கன்னியாகுமரி

கொரோனாவால் சிகிச்சை பெற்றுவருபவர்களுக்கு நோய் எதிர்ப்பு சக்தியை அதிகரிக்க, மூலிகை கலந்த உயர்ரக மீன் குழம்பு சாப்பாடு – என்.தளவாய் சுந்தரம் வழங்கினார்

கன்னியாகுமரி

கன்னியாகுமரி மாவட்டம், நாகர்கோவில், ஆசாரிப்பள்ளம் அரசு மருத்துவக்கல்லூரி, மருத்துவமனை மற்றும் தக்கலை அரசு தலைமை மருத்துவமனையில், கொரோனாவால் பாதிக்கப்பட்டு, சிகிச்சை பெற்றுவரும் 650 நோயாளிகளுக்கு, நோய் எதிர்ப்பு சக்தியை அதிகரிக்க, மூலிகை கலந்த உயர்ரக மீன் குழம்பு சாப்பாடுகளை, தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் வழங்கினார்.

நாகர்கோவில், ஆசாரிப்பள்ளம் அரசு மருத்துவக்கல்லூரி, மருத்துவமனை மற்றும் தக்கலை அரசு தலைமை மருத்துவமனையில், கொரோனா நோயால் பாதிக்கப்பட்ட, சுமார் 650- க்கும் மேற்பட்ட நோயாளிகள் சிகிச்சை பெற்று வருகிறார்கள். தமிழக சுகாதாரத்துறை அறிவுறுத்தலின்படி, பாதிக்கப்பட்ட நோயாளிகளுக்கு, அவர்களின் உடலில் நோய் எதிர்ப்பு சக்தியை அதிகரித்திடும் வகையில், மருந்துகள் வழங்கப்பட்டு, சிகிச்சைகள் அளிக்கப்பட்டு வருகிறது.

மேலும், நோயாளிகளுக்கு நோய் எதிர்ப்பு சக்தியை அதிகரிப்பதற்கு ஆரோக்கியமான உணவுகள் வழங்கிடும் வகையில், உடலில் நோய் எதிர்ப்பு சக்தியை உருவாக்கிடும் மஞ்சள், இஞ்சி, பூண்டு, மிளகு, மல்லி, சீரகம், வெந்தயம் உள்ளிட்ட பொருட்களோடு, மூலிகைகளும் சேர்க்கப்பட்டு, உயர்ரக மீன் குழம்பு தயாரிக்கப்பட்டு, நோயாளிகளுக்கு வழங்கப்படுகிறது.

கன்னியாகுமரி மாவட்ட உணவு பாதுகாப்பு அலுவலர் செந்தில்குமார் மேற்பார்வையில், ஹோட்டல் உரிமையாளர் சங்கத்தலைவர் ஷாஜகான், ஹோட்டல் உரிமையாளர் சங்க நிர்வாகிகள்ஆனந்தன், ரமேஷ், தாழக்குடி நீலகண்டன் மற்றும் சமையல் வல்லுநர்கள் ஆகியோர் கன்னியாகுமரி பேரூர் கழக செயலாளர் வின்ஸ்டன் – உடன் இணைந்து, சின்னமுட்டம் மீன்பிடித்துறைமுகத்திலிருந்து, உயர்ரக மீன்கள் கொண்டுவரப்பட்டு, மூலிகைகள் மற்றும் நோய் எதிர்ப்பு பொருட்கள் சேர்க்கப்பட்டு, உயர்ரக மூலிகை மீன் குழம்பு தங்கவேல் திருமண மண்டபத்தில் வைத்து தயாரிக்கப்பட்டு, சிறிய கண்டெய்னர்களில் பார்சல் செய்யப்பட்டு, கொரோனா நோயாளிகளுக்கு வழங்கப்படுகிறது.

இந்நிகழ்வில், மாவட்ட ஆவின் பெருந்தலைவர் எஸ்.ஏ.அசோகன், மாவட்ட கூட்டுறவு ஒன்றியப் பெருந்தலைவர் எஸ்.கிருஷ்ணகுமார், தமிழ்நாடு மாநில சிறுபான்மையினர் நல ஆணைய உறுப்பினர் அ.ராஜன், முன்னாள் எம்.எல்.ஏ., மாவட்ட உணவு பாதுகாப்பு அலுவலர்கள், மு.குமாரப்பாண்டியன், சங்கரன் நாராயணன், அறங்காவலர் குழு உறுப்பினர் எம்.ஜெயசந்திரன் (எ) சந்துரு மற்றும் பலர் கலந்து கொண்டனர்.