சிறப்பு செய்திகள்

டுவிட்டரில் மருத்துவ உதவி கேட்ட இளைஞருக்கு உடனடியாக உதவிய முதலமைச்சர்

வேலூர்

வேலூர் அடுத்த பள்ளிகொண்டாவில் அம்மாவின் சிகிச்சைக்கு டுவிட்டர் மூலம் உதவி கேட்ட இளைஞனுக்கு ஒருசில நிமிடங்களில் சிகிச்சைக்கு ஏற்பாடு செய்த முதல்வருக்கு பாதிக்கப்பட்ட குடும்பத்தினர் நெஞ்சார்ந்த நன்றி தெரிவித்துள்ளனர்.

வேலூர் மாவட்டம் பள்ளிகொண்டா பகுதியை சேர்ந்த நளினி என்ற பெண் வேலூர் அடுக்கம்பாறை அரசு மருத்துவமனையில் கடந்த 4 ஆண்டுகளாக சிறுநீரக பாதிப்பால் டயாலிசிஸ் செய்து வருகிறார். இந்த நிலையில் நேற்று முன்தினம் இவருக்கு கொரோனா பரிசோதனை மேற்கொள்ளப்பட்டது.

அதில் நளினிக்கு தொற்று பாதிப்பு கண்டறியப்பட்டு வேலூர் அடுக்கம்பாறை அரசு மருத்துவமனையில் சிகிச்சைக்காக அனுமதிக்கப்பட்டுள்ளார். இதனைத்தொடர்ந்து அவருடைய மகன் சந்துரு தன்னுடைய தாயாருக்கு சிறுநீரக கோளாறால் டயாலிசிஸ் செய்ய வேண்டிய சூழல் உள்ளது தற்போது அவர் கொரோனா பாதிப்பால் அரசு மருத்துவமனையில் சிகிச்சை பெற்று வரும் நிலையில் அவருக்கு டயாலிசிஸ் சிகிச்சை அளிக்குமாறு தனது ட்விட்டர் பக்கத்தில் பதிவு செய்திருந்தார்.

இளைஞன் சந்துரு பதிவு போட்ட சில மணி நேரத்தில் முதலமைச்சர் எடப்பாடி கே. பழனிசாமி உடனடியாக அவருடைய ட்விட்டர் பதிவுக்கு பதில் தெரிவித்திருந்தார். அந்தப் பதிவில், ‘கவலை வேண்டாம் தம்பி உன்னுடைய தாயாருக்கு டயாலிசிஸ் சிகிச்சை அளிக்க அதிகாரிகளுக்கு அறிவுறுத்தியுள்ளேன் ’ என்று தெரிவிக்கப்பட்டிருந்தது. தனது டுவிட்டர் பதிவுக்கு உடனடியாக பதிலளித்த தமிழக முதல்வரின் செயலை கண்டு சந்துரு குடும்பத்தினர் நெகிழ்ச்சி அடைந்ததுடன் நன்றியும் தெரிவித்தனர்.

தங்களுடைய பதிவுகளை உயர் அதிகாரிகள் பார்ப்பார்கள் என்று நினைத்தோம். ஆனால் தமிழக முதல்வரே பதிவை பார்த்து உடனடியாக எங்களுக்கு பதில் அளித்துள்ளார். கருணை உள்ளம் கொண்ட முதலமைச்சர் எடப்பாடி கே. பழனிசாமிக்கு இளைஞர் சந்துரு மற்றும் அவருடைய சகோதரி பவித்ரா ஆகியோர் தங்களுடைய குடும்பத்தின் சார்பாக நெஞ்சார்ந்த நன்றியை தெரிவித்தனர்.