தற்போதைய செய்திகள்

எஸ்.வி.சேகர் எம்.எல்.ஏ.வாக பணியாற்றியபோது வாங்கிய ஊதியத்தை திருப்பி அளிக்கத் தயாரா? அமைச்சர் டி.ஜெயக்குமார் கேள்வி

சென்னை 

மயிலாப்பூர் சட்டமன்றத்தொகுதியில் அம்மாவால் அடையாளம் காட்டப்பட்ட எஸ்.வி.சேகர். எம்.எல்.ஏ.வாக பணியாற்றியபோது வாங்கிய ஊதியத்தை திருப்பி அளிக்கத் தயாரா? என்று அமைச்சர் ஜெயக்குமார் கேள்வி எழுப்பியுள்ளார்.

சென்னையில் அண்மை கடல்பகுதிகளில் மீன்வளத்தை பெருக்கும் வகையில் தமிழ்நாடு மீன்வளத்துறை சார்பில் செயற்கை மீன் உறைவிடங்கள் அமைக்கும் திட்டத்தை மீன்வளத்துறை அமைச்சர் டி.ஜெயக்குமார் நேற்று துவக்கி வைத்தார்.

தமிழக கடற்பகுதியில் பவளப்பாறைகள் பெருமளவில் இல்லாத காரணத்தினால் மீன்கள் தங்குவதற்கும் இனபெருக்கம் செய்வதற்கும் இயலாத நிலை உள்ளது. இதற்கு தீர்வு காணும் வகையில், சதுரம், முக்கோணம் என பல்வேறு வடிவங்களில் செயற்கை பவளப்பாறைகள் கரையில் இருந்து 5 நாட்டிகல் மைல் தொலைவிலான அண்மை கடலில் ஆங்காங்கே அமைக்கப்பட்டு வருகிறது. இதன் மூலம் மீன்கள் வந்து தங்குவதற்கும், இனபெருக்கம் செய்வதற்கும் இடம் கிடைப்பதோடு, கடற்பாசி போன்ற மீன்களுக்கான உணவு உருவாக்கவும் வாய்ப்பளிக்கும். 38 கோடி மதிப்பீட்டிலான இந்த திட்டத்துக்காக தமிழக கடல் பகுதிகளில் 90 இடங்கள் தேர்வு செய்யப்பட்டுள்ளது.

சென்னையில், திருவள்ளூர் மாவட்டம், பழவேற்காடு, எண்ணுார் கடலோர பகுதிகளில், 2016-ல், ‘வர்தா’ புயல் தாக்கியது, 2017-ல், தனியார் கப்பலில் இருந்து, எண்ணெய் கசிவு ஏற்பட்டது. இவற்றால், கடலோர பகுதிகளில் மீன்வளம் கடுமையாக பாதிக்கப்பட்டுள்ளது. இதன் காரணமாக மீனவளத்தை பெருக்கும் வகையில் சென்னையின் அண்மை பகுதிகளில் செயற்கை பவளப்பாறைகள் புதைக்கும் பணிகளை மீன்வளத்துறை அமைச்சர் ஜெயக்குமார் நேற்று துவக்கி வைத்தார்.

பின்னர் செய்தியாளர்களுக்கு பேட்டி அளித்தார்.

சென்னை அண்மை கடல் பகுதிகளில் மீன்வளம் குறைந்துள்ளதால் அண்மை கடலில் மீன்பிடிக்கும் மீனவர்களின் வாழ்வாதாரம் பாதிக்கப்பட்டுள்ளது. அவர்களின் வாழ்வாதாரத்தை மீட்க செயற்கை பவள பாறைகள் அமைக்கப்படுகிறது.

மத்திய அரசின் மீன்வளத்துறை பயிற்சி மையம் மூலம் செயற்கை பவளப்பாறைகளை கடலில் போடும் திட்டத்தை மாநில அரசு இணைந்து செயல்படுத்துகிறது. இதன் மூலம் 35 ஆயிரம் நாட்டுப்படகு மீனவர்களின் வாழ்வு வளம் பெறும், இந்த திட்டத்திற்காக தமிழக அரசு ரூ 18 கோடி நிதி ஒதுக்கீடு வழங்கியிருக்கிறது. தமிழக அரசின் பல்வேறு திட்டங்களின் மூலம் தமிழகத்தில் மீன்வளம் பெருகியிருக்கிறது, ஏற்கனவே கடல் மீன்கள் உற்பத்தியில் குஜராத் முதலிடம் பெற்றிருந்தது.

இப்போது குஜராத்தை பின்னுக்கு தள்ளி விட்டு தமிழகம் 7 லட்சத்து 75 ஆயிரம் டன் அளவுக்கு மீன் உற்பத்தி மேற்கொண்டு முதலிடத்தை பிடித்துள்ளது. சென்னையை தொடர்ந்து காஞ்சிபுரம், செங்கல்பட்டு, திருவள்ளூர் கடல் பகுதிகளிலும், அதனை தொடர்ந்து நாகை, கடலூர், தஞ்சை, ராமநாதபுரம் மாவட்டங்களிலும் பவளப்பாறைகள் அமைக்கப்படவுள்ளது. இந்த பணிகள் மூன்று மாத காலத்துக்குள் முடிவடையும்.அதிமுக ஜனநாயகம் தழைத்தோங்கும் கட்சி. திமுகவை பொறுத்தவரை சர்வாதிகாரக் கட்சி. குடும்ப ராஜ்யம் உள்ள கட்சி, அந்த அதிருப்தி, குமுறலின் வெளிப்பாடாக கு.க.செல்வம் வெளியே வந்திருக்கிறார்.

தேர்தலின்போது இன்னமும் நிறைய பேர் திமுகவில் இருந்து வெளியே வருவார்கள். அதன் முதல் நபர்தான் கு.க.செல்வம் வெளியே வந்தது. எஸ்.வி.சேகர் அதிமுக கொடியிலிருந்து அண்ணாவை அகற்றி விட சொல்கிறார். இவர் மயிலாப்பூர் சட்டமன்றத்தொகுதியில் அம்மாவால் அடையாளம் காட்டப்பட்டார். மயிலாப்பூரில் அவர் அண்ணா திமுக கொடியை காண்பித்து வெற்றி பெற்றார். அப்போது அவருக்கு அதிமுகவும், அண்ணா உருவம் பொறித்த கொடியும் தேவைப்பட்டது.

உண்மையிலேயே மானம், ரோஷம் அவருக்கு இருக்குமானால் ஐந்து வருடங்கள் அதிமுக எம்.எல்.ஏ.வாக இருந்து பெற்ற சம்பளத்தை அரசுக்கு திருப்பி அனுப்ப வேண்டும். இப்போதும் முன்னாள் எம்.எல்.ஏ.வுக்கான பென்சனை எஸ்.வி.சேகர் பெற்றுக்கொண்டு இருக்கிறார். அதையும் அவர் திருப்பி கொடுக்க வேண்டும். அல்லது இனிமேல் வாங்க மாட்டேன் என்று சொல்ல வேண்டும். செய்வாரா எஸ்.வி சேகர். மேலும் அதிமுக குறித்த ஆவணங்கள் டில்லியில் இருப்பதாக அவர் கூறுவது ஆதாரமில்லாமல் விளம்பரத்திற்காக பேசும் பேச்சு. அவையெல்லாம் தமிழக மக்கள் மத்தியில் எடுபடாது.

இவ்வாறு அமைச்சர் ஜெயக்குமார் தெரிவித்தார்.