தற்போதைய செய்திகள்

கச்சத்தீவை 100 நாளில் மீட்டுத்தர முடியுமா?ஸ்டாலினுக்கு, வி.வி.ராஜன் செல்லப்பா எம்.எல்.ஏ கேள்வி

மதுரை

இலங்ககை்கு தி.மு.க.வால் தாரை வார்க்கப்பட்ட, கச்சத்தீவை 100 நாளில் மீட்டுத்தர முடியுமா? என்று ஸ்டாலினுக்கு, வி.வி.ராஜன் செல்லப்பா எம்.எல்.ஏ கேள்வி எழுப்பி உள்ளார்.

மதுரை வடக்கு தொகுதியில் ரூ.1 கோடி மதிப்பீட்டில் முடிக்கப்பட்ட திட்டப்பணிகளை சட்டமன்ற உறுப்பினர் வி.வி. ராஜன்செல்லப்பா திறந்து வைத்தார். மாவட்ட ஆட்சித்தலைவர் அன்பழகன், மாநகராட்சி ஆணையாளர் விசாகன், பகுதி கழக செயலாளர் ஜெயவேல், மாவட்ட இளைஞரணி செயலாளர் வக்கீல் ரமேஷ், திருப்பரங்குன்றம் ஒன்றிய கழக செயலாளர் நிலையூர் முருகன், மாவட்ட கழக பொருளாளர் அம்பலம், வட்டக் கழக செயலாளர்கள் தங்கபாண்டியன், ஆறுமுகம், வெங்கடாசலம், காஜா, மணி, ஜெயராஜ் உட்பட பலர் கலந்து கொண்டனர்.

இந்நிகழ்ச்சியில் வி.வி.ராஜன்செல்லப்பா எம்.எல்.ஏ பேசியதாவது:-

தி.மு.க. தலைவர் ஸ்டாலின் 100 நாட்களில் மக்களின் குறைகளை தீர்ப்பேன் கூறுகிறார். திமுக ஆட்சி காலத்தில் இலங்கைக்கு தாரை வார்க்கப்பட்ட கச்சத்தீவை 100 நாட்களில் ஸ்டாலின் மீட்டு தருவாரா?மதுரை தொகுதிக்கு வந்த கனிமொழி இந்த வடக்கு தொகுதியில் சாலைகள் போடப்படவில்லை என்று பொய்யான தகவலை கூறியுள்ளார்.

வடக்கு தொகுதியில் அனைத்து சாலைகளும் போடப்பட்டுள்ளன. குறுக்கு சாலைகளோடு, பேவர் பிளாக் சாலைகள் போடப்பட்டுள்ளன. எதையும் ஆராயாமல் பேசக்கூடாது என்பதை வடக்கு தொகுதி மக்கள் சார்பில் கனிமொழிக்கு கூறுகிறேன்.

பொதுவாக ஒரு அரசு விழா நடைபெறுகிறது என்றால் அதில் அந்த மாவட்டத்தில் உள்ள அனைத்து சட்டமன்ற உறுப்பினர்கள் பங்கேற்பார்கள். அந்த அடிப்படையில் மதுரை கிழக்கு, திருப்பரங்குன்றம் ஆகிய தொகுதியில் அந்த தொகுதியில் உள்ள ஊராட்சி மன்ற தலைவர்கள் அழைப்பின் பேரில் அம்மா மினி கிளினிக் திறப்பு விழாவில் பங்கேற்றேன்.

இன்றைக்கு மதுரை கிழக்குத் தொகுதியில் 5 அம்மா மினி கிளினிக், அதேபோல் திருப்பரங்குன்றம் தொகுதியில் 5 அம்மா மினி கிளினிக் திறக்கப்பட்டுள்ளது. இதில் திமுக சட்டமன்ற உறுப்பினர்கள் பங்கேற்கவில்லை. முதலமைச்சர் எந்த திட்டம் கொண்டு வந்தாலும் அதை தடுக்கும் நோக்கத்துடன் தான் எதிர்க்கட்சியினர் செயல் படுகின்றனர்.

இவ்வாறு வி.வி.ராஜன்செல்லப்பா எம்.எல்.ஏ பேசினார்.