தற்போதைய செய்திகள்

அரசு பள்ளி மாணவர்களுக்கு விலையில்லா பாடபுத்தகம் வழங்கும் திட்டம் – அமைச்சர் சேவூர் எஸ்.இராமச்சந்திரன் துவக்கி வைத்தார்

திருவண்ணாமலை

திருவண்ணாமலை மாவட்டம், ஆரணி கல்வி மாவட்டத்திற்குட்பட்ட 21697 அரசு பள்ளிமாணவர்களுக்கு விலையில்லா பாடபுத்தகம் மற்றும் புத்தகப்பை வழங்கும் திட்டத்தினை இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் துவக்கி வைத்தார்.

திருவண்ணாமலை மாவட்டம், ஆரணி கல்வி மாவட்டத்திற்குட்பட்ட அரசு பள்ளி மாணவர்களுக்கு விலையில்லா பாடபுத்தகம் மற்றும் புத்தகப்பை வழங்கும் விழா ஆரணியை அடுத்த எஸ்.வி.நகரம் அரசினர் மேல்நிலைப்பள்ளியில் நடைபெற்றது விழாவில் இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் சிறப்பு விருந்தினராக பங்கேற்று தமிழக அரசின் விலையில்லா பாடபுத்தகம் மற்றும் புத்தகப்பைகளை வழங்கி துவக்கிவைத்தார். நிகழ்ச்சிக்கு மாவட்ட ஆட்சித்தலைவர் க.சு.கந்தசாமி தலைமை தாங்கினார். செய்யாறு சட்ட மன்ற உறுப்பினர் தூசி கே.மோகன் முன்னிலை வகித்தார்.

பின்னர் அமைச்சர் சேவூர் எஸ்.இராமச்சந்திரன் செய்தியாளர்களிடம் கூறியதாவது:-

ஆரணி கல்வி மாவட்டத்தில் 437 அரசு மற்றும் அரசு நிதி உதவி பெறும் தொடக்க, நடுநிலை, உயர்நிலை மற்றும் மேல்நிலைப்பள்ளிகள் உள்ளது. இதில் 2,3,4,5,7,8 ஆகிய வகுப்புகளில் பயிலும் 21697 மாணவர்களுக்கு ரூ.45 லட்சம் மதிப்பீட்டிலும், ரூ.19 லட்சம் மதிப்பிலான புத்தகப்பையும் வழங்கப்படுகிறது. பாடபுத்தகங்களை பெற்ற மாணவர்கள் வீட்டிலுள்ள தொலைக்காட்சியில் பாடம் நடத்தப்படுவதை கவனித்து படிக்கவேண்டும். கல்வியில் புரட்சி செய்து வரும் தமிழக அரசு மாணவர்கள் கல்வி பயில பல்வேறு தொலைக்காட்சிகள் மூலம் வகுப்புக்கேற்றவாறு பாடம் நடத்த முடிவுசெய்துள்ளது.

இவ்வாறு அமைச்சர் சேவூர் எஸ்.இராமச்சந்திரன் கூறினார்.

நிகழ்ச்சியில் மாவட்ட கல்வி அலுவலர் சம்பத், அரசு வழக்கறிஞர் க.சங்கர், மாவட்ட ஆவின்தலைவர் பாரி பி.பாபு, ஒன்றிய செயலாளர் பிஆர்ஜி.சேகர், பாசறை மாவட்ட செயலாளர் ஜி.வி.கஜேந்திரன், மாவட்ட கவுன்சிலர்கள் அ.கோவிந்தராசன், வி.பி.இராதாகிருஷ்ணன், ப.திருமால், நகர செயலாளார் எ.அசோக்குமார், மேற்கு ஆரணி ஒன்றிய செயலாளர் எம்.வேலு, பள்ளியின் தலைமையாசிரியர் ரவிக்குமார் உள்ளிட்டோர் கலந்து கொண்டனர்.