சிறப்பு செய்திகள்

ராமர் கோயில் கட்ட அடிக்கல் நாட்டிய பிரதமருக்கு துணை முதலமைச்சர் வாழ்த்து

சென்னை

ராமர் கோயில் கட்ட அடிக்கல் நாட்டிய பிரதமர் மோடிக்கு துணை முதலமைச்சர் ஓ.பன்னீர்செல்வம் வாழ்த்தும், நன்றியும் தெரிவித்துள்ளார்.

இது குறித்து துணை முதலமைச்சர் ஓ.பன்னீர்செல்வம் வெளியிட்டுள்ள அறிக்கை வருமாறு:

மனிதன் எப்படி வாழ வேண்டும் என்பதை மக்களுள் ஒருவராக மானிட அவதாரமெடுத்து அறவாழ்வு நெறிமுறைகளை இந்த உலகுக்கு உணர்த்திய திருமாலின் அவதாரமான ஸ்ரீ ராமபிரான் அவதரித்த அயோத்தியில் ஸ்ரீ ராமர் கோயில் அமைந்திட, நமது பாரதப் பிரதமர் நரேந்திர மோடி நேற்று மிகச்சிறப்பாக பூமி பூஜையை முன்னின்று நடத்தி அடிக்கல் நாட்டியது, இந்தியத் திருநாட்டில் வாழும் இந்துக்களுக்கு மட்டுமல்ல, உலகெங்கிலும் வாழும் பல கோடி மக்களின் இதயங்களை அளவில்லா மகிழ்ச்சியில் திளைக்கச் செய்து கொண்டிருக்கிறது.

காப்பியப் புலவர் இளங்கோவடிகளால் துதிக்கப்பட்ட ஸ்ரீ ராமபிரானுக்கு ஆலயம் அமைத்திட வேண்டுமென்று 1992-ம் ஆண்டு தேசிய ஒருமைப்பாட்டு கவுன்சில் கூட்டத்திலேயே முழங்கி, கோடிக்கணக்கான மக்களின் எண்ணத்தை எதிரொலித்தவர் புரட்சித்தலைவி அம்மா அவர்கள்.

புரட்சித்தலைவி அம்மா அவர்களின் சிந்தனை செயலாகும் வகையிலும், அனைத்து தரப்பு மக்களாலும் ஏற்றுக்கொள்ளப்பட்டு வரவேற்கத்தக்க வகையிலும் உச்ச நீதிமன்றம் வழங்கிய வரலாற்றுச் சிறப்புமிக்க தீர்ப்பின் அடிப்படையில் அயோத்தியில், ஸ்ரீ ராமர் கோயில் கட்டுவதற்கான பூமி பூஜை விழாவில், நேற்று பங்கேற்று அடிக்கல் நாட்டிய பாரதப் பிரதமர் மோடிக்கு எனது நெஞ்சார்ந்த வாழ்த்துக்களையும், நன்றியையும் தெரிவித்துக் கொள்கிறேன்.