தற்போதைய செய்திகள்

விழுப்புரத்தில் 1635 பேருக்கு இலவச வீட்டுமனை பட்டாக்கள்-அமைச்சர் சி.வி.சண்முகம் வழங்கினார்

விழுப்புரம்

விழுப்புரம் மாவட்டம், மரக்காணம், வானூர், விழுப்புரம் உள்ளிட்ட பகுதிகளில் இருந்து வருவாய் மற்றும் பேரிடர் மேலாண்மைத்துறை சார்பாக ஒருங்கிணைந்த சிறப்பு வரன்முறை திட்டத்தின் கீழ் ஆட்சேபகரமற்ற அரசு புறம்போக்கு நிலங்களில் நீண்ட காலமாக உள்ள குடியிருப்பு ஆக்ரமணங்களை வரன்முறைப்படுத்தி தமிழ்நிலம் இணைய முகப்பு வாயிலாக இணைய வழி இலவச வீட்டு மனைப்பட்டாக்களை ஏழை எளிய வீட்டுமனையற்ற 1635 பயனாளிகளுக்கு ரூ.9,33,90,537 மதிப்பீட்டிலான நிலப்பட்டாக்களை சட்டம், நீதிமன்றங்கள், சிறைச்சாலைகள் மற்றும் கனிமவளத்துறை அமைச்சர் சி.வி.சண்முகம் வழங்கினார்.

ஆட்சேபகரமற்ற அரசு புறம்போக்கு நிலங்களில் நீண்டகாலமாக உள்ள குடியிருப்பு ஆக்ரமணங்களை வரன்முறைப்படுத்தி, ஏழை எளிய மக்களுக்கு இலவச வீட்டுமனைப்பட்டா வழங்கிட ஒருங்கிணைந்த சிறப்பு வரன்முறைத் திட்டம், அம்மா அவர்கள் வழியில் செயல்படும் தமிழ்நாடு அரசால் சீரிய முறையில் செயல்படுத்தப்பட்டு வருகிறது.

இத்திட்டத்தின் கீழ்,தமிழகம் முழுவதும் ஆட்சேபகரமற்ற புறம்போக்கு நிலங்களில் உள்ள குடியிருப்பு ஆக்ரமணங்களை கண்டறியப்பட்டு முதற்கட்டமாக தகுதியுள்ள 55,000 பயனாளிகள் தேர்வு செய்யப்பட்டு அப்பயனாளிகளுக்கு இலவச வீட்டுமனைப்பட்டா வழங்கும் விதமாக முதலமைச்சர் 13.02.2021 அன்று தலைமைச்செயலகத்தில் துவக்க நிகழ்வாக 9 பயனாளிகளுக்கு தமிழ் நிலம் இணைய முகப்பு வாயிலாக இணைய வழி வீட்டுமனைப்பட்டாக்களை வழங்கி துவக்கி வைத்தார்.

அதன் தொடர்ச்சியாக நேற்று விழுப்புரம் மாவட்டம் மரக்காணம் அரசு மேல்நிலைப்பள்ளியில் மரக்காணம் வட்டத்திற்குட்பட்ட 895 பயனாளிகளுக்கும், வானூர் வட்டம் திருச்சிற்றம்பலம் கூட்ரோட்டில் வானூர் வட்டத்திற்குட்பட்ட 182 பயனாளிகளுக்கும், விழுப்புரம் மாவட்ட ஆட்சியர் பெருந்திட்ட வளாக மைதானத்தில் விழுப்புரம், விக்கிரவாண்டி, திருவெண்ணெய்நல்லூர்,

கண்டாச்சிபுரம் வட்டத்திற்குட்பட்ட 558 பயனாளிகள் என மொத்தம் 1635 வீட்டுமனையற்ற ஏழை எளிய பயனாளிகளுக்கு ரூ.9,33,90,537 மதிப்பிலான நிலங்களை வருவாய் மற்றும் பேரிடர் மேலாண்மைத்துறை சார்பாக ஒருங்கிணைந்த சிறப்பு வரன்முறை திட்டத்தின் கீழ் ஆட்சேபகரமற்ற அரசு புறம்போக்கு நிலங்களில் நீண்டகாலமாக உள்ள குடியிருப்பு ஆக்ரமணங்களை வரன்முறைப்படுத்தி தமிழ் நிலம் இணையமுகப்பு வாயிலாக இணையவழி இலவச வீட்டுமனைப்பட்டாக்களை சட்டம், நீதிமன்றங்கள், சிறைச்சாலைகள் மற்றும் கனிமவளத்துறை அமைச்சர் சி.வி.சண்முகம் வழங்கினார்.

இதனை தொடர்ந்து மாவட்ட ஆட்சியர் அலுவலக கூட்டரங்கில் மாற்றுத்திறனாளிகள் நலன் மற்றும் பொதுநிதி திட்டத்தின் கீழ் செவித்திறன் பாதிக்கப்பட்ட மற்றும் பார்வைத்திறன் பாதிக்கப்பட்ட மாற்றுத்திறனாளிகளுக்கு தலா ரூ.12,799 வீதம் 101 பயனாளிகளுக்கு ரூ.12,92,699 மதிப்பீட்டில் தக்க செயலிகளுடன் கூடிய திறன் பேசிகளை அமைச்சர் சி.வி.சண்முகம் வழங்கினார்.