தற்போதைய செய்திகள்

அரசு அலுவலர்கள், பணியாளர்கள் சிறப்பாக பணியாற்றி வருகிறார்கள் – அமைச்சர் சேவூர் எஸ்.இராமச்சந்திரன் பாராட்டு

திருவண்ணாமலை

திருவண்ணாமலை மாவட்டத்தில் கொரோனா தடுப்பு பணிகளை அரசு அலுவலர்கள் சிறப்பாக பணியாற்றுகின்றனர் என்று இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் பாராட்டை தெரிவித்தார்.

திருவண்ணாமலை மாவட்டம், ஆரணி ஏ.சி.எஸ். கல்லூரி வளாக கூட்ட அரங்கில் மாவட்டத்தில்கொரோனா வைரஸ் நோய் தொற்று பரவாமல் இருப்பதற்காக மேற்கொள்ளப்பட்டு வரும் பணிகள் குறித்த விரிவான ஆய்வுக் கூட்டம் இந்து சமயம் மற்றும் அறநிலையத் துறை அமைச்சர் சேவூர் எஸ்.இராமச்சந்திரன் தலைமையில் நடைபெற்றது. இக்கூட்டத்தில், மாவட்ட ஆட்சித் தலைவர் க.சு.கந்தசாமி, செய்யாறு சட்டமன்ற உறுப்பினர் தூசி கே.மோகன், ஆகியோர் முன்னிலை வகித்தனர்.

நிகழ்ச்சியில் அமைச்சர் சேவூர் எஸ்.இராமச்சந்திரன் பேசியதாவது:-

திருவண்ணாமலை மாவட்டத்தில் கடந்த 5 மாதங்களாக கொரோனா வைரஸ் தடுப்பு பணிகளில் சுகாதாரத் துறை, வருவாய்த் துறை, காவல் துறை, உள்ளாட்சித் துறை ஆகிய துறைகளின் அலுவலர்கள் மற்றும் பணியாளர்கள் இரவு, பகல் பாராமல் 24 மணி நேரமும் சிறப்பாக பணியாற்றி வருகிறார்கள். முதலமைச்சர் எடப்பாடி கே.பழனிசாமி தமிழ்நாட்டில் கொரோனா தடுப்பு பணிகளை சிறப்பாக மேற்கொண்டு வருகிறார்.

இந்தியாவிலேயே தமிழகம் கொரோனா தடுப்பு பணிகளில் முதன்மை மாநிலமாக விளங்குகிறது. தமிழகத்திலேயே திருவண்ணாமலை மாவட்டத்தில் இறப்பு விகிதம் குறைவாக உள்ளது. கொரோனா தடுப்பு பணிகளில் தங்களை முழுமையாக ஈடுபடுத்தி பணியாற்றி வரும் அனைத்து அரசு அலுவலர்கள் மற்றும் பணியாளர்களுக்கு எனது பாராட்டினை தெரிவித்துக் கொள்கிறேன்.

இவ்வாறு அமைச்சர் சேவூர் எஸ்.இராமச்சந்திரன் பேசினார்.

பின்னர் மாவட்ட ஆட்சியர் க.சு.கந்தசாமி பேசியதாவது:-

திருவண்ணாமலை மாவட்டத்தில் கடந்த 04.08.2020 வரை 95,430 மாதிரிகள் எடுக்கப்பட்டு, பரிசோதனை மேற்கொண்டு 93,269 முடிவுகள் பெறப்பட்டுள்ளது. மேலும், 2161 பரிசோதனை முடிவுகள் வரவேண்டியுள்ளது. கொரோனா பரிசோதனை முடிவுகளின் அடிப்படையில் 6793 நபர்களுக்கு தொற்று உறுதி செய்யப்பட்டுள்ளது.

இதுவரை 4453 நபர்கள் சிகிச்சை முடிந்து வீட்டிற்கு அனுப்பி வைக்கப்பட்டுள்ளனர், 73 நபர்கள் இறந்துள்ளார்கள், 2267 நபர்கள் பல்வேறு அரசு மருத்துவமனைகளில் தற்போது தொடர் சிகிச்சை மேற்கொண்டு வருகிறார்கள். மாவட்டத்தில் உள்ள அரசு மருத்துவக் கல்லூரி மருத்துவமனை, அரசு மருத்துவமனைகள், அரசு ஆரம்ப சுகாதார நிலையங்கள் உட்பட அனைத்து மருத்துவமனைகளிலும் 1924 படுக்கைகள் உள்ளன, இதில் தற்போது 1115 படுக்கைளில் நோயாளிகளுக்கு சிகிச்சை அளிக்கப்பட்டு வருகிறது, 809 படுக்கைகள் காலியாக உள்ளது.

இவற்றில், திருவண்ணாமலை அரசு மருத்துவக் கல்லூரி மற்றும் மருத்துவமனை, செய்யாறு தலைமையிட அரசு மருத்துவமனைகளில் 31 Ventilator படுக்கை வசதி உள்ளது. மேலும், மாவட்டத்தில் ICU வார்டுகளில் 62 படுக்கை வசதியும், 244 படுக்கைகளில் ஆக்ஸிஜன் வசதியும், 1618 படுக்கைள் சாதாரான படுக்கை வசதியுடன் நோயாளிகளுக்கு சிகிச்சை அளிக்கப்பட்டு வருகிறது.

இவ்வாறு மாவட்ட ஆட்சியர் க.சு.கந்தசாமி பேசினார்.

நிகழ்ச்சியில் செய்யாறு வருவாய் கோட்ட அலுவலர் கமலா, துணை இயக்குநர் சுகாதாரப் பணிகள் மருத்துவர் அஜீதா, உதவி ஆட்சியர் (பயிற்சி) அமித்குமார், துணை ஆட்சியர் (பயிற்சி) அஜீதாபேகம் மற்றும் அரசு அலுவலர்கள் கலந்து கொண்டனர்.