தற்போதைய செய்திகள்

ரூ.30 லட்சம் மதிப்பீட்டில் பல்வேறு புதிய கட்டடங்கள்-அமைச்சர் கே.டி.ராஜேந்திரபாலாஜி பூமிபூஜை

விருதுநகர்

சிவகாசி சட்டமன்ற உறுப்பினர் தொகுதி மேம்பாட்டு நிதியில் இருந்து ரூ.30 லட்சம் மதிப்பீட்டில் திருத்தங்கல் நகராட்சியில் புதிய கட்டடங்கள் கட்டும் பணியை அமைச்சர் கே.டி.ராஜேந்திரபாலாஜி நேற்று பூமிபூஜை செய்து தொடங்கி வைத்தார்.

விருதுநகர் மாவட்டம், சிவகாசி சட்டமன்றத் தொகுதியில் ஏராளமான வளர்ச்சி திட்டப் பணிகளை பால்வளத்துறை அமைச்சர் கே.டி.ராஜேந்திரபாலாஜி தொடங்கி வைத்தும், முடிவுற்ற பணிகளை திறந்து வைத்தும் வருகிறார்.

இந்த நிலையில் சிவகாசி தொகுதி சட்டமன்ற உறுப்பினர் தொகுதி மேம்பாட்டு நிதியில் ரூ.30 லட்சம் மதிப்பீட்டில் திருத்தங்கல் நகராட்சியில் புதிய கட்டடங்கள் கட்டும் பணியை நேற்று அமைச்சர் ராஜேந்திர பாலாஜி பூமிபூஜை செய்து தொடங்கி வைத்தார்.

அதன்படி திருத்தங்கல் நகராட்சி 4-வது வார்டு முத்துமாரியம்மன் காலனி இந்து புதிரை வண்ணார் தெருவில் ரூ.8 லட்சம் மதிப்பீட்டில் புதிய கலையரங்கம், 4-வது வார்டு முத்துமாரியம்மன் காலனி அருந்ததியர் தெருவில் ரூ.8 லட்சம் மதிப்பீட்டில் புதிய கலையரங்கம், திருத்தங்கல் நகராட்சி 9 மற்றும் 10 வது வார்டில் உள்ள இந்திரா நகரில் ரூ.7 லட்சம் மதிப்பீட்டில் புதிய அம்மா மினி கிளினிக் கட்டடம்,

திருத்தங்கல் நகராட்சி 5 வது வார்டு முருகன் காலனி கவிதா நகரில் ரூ.7 லட்சம் மதிப்பீட்டில் அம்மா மினி கிளினிக் கட்டுவதற்கான கட்டுமான பணிகள் என ரூ. 30 லட்சம் மதிப்பீட்டில் புதிய கட்டடங்கள் கட்டுமான பணிகளை அமைச்சர் ராஜேந்திரபாலாஜி தொடங்கி வைத்தார்.