உறுதி

மதுரை

வரும் சட்டமன்ற தேர்தலில் கழகத்திற்கு வாக்களிப்போம் என்று மதுரை மாவட்ட விவசாயிகள் உறுதிபட தெரிவித்தனர்.

கூட்டுறவு சங்கங்களில் விவசாயிகள் பெற்ற ரூ.12,110 கோடி பயிர்க்கடனை கடந்த 5-ந்தேதி தள்ளுபடி செய்து முதலமைச்சர் எடப்பாடி கே.பழனிசாமி அறிவிப்பு வெளியிட்டார். முதலமைச்சரின் இந்த அறிவிப்புக்கு பல்வேறு தரப்பினரும் நன்றியும், பாராட்டும் தெரிவித்து வருகின்றனர்.

மதுரை புறநகர் கிழக்கு மாவட்டம் திருப்பரங்குன்றம், மதுரை கிழக்கு, மேலூர் ஆகிய தொகுதி விவசாயிகளும் தங்களின் நீண்ட வருட கோரிக்கையை நிறைவேற்றித் தந்த முதலமைச்சருக்கு நன்றி அறிவிப்பு விழா நடத்தி வருகின்றனர். அதன்படி மதுரை கிழக்கு தொகுதியில் உள்ள கார்சேரி கிராமத்தில் முதலமைச்சரை பாராட்டி நடைபெற்ற விழாவில் மதுரை புறநகர் கிழக்கு மாவட்ட கழக செயலாளர் வி.வி.ராஜன் செல்லப்பா பங்கேற்று பேசியதாவது:-

விவசாயத்தை நாட்டின் முதுகெலும்பு என்று கூறுகிறோம். இன்றைக்கு முதலமைச்சராக இருப்பவர் ஒரு விவசாயி. வேளாண் பெருங்குடி மக்களின் மீது அக்கறை கொண்டுள்ள அம்மா அரசை தலைமை தாங்கி நடத்தி வரும் முதலமைச்சர் இடுபொருள் உதவித்தொகையாக 1,717 கோடி ரூபாயை வழங்கினார். இதன் மூலம் 16.43 லட்சம் விவசாயிகள் பயனடைந்தனர்.

கடந்த 5-ந்தேதி சட்டமன்றத்தில் 110 விதியின் கீழ் கூட்டுறவு வங்கிகளில் பயிர் கடன் பெற்ற 16.43 லட்சம் விவசாயிகளின் கடன் நிலுவை தொகையான 12,110 கோடி ரூபாய் தள்ளுபடி செய்யப்படும் என்று முதலமைச்சர் அறிவித்தார். இதன் மூலம் ஒட்டுமொத்த வேளாண் பெருங்குடி மக்கள் மிகுந்த மகிழ்ச்சி கடலில் உள்ளனர். ஆகவே வருகின்ற காலங்களில் மகத்தான ஆதரவை அம்மாவின் அரசுக்கு விவசாயிகளாகிய நீங்கள் அளிக்க வேண்டும். மீண்டும் விவசாயிகள் ஆட்சி என்ற நிலையை நீங்கள் உருவாக்க வேண்டும்.

இவ்வாறு அவர் பேசினார்.

இதனைத் தொடர்ந்து விவசாயிகள் பேசுகையில், ஒட்டுமொத்த விவசாயிகளின் பாதுகாவலராக முதலமைச்சர் திகழ்கிறார். ஒரு விவசாயி படும் பாடு இன்னொரு விவசாயியால் உணர முடியும். அதனால்தான் முதலமைச்சர் இது போன்ற திட்டங்களை அறிவித்து விவசாயிகளை காத்து வருகிறார். நிச்சயம் வருகின்ற சட்டமன்ற தேர்தலில் ஒட்டுமொத்த விவசாய மக்களாகிய நாங்கள் விவசாயிகளின் தோழன் முதலமைச்சர் எடப்பாடியார் தலைமையில் ஆட்சி மலர இரட்டை இலைக்கு வாக்களிப்போம் என்று உறுதிபட தெரிவித்தனர்.