சிறப்பு செய்திகள்

2,725 பயனாளிகளுக்கு ரூ.9.16 கோடியில் நலத்திட்ட உதவிகள்-துணை முதலமைச்சர் வழங்கினார்

தேனி

தேனி மாவட்டம் பெரியகுளம், ஆண்டிப்பட்டி மற்றும் கம்பம் தொகுதியில் 2725 பயனாளிகளுக்கு ரூ.9.16 கோடியில் நலத்திட்ட உதவிகளை துணை முதலமைச்சர் ஓ.பன்னீர்செல்வம் வழங்கினார்.

துணை முதலமைச்சர் ஓ.பன்னீர்செல்வம் தேனி மாவட்டம், பெரியகுளம், ஆண்டிபட்டி மற்றும் கம்பம் ஆகிய சட்டமன்ற தொகுதிகளுக்குட்பட்ட பகுதிகளில் நேற்று மாவட்ட ஆட்சித்தலைவர் ம.பல்லவி பல்தேவ் தலைமையில் நடைபெற்ற அரசு விழாக்களில், வருவாய் மற்றும் பேரிடர் மேலாண்மைத்துறை, சமூக நலத்துறை, கால்நடை பராமரிப்புத்துறை, மாற்றுத்திறனாளிகள் நலத்துறை ஆகிய துறைகளின் சார்பில் தமிழக அரசின் நலத்திட்ட உதவிகளை வழங்கி பேசியதாவது:-

அம்மா அவர்கள் 2011-ம் ஆண்டு முதல் தமிழக மக்கள் வாழ்விற்கு எண்ணற்ற மக்கள் நலத்திட்டங்களை நீண்ட காலத்திற்கு பயன்தரும் வகையில் தொலைநோக்கு பார்வையுடன் திட்டங்களின் பயன் நேரடியாக பொதுமக்களை சென்றடையும் வண்ணம் திறம்பட சிறப்பான ஆட்சியினை செய்தார்.

அதனைத்தொடர்ந்து, அம்மா அவர்கள் காட்டிய வழியில் செயல்பட்டு வருகின்ற தமிழக அரசு அம்மா அவர்கள் செயல்படுத்திய திட்டங்கள் மட்டுமல்லாமல் தொடர்ந்து புதிதாகவும் பல்வேறு திட்டங்களை தீட்டி செயல்படுத்தப்பட்டு வருகிறது.

அம்மா அவர்களின் தமிழக அரசு சமூகத்தில் வாழுகின்ற மக்களுக்கு பாதுகாப்பு அளிக்கின்ற வகையில் சமூக பாதுகாப்புத் திட்டங்கள் செயல்படுத்தப்பட்டு, அவர்களின் வாழ்வை வளம் பெறச் செய்து வருகிறது. தனிநபர் வருமானத்தை பெருக்குவதினால் குடும்ப பொருளாதாரம் உயரும், குடும்பப் பொருளாதாரம் உயர்ந்தால் ஒரு கிராமத்தின் பொருளாதாரமும், அதன் மூலம் மாநிலத்தின் பொருளாதாரமும் முன்னேற்றம் அடையும் என்பதனை கருத்தில் கொண்டு தனிநபர் பயன்பெறும் வகையில் திட்டங்கள் செயல்படுத்தப்பட்டு வருகிறது.

தமிழக அரசால் செயல்படுத்தப்பட்டு வரும் ஒவ்வொரு திட்டங்களின் கீழ் அனைத்து தரப்பு மக்களும் பயன்பெற்று வருகின்றனர். மேலும், தமிழக மக்களிடமிருந்து பெறப்படும் வருவாயினை அரசுத்திட்டங்களின் மூலம் வழங்கிட வேண்டும் என்பதனை கருத்தில் கொண்டு, பல்வேறு மக்கள் நலத்திட்டங்களை தீட்டி சிறப்பாக செயல்படுத்தி வருகிறது.

அம்மா அவர்களின் தமிழக அரசு ஒரு மனித வாழ்விற்கு அடிப்படை தேவைகளில் ஒன்றான வறுமைக்கோட்டிற்கு கீழ் வாழும் அனைத்து குடும்ப அட்டைதாரர்களுக்கும் விலையில்லா அரிசி, விலையில்லா வேட்டி, சேலைகள், கிராமப்புற பகுதிகளில் வசிக்கின்ற மக்களுக்கு முதலமைச்சரின் சூரிய ஒளி சக்தியுடன் கூடிய பசுமை வீடு திட்டம், நகர்புறப்பகுதிகளில் வசிக்கின்ற மக்களுக்கு அனைவருக்கும் வீடு கட்டும் திட்டம் மற்றும் கிராமம், நகர்ப்புற பகுதிகளில் வசிக்கின்ற மக்களுக்கு விலையில்லா வீட்டுமனைப்பட்டா வழங்கும் திட்டம் போன்றவைகளை செயல்படுத்தி, தமிழக மக்களின் வாழ்விற்கு உறுதுணையாக இருந்து வருகிறது.

தமிழகத்தினை குடிசை இல்லாத தமிழகமாக மாற்றிடும் வகையில் இதுவரை வீடு இல்லாத ஏழை, எளிய குடிசை பகுதிகளில் வாழ்ந்து வரும் மக்களுக்கு மாநில அளவில் 6.50 லட்சம் நபர்களுக்கு வீடுகள் கட்டி வழங்கப்பட்டுள்ளது. தேனி மாவட்டத்தில் இதுவரை 2,600 நபர்களுக்கு வீடுகள் கட்டி தற்போது வழங்கப்படும் தருவாயில் உள்ளது. மேலும், 2,000 நபர்களுக்கு வீடுகள் கட்டி வழங்கிடவும் நடவடிக்கைகள் மேற்கொள்ளப்பட்டு வருகிறது.

அம்மா அவர்களின் தமிழக அரசு “ஆண்களுக்கு பெண்கள் சரிநிகர் என்பதனை கருத்தில் கொண்டு, பெண்கள் சார்ந்த பல்வேறு திட்டங்கள் சிறப்பாக செயல்படுத்தி வருகிறது. அதனடிப்படையில், பெண் சிசு கொலையை முற்றிலும் அகற்றிட தொட்டில் குழந்தை திட்டம், பெண் குழந்தைகளை பாதுகாத்திடவும்,

ஆண் குழந்தைகளை மட்டும் விரும்பும் மனப்போக்கை கட்டுப்படுத்திடவும், பெண் குழந்தைகள் பாதுகாப்பு திட்டம், கருவுற்ற காலங்களில் ஏற்படுகின்ற வருவாய் இழப்பினை ஈடு செய்திடும் பொருட்டு, கர்ப்பிணித்தாய்மார்கள் நல்ல சத்தான உணவுகளை உட்கொள்ள வேண்டும் என்பதனைக் கருத்தில் கொண்டு, டாக்டர். முத்துலெட்சுமி ரெட்டி மகப்பேறு நிதியுதவி வழங்கும் திட்டங்களையும் செயல்படுத்தி வருகிறது.

மேலும், பெண் கல்வியை ஊக்கப்படுத்திடவும், ஏழ்மையின் காரணமாக பெண்களின் திருமணம் காலதாமதம் ஏற்படக்கூடாது என்பதற்காவும் தமிழக அரசு ஏழை பெண்களின் திருமணத்திற்கு நிதியுதவி மற்றும் தாலிக்கு தங்கம் வழங்கும் திட்டத்தின் கீழ் பத்து மற்றும் பன்னிரெண்டாம் வகுப்பு படித்த பெண்களுக்கு ரூ.25,000 நிதியுதவியும், 8 கிராம் தாலிக்கு தங்கமும், பட்டம் மற்றும் பட்டயப் படிப்பு படித்த பெண்களுக்கு ரூ.50,000 நிதியுதவியும் 8 கிராம் தாலிக்கு தங்கமும் வழங்கப்பட்டு வருகிறது.

அம்மா அவர்களின் தமிழக அரசு கடந்த 10 ஆண்டுகளில் அரசு கலை மற்றும் அறிவியல் கல்லூரி, சட்டக்கல்லூரி, மருத்துவக்கல்லூரி, பொறியியல் கல்லூரி, தொழில்நுட்ப கல்லூரி, கால்நடை மருத்துவக்கல்லூரி போன்ற 116 புதிய கல்லூரிகள் தொடங்கப்பட்டுள்ளன.

அதன்படி, தேனி மாவட்டத்திற்கு பெருமை சேர்க்கின்ற வகையில் அரசு சட்டக்கல்லூரி, கால்நடை மருத்துவக்கல்லூரி, பொறியியல் கல்லூரி, மருத்துவக் கல்லூரி, செவிலியர் கல்லூரி, கலை மற்றும் அறிவியல் கல்லூரி, தொழில்நுட்ப கல்லூரி, தொடங்கப்பட்டு, மாணவ, மாணவிகளின் நலன் காத்து வருகிறது.

அதன்தொடர்சியாக தேனி மாவட்டத்தில் வீரபாண்டிக்கு அருகில் சுமார் 550 ஏக்கர் பரப்பளவில் சிட்கோ தொழிற் பூங்கா தொடங்கிட நடவடிக்கைகள் மேற்கொள்ளப்பட்டு, நடப்பு மாதத்தில் அதற்கான தொடக்கவிழா நடத்திட திட்டமிடப்பட்டுள்ளது. இதன் மூலம பல்வேறு வகையான தொழில் நிறுவனங்கள் இப்பூங்காவில் அமைக்கப்பட்டு, அதன் மூலம் வேலைவாய்பற்ற இளைஞர்கள் பயன்பெறும் வகையில் செயல்படுத்திட நடவடிக்கைகள் மேற்கொள்ளப்பட்டுள்ளது.

ஒரு மனிதன் சேற்றில் கால் வைத்தால் தான், நாம் சோற்றில் கை வைக்க முடியும் என்பதனை அம்மா அவர்களின் தமிழக அரசு கருத்தில் கொண்டு, விவசாயிகளின் நலனை காத்திடும் வகையில் வேளாண் சார்ந்த பல்வேறு திட்டங்களை தமிழகத்தில் செயல்படுத்தி விவசாயிகளின் பாதுகாவலனாக தமிழக அரசு திகழ்ந்து வருகிறது. குறிப்பாக நெல் உற்பத்தியில் கடந்த 5 ஆண்டுகளாக தமிழகம் முதலிடமாக திகழ்ந்து வருகிறது.

மேலும், ஆண்டிபட்டி சட்டமன்ற தொகுதி விவசாய பெருங்குடி மக்களின் நீண்ட நாள் கோரிக்கையான கண்மாய்கள், குளம், குட்டைகளுக்கு தண்ணீரை கொண்டு சேர்க்கும் திட்டத்திற்கு எவருடைய நிலங்களும் பாதிப்படையாதவாறு முல்லை பெரியாற்றிலிருந்து ரூ.380 கோடி மதிப்பீட்டில் ஆண்டிபட்டி சட்டமன்ற தொகுதிக்குட்ட 83 கண்மாய்களுக்கு பைப் லைன் மூலம் தண்ணீர் கொண்டு வருவதற்கான அரசாணை ஒரு வார காலத்திற்குள் வெளியிடுவதற்கு நடவடிக்கைகள் மேற்கொள்ளப்பட்டுள்ளது.

மாணவ, மாணவிகளின் கல்வி ஏழ்மையின் காரணமாக எந்த ஒரு சூழ்நிலையிலும் தடைபடக் கூடாது என்பதற்காக கல்வி ஊக்கத்தொகை, விலையில்லா பாட புத்தகம், நோட்டுப்புத்தகம், வருடத்திற்கு நான்கு ஜோடி சீருடைகள், காலணிகள், புத்தகப்பை, வடிவியல் பெட்டிகள், வரைபட புத்தகங்கள், கிரையான்ஸ், கணித உபகரணங்கள், பேருந்து பயண அட்டை, விலையில்லா மிதி வண்டிகள், விலையில்லா மடிக்கணிகள் போன்ற 14 வகையான கல்வி உபகரணங்கள் வழங்கப்பட்டு, கல்வித்துறையில் பிற மாநிலங்களுக்கு தமிழகம் முன்மாதிரியாக திகழ்ந்து வருகிறது.

அம்மா அவர்களின் தமிழக அரசு பொதுமக்களின் நலனை பாதுகாத்திடும் வகையில், கிராமப்புற பகுதிகளில் ஆரம்ப சுகாதார நிலையங்கள் இல்லாத பகுதிகளை கண்டறிந்து, கிராமப்புற மக்கள் எளிதில் மருத்துவ சிகிச்சை பெறுகின்ற வகையில் முதலமைச்சரின் அம்மா மினி கிளினிக்குகள் தொடங்கப்பட்டு, பொதுமக்களை பாதுகாத்து வருகிறது.

எனவே, தமிழக மக்களுக்களின் தேவைகளை அறிந்து, அவர்களின் நலனுக்காகவே செயல்படுகின்ற அரசாக திகழ்ந்து வரும் அம்மா அவர்களின் தமிழக அரசிற்கு, தொடர்ந்து பொதுமக்கள் தங்களது ஆதரவினை அளித்திட வேண்டும்.

இவ்வாறு துணை முதலமைச்சர் ஓ.பன்னீர்செல்வம் பேசினார்.

முன்னதாக விழாவில் சமூக நலத்துறையின் சார்பில் திருமண நிதியுதவியுடன் கூடிய தாலிக்கு தங்கம் வழங்கும் திட்டத்தின் கீழ் பெரியகுளம், ஆண்டிபட்டி மற்றும் கம்பம் ஆகிய சட்டமன்ற தொகுதிகளுக்குட்பட்ட 771 பயனாளிகளுக்கு ரூ.5.73 கோடி மதிப்பிலான நிதியுதவியுடன் கூடிய தாலிக்கு தங்கமும், விலையில்லா தையல் இந்திரங்கள் வழங்கும் திட்டத்தின் கீழ் 50 பயனாளிகளுக்கு தலா ரூ.4,474 வீதம் ரூ.2.23 லட்சம் மதிப்பீட்டில் விலையில்லா தையல் இயந்திரங்களையும்,

வருவாய் மற்றும் பேரிடர் மேலாண்மைத்துறையின் சார்பில் விலையில்லா வீட்டுமனைப்பட்டா வழங்கும் திட்டத்தின் கீழ் 864 பயனாளிகளுக்கு ரூ.3.18 கோடி மதிப்பிலான வீட்டுமனை பட்டாக்களையும், மற்றும் கால்நடை பராமரிப்புத்துறையின் சார்பில் புறக்கடை கோழி வளர்ப்புத்திட்டத்தின் கீழ் 1,033 பயனாளிகளுக்கு ரூ.19 லட்சம் மதிப்பிலான நாட்டுக்கோழிகளும்,

மாற்றுத்திறனாளிகள் நலத்துறையின் சார்பில் மாற்றுத்திறனாளிகளுக்கு திருமண நிதியுதவியுடன் கூடிய தாலிக்கு தங்கம் வழங்கும் திட்டத்தின் கீழ் 5 பயனாளிகளுக்கு ரூ.3.80 லட்சம் மதிப்பிலான நிதியுதவியுடன் கூடிய தாலிக்கு தங்கமும், மாற்றுத்திறனாளிகளுக்கான நவீன பிரத்யோக செயலிகளுடன் கூடிய கைபேசி வழங்கும் திட்டத்தின் கீழ் 2 பயனாளிகளுக்கு தலா ரூ.12,799 வீதம் ரூ.25,598 மதிப்பிலான கைபேசிகளும் என மொத்தம் 2,725 பயனாளிகளுக்கு ரூ.9.16 கோடி மதிப்பிலான அரசின் நலத்திட்ட உதவிகளை துணை முதலமைச்சர் ஓ.பன்னீர்செல்வம் வழங்கினார்.

விழாவில், தேனி தொகுதி நாடாளுமன்ற உறுப்பினர் ப.ரவீந்திரநாத், கம்பம் தொகுதி சட்டமன்ற உறுப்பினர் எஸ்.டி.கே.ஜக்கையன், மாவட்ட ஊராட்சித்தலைவர் க.ப்ரிதா, ஊராட்சி ஒன்றியக்குழு தலைவர்கள் ஆ.லோகிராஜன், மாவட்ட வருவாய் அலுவலர் க.ரமேஷ், பெரியகுளம் சார் ஆட்சியர் டி.சிநேகா, கால்நடை பராமரிப்புத்துறை இணை இயக்குநர் சி.சுப்பையா பாண்டியன், மாவட்ட சமூக நல அலுவலர் சு.சண்முகவடிவு, முன்னாள் நாடாளுமன்ற உறுப்பினர் எஸ்.பி.எம்.சையதுகான் உள்பட பலர் கலந்து கொண்டனர்.