சிறப்பு செய்திகள்

தி.மு.க.வினரின் தேர்தல் நேர தில்லுமுல்லுவை முறியடிப்பீர்-தொண்டர்கள்- நிர்வாகிகளுக்கு முதலமைச்சர் வேண்டுகோள்

சென்னை

கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி தனது 5-வது கட்ட தேர்தல் பிரச்சாரத்தை கடந்த 7-ந்தேதி தொடங்கினார்.

இதுவரை திருவள்ளூர், ராணிப்பேட்டை, வேலூர், திருப்பத்தூர் ஆகிய மாவட்டங்களில் பிரச்சாரத்தை முடித்துள்ளார். நேற்று திருப்பூர் மாவட்டத்தில் முதலமைச்சர் எடப்பாடி கே.பழனிசாமி மேற்கொண்டார். செல்லும் இடமெல்லாம் மக்கள் அமோக ஆதரவு அளித்து வருகின்றனர்.

திருப்பூர் மாவட்டம், மடத்துக்குளத்தில் நடைபெற்ற இளைஞர் பாசறை, இளம்பெண்கள் பாசறை மற்றும் தகவல் தொழில்நுட்ப பிரிவு நிர்வாகிகளுடனான கலந்துரையாடல் நிகழ்ச்சியில் முதலமைச்சர் எடப்பாடி கே.பழனிசாமி ஆற்றிய உரை வருமாறு:-

அனைத்திந்திய அண்ணா திராவிட முன்னேற்றக் கழகத்தில் தகவல் தொழில்நுட்பப்பிரிவு மற்றும் கழக இளைஞர், இளம் பெண்கள் பாசறை இரண்டுமே இளஞ்சிங்கங்கள் நிறைந்த அமைப்புகள். இதய தெய்வம் புரட்சித்தலைவி அம்மா அவர்கள் இருக்கின்ற போது, கழகத்திற்கு புது ரத்தம் பாய்ச்ச வேண்டும் என்பதற்காக கழக தகவல் தொழில்நுட்பப்பிரிவு மற்றும் இளைஞர், இளம் பெண்கள் பாசறையினை தோற்றுவித்தார்கள்.

இன்றைக்கு இருப்பது விஞ்ஞான உலகம். தி.மு.கவினர் பேஸ்புக், டுவிட்டர், வாட்ஸ்ஆப் போன்ற சமூக ஊடகங்கள் வாயிலாக அவதூறு பரப்பி வருகிறார்கள். அவர்களுக்கு நமது தகவல் தொழில் நுட்ப பிரிவின் மூலம் தகுந்த பாடம் புகட்ட வேண்டும். தகவல் தொழில்நுட்பப்பிரிவு பொறுப்பாளர்கள் புதுப்புது உத்திகளை கையாண்டு கழகத்தை வெற்றி பெறச் செய்ய வேண்டும். மீண்டும் அம்மாவின் ஆட்சி தொடர, உங்களது உழைப்பைத்தாருங்கள் என்று அன்போடு கேட்டுக்கொள்கிறேன்.

வருகின்ற பொதுத்தேர்தல் முக முக்கியமானது. அம்மா அவர்களின் மறைவுக்குப் பின்னர் நாம் சந்திக்கும் முதல் தேர்தல். இந்த தேர்தலிலே நமது எதிர்க்கட்சிகள் இல்லாததை, நடந்ததைப் போல திரித்துப் பேசி, மக்களிடத்திலே செய்தி வெளியிடுவார்கள். அந்த செய்திக்கு தகுந்த பதிலைக் கொடுத்து, இந்த தேர்தலிலே நாம் வெற்றி பெற செய்ய வேண்டும்.

இளைஞர், இளம் பெண்கள் பாசறை நிர்வாகிகள் படித்தவார்கள், இளம்வயதினர். இளைஞர்கள் நினைத்தால் எதையும் சாதிக்க முடியும். சாதிக்க பிறந்தவர்கள் இந்த இளைஞர்கள். சாதிக்கப் பிறந்த இளைஞர் கூட்டங்கள் இன்றைக்கு கழகத்தின் பின்னால் அணிவகுத்து இருக்கின்றது.

தமிழகத்திலே பல கட்சிகள் இருந்தாலும், அனைத்திந்திய அண்ணா திராவிட முன்னேற்றக் கழகத்தில் தான் இளைஞர்கள் அதிகம் இருக்கின்றார்கள். உங்களது உழைப்பை அர்ப்பணிப்பு உணர்வோடு வழங்க வேண்டுமாய் அனைவரையும் மீண்டும் கேட்டுக்கொள்கிறேன்.

எதிர்கால தமிழகத்தை ஆளப்பிறந்தவர்களாக இங்கே அமர்ந்திருக்கிறீர்கள். தேர்தல் என்ற போர்களத்திலே எதிரிகளை ஓட, ஓட விரட்டுகின்ற சிப்பாய்களாக இங்கே அமர்ந்திருக்கிறீர்கள். வெற்றிக் கொடி நாட்ட வேண்டும். இன்றைக்கு தமிழ்நாட்டில் இளைஞர், இளம் பெண்கள் உறுப்பினராக அதிகம் உள்ள கட்சி கழகம். அரசு போடும் திட்டங்களை மக்களிடத்தில் எடுத்துச் செல்ல வேண்டும்.

தி.மு.க.வினர் தேர்தல் நேரத்தில் பல தில்லு முல்லுகளை செய்வார்கள். அதையெல்லாம் உங்களது அபரிவிதமான சக்தியால் முறியடிக்க வேண்டும். வருகின்ற சட்டமன்றத் தேர்தலில் பெருவாரியான வாக்குகள் வித்தியாசத்தில் வெற்றி பெற செய்து அம்மாவின் ஆட்சி தொடர துணை நிற்க வேண்டும் என்று கேட்டுக் கொள்கிறேன்.

இங்கு வருகை தந்திருக்கும் இளைஞர் பாசறை, இளம்பெண்கள் பாசறை மற்றும் தகவல் தொழில்நுட்ப பிரிவு நிர்வாகிகள் சிறப்பாக செயல்பட்டு இந்த மாவட்டத்தில் அனைத்து சட்டமன்ற தொகுதியிலும் அண்ணா தி.மு.க வெற்றி பெற்றது என்ற நிலையை உருவாக்கி தாருங்கள்.

இவ்வாறு முதலைமச்சர் எடப்பாடி கே.பழனிசாமி பேசினார்.