தற்போதைய செய்திகள்

3356 பெண்களுக்கு ரூ.24.14 கோடியில் தாலிக்கு தங்கம் – அமைச்சர் திண்டுக்கல் சி.சீனிவாசன் வழங்கினார்

திண்டுக்கல்

திண்டுக்கல்லில் நடைபெற்ற நிகழ்ச்சியில் 3,356 பெண்களுக்கு ரூ.13.94 கோடி திருமண நிதியுதவி, ரூ.10.20 கோடி மதிப்பில் தாலிக்கு தங்கம், 1025 பயனாளிகளுக்கு விலையில்லா வீட்டுமனை பட்டாக்கள் வழங்கும் பணியை வனத்துறை அமைச்சர் திண்டுக்கல் சி.சீனிவாசன் தொடங்கி வைத்து பேசியதாவது:-

புரட்சித்தலைவி அம்மா அவர்கள் மக்கள் நலன் ஒன்றையே குறிக்கோளாக வைத்து ஏழை எளியோர், ஆதரவற்றோர் என சமுதாயத்தில் அடித்தட்டு, மக்களுக்கும் பல்வேறு நலத்திட்டங்களை அறிவித்து சிறப்பாக செயல்படுத்தினார். அம்மா வழியில் செயல்பட்டு கொண்டிருக்கும் முதலமைச்சர் எடப்பாடி கே.பழனிசாமி, அம்மா செயல்படுத்திய அனைத்து திட்டங்களையும் தொடர்ந்து செயல்படுத்தி வருகிறார்.

பெண்களுக்கு புதிதாக பல்வேறு நலத்திட்டங்களை அறிவித்து, அத்திட்டங்கள் அனைத்தும் அனைத்துத் தரப்பு மக்களுக்கும் கிடைக்க செய்யும் வகையில், ஒரு சிறப்பான நிர்வாகத்தை தமிழகத்தில் ஏற்படுத்தியுள்ளார்.

பெண்களுக்காக, மகப்பேறு நிதியுதவி திட்டம், கர்ப்பிணி தாய்மார்களுக்கு அரசு சார்பில் சமுதாய வளைகாப்பு, நல்ல ஆரோக்கியமான குழந்தைகளை பெறுவதற்கு கர்ப்ப காலத்தில் பெண்களுக்கு அம்மா தாய் சேய் நலப்பெட்டகம், குழந்தை பிறந்த பின்பு குழந்தைகளுக்கு அம்மா குழந்தைகள் நல பரிசு பெட்டகம், பணிபுரியும் மகளிருக்கு 9 மாதங்கள் மகப்பேறு விடுப்பு வழங்கும் திட்டம்,

பெண் குழந்தை பாதுகாப்புத் திட்டம், தொட்டில் குழந்தை திட்டம், சானிட்டரி நாப்கின் வழங்கும் திட்டம், மகளிர் சுய உதவிக்குழுக்களுக்கு சிறு தொழில் தொடங்க வங்கிக் கடனுதவி, விலையில்லா கறவை மாடு, விலையில்லா 4 வெள்ளாடுகள், உழைக்கும் மகளிருக்கு அம்மா இரு சக்கர வாகனம் வழங்கும் திட்டம், என மகளிருக்காக பல்வேறு திட்டங்கள் தொடர்ந்து செயல்படுத்தப்பட்டு வருகிறது. இந்தியாவிலேயே மற்ற மாநிலங்களில் இல்லாத அளவிற்கு தமிழகத்தில் தான் பெண்களுக்காக பல்வேறு நலத்திட்டங்கள் செயல்படுத்தப்பட்டு வருகின்றன.

அப்படிப்பட்ட திட்டங்களில் ஒன்றான அம்மா அவர்களால் அறிவிக்கப்பட்டு சிறப்பாக செயல்படுத்தப்பட்டு வரும் ஏழை எளிய பெண்களுக்கான திருமண நிதியுதவியுடன் கூடிய தாலிக்கு தங்கம் வழங்கும் திட்டமும் பெண்களிடையே மிகுந்த வரவேற்பை பெற்றுள்ளது. பெண் கல்வியை ஊக்கப்படுத்த வேண்டும் என்ற மிக உயரிய நோக்கத்தில் இத்திட்டத்தின் கீழ் பயன்பெறுபவர்கள் குறைந்தபட்சம் 10-ம் வகுப்பு மற்றும் பட்டயப்படிப்பு பெற்றிருக்க வேண்டும் என்ற அடிப்படை தகுதியை உருவாக்கியுள்ளனர்.

இதன் மூலம் தமிழகத்தில் பட்டப்படிப்பு வரை கற்க வேண்டும் என்ற ஆர்வத்தை பெண்களிடையே ஏற்படுத்தியுள்ளது. அம்மா அவர்கள் ஏழை பெண்கள் திருமணத்திற்கு 4 கிராம் தங்கம் வழங்கியதை 8 கிராம் தங்கமாக உயர்த்தி வழங்க ஆணையிட்ட பின்னர், முதலமைச்சர் எடப்பாடி கே.பழனிசாமி இந்த திட்டத்தை தொடர்ந்து செயல்படுத்தி வருகிறார்.

திண்டுக்கல் மாவட்டம் முழுவதும், தற்போது பெறப்பட்டுள்ள மனுக்களின்படி 2,221 பட்டதாரி பெண்களுக்கும், 10-ம் வகுப்பு வரை படித்த 1,135 பெண்களுக்கும் என மொத்தம் 3,356 பெண்களுக்கு திருமண நிதியுதவி ரூ.13.94 கோடி மற்றும் தாலிக்கு தங்கம் ரூ.10.20 கோடி மதிப்பில் 26.848 கிலோ தங்கம் வழங்கப்பட உள்ளது.

அரசு புறம்போக்கு நிலத்தில் 5 ஆண்டுகளுக்கு மேல் வசிக்கும் ஏழை எளிய மக்களுக்கு இலவச வீட்டுமனை பட்டா வழங்க முதலமைச்சர் எடப்பாடி கே.பழனிசாமி உத்தரவிட்டுள்ளார். அதனடிப்படையில், திண்டுக்கல் மாவட்டம் முழுவதும் 1025 நபர்களுக்கு விலையில்லா வீட்டுமனைப்பட்டா வழங்கப்பட உள்ளது. இன்றைய விழாவில் திண்டுக்கல் பகுதியில் உள்ள 370 பயனாளிகளுக்கு விலையில்லா வீட்டுமனைப்பட்டா வழங்கப்பட்டுள்ளது. மேலும் தகுதியானவர்களுக்கு இலவச வீட்டுமனைப் பட்டா வழங்க நடவடிக்கை மேற்கொள்ளப்பட்டு வருகிறது.

இவ்வாறு அமைச்சர் திண்டுக்கல் சி.சீனிவாசன் பேசினார்.