தமிழகம்

பேரூராட்சி, நகராட்சி, மாநகராட்சிகளின் தனி அலுவலர்களின் பதவிக்காலம் மேலும் 6 மாதம் நீட்டிப்பு – தமிழக அரசு அவசர சட்டம்

சென்னை

இதுகுறித்து அரசு வெளியிட்டுள்ள செய்திக்குறிப்பு வருமாறு:-

2019ம் ஆண்டு டிசம்பர் திங்கள் 6 மற்றும் 11ம் தேதியிட்ட உச்சநீதிமன்ற ஆணையைத் தொடர்ந்து மறுசீரமைக்கப்பட்ட ஒன்பது மாவட்டங்களான காஞ்சிபுரம், செங்கல்பட்டு, வேலூர், திருப்பத்தூர், இராணிப்பேட்டை, விழுப்புரம், கள்ளக்குறிச்சி, திருநெல்வேலி மற்றும் தென்காசி ஆகியவற்றிலுள்ள பேரூராட்சிகள், நகராட்சிகள் மற்றும் மாநகராட்சிகளுக்கான வார்டுகளின் எல்லை வரையறை பணிகள் முழுவீச்சில் நடைபெற்றுக் கொண்டிருக்கின்றன.

மேலும், தமிழ்நாடு மாநில தேர்தல் ஆணையமானது நகர்ப்புற உள்ளாட்சித்தேர்தல்கள் நடத்தும் பொருட்டு, வாக்காளர் பட்டியல் தயாரித்தல், வாக்குச்சாவடிகள் அமைத்தல், குறிப்பேடுகளில் திருத்தம் செய்தல், மின்னணு வாக்கு பதிவு இயந்திரத்தை கையாளுவதற்கு அலுவலர்களுக்கான பயிற்சி மற்றும் இது தொடர்பான மென்பொருள் தயார் செய்தல் போன்ற முன்னேற்பாடுகளைச் செய்து கொண்டுள்ளது.

இதற்கிடையில், திடீரென்று கொரோனா தொற்று நோய் பரவிவருவதால், மத்திய, மாநில அரசுகளால் பொதுமுடக்கம் அறிவிக்கப்பட்டுள்ளது. அரசு எந்திரம் போர்க்கால அடிப்படையில் கொரோனா நோய் தடுப்பு பணிகள், பாதுகாப்பு பணிகள்,மீட்பு மற்றும் நலவாழ்வு பணிகள் ஆகியவற்றில் ஈடுபட்டுள்ளது. எனவே தமிழ்நாடு மாநில தேர்தல் ஆணையத்தால் மாண்பமை உச்சநீதிமன்ற ஆணைகளுக்கிணங்க ஊரக உள்ளாட்சி தேர்தல்களை நடத்த இயலாத சூழல் ஏற்பட்டுள்ளது.

எனவே, பேரூராட்சிகள், நகராட்சிகள் மற்றும் மாநகராட்சிகள் ஆகியவற்றின் தனி அலுவலர்களின் பதவிக்காலமானது 2020ம் ஆண்டு ஜூன் திங்கள் 30ம்தேதியன்று முடிவடைகிறது.

தனி அலுவலர்களின் பதவிக்காலத்தை 2020ம் ஆண்டு டிசம்பர் திங்கள் 31ம் தேதி வரை மேலும் ஆறு மாதங்களுக்கு நீட்டிப்பதற்காக, பேரூராட்சிகள், நகராட்சிகள் மற்றும் மாநகராட்சிகளின் தொடர்புடைய சட்டங்களை திருத்துவதென அரசானது முடிவு செய்துள்ளது. அதற்கிணங்கிய வகையில் முதலமைச்சரின் பரிந்துரையின் பேரில் ஆளுநர் 2020ம் ஆண்டு தமிழ்நாடு நகராட்சி சட்டங்கள் (மூன்றாம் திருத்த) அவசரச் சட்டத்தினை 30.06.2020 அன்று பிறப்பித்துள்ளார்.

இவ்வாறு அரசின் செய்திக்குறிப்பில் தெரிவிக்கப்பட்டுள்ளது.