தற்போதைய செய்திகள்

12-ம் வகுப்பு பொதுத்தேர்வுக்கு கூடுதல் மையங்கள் அமைப்பு-அமைச்சர் கே.ஏ.செங்கோட்டையன் தகவல்

ஈரோடு,

12-ம் வகுப்பு பொதுத்தேர்வுக்கு கூடுதல் மையங்கள் அமைக்கப்படும் என்று அமைச்சர் கே.ஏ.செங்கோட்டையன் தெரிவித்துள்ளார்.

ஈரோடு மாவட்டம், கோபிசெட்டிபாளையம் தொகுதிக்குட்பட்ட குண்டேரிப்பள்ளம் அணை சுற்றுலா தளத்தில் மாவட்ட ஆட்சித்தலைவர் சி.கதிரவன் தலைமையில் பள்ளிக்கல்வி, இளைஞர் நலன் மற்றும் விளையாட்டு மேம்பாட்டுத்துறை அமைச்சர் கே.ஏ.செங்கோட்டையன் ரூ.1.86 கோடி மதிப்பீட்டில் சுற்றுலா பயணிகளின் அடிப்படை வசதிகளை மேம்படுத்துதல் மற்றும் அணுகுசாலை அமைக்கும் பணிகளை பூமிபூஜையிட்டு தொடங்கி வைத்தார்.

இந்நிகழ்ச்சியில் அமைச்சர் கே.ஏ.செங்கோட்டையன் பேசியதாவது:-

குண்டேரிப்பள்ளம் அணையின் நீர்பிடிப்பு பகுதிகளில் மழை பெய்து குண்டேரிப்பள்ளம் அணையிலிருந்து உபரியாக செல்லும் நீரை தேக்கிவைத்து பாசனத்திற்கு பயன்படுத்தும் வகையில், குண்டேரிப்பள்ளம் அணையின் நீர்மட்டத்தை 3 அடி உயர்த்துவதற்காக நடவடிக்கை மேற்கொள்ளப்பட்டுள்ளது. விரைந்து அப்பணிகள் நிறைவேற்றப்படும்.


மேலும் இப்பகுதியில் உள்ள மலைவாழ் மக்கள் வீட்டுமனை பட்டா வேண்டி கோரிக்கை வைத்துள்ளனர். அவர்களுக்கு விரைவில் விலையில்லா வீட்டுமனை பட்டாக்கள் வழங்க நடவடிக்கை மேற்கொள்ளப்படும். மேலும் மழை, பேரிடர் காலங்களில் ஏற்படும் வெள்ளத்தினை தடுக்கும் வகையில் 500 மீட்டர் அளவில் தடுப்புச்சுவர் அமைப்பதற்கு இடம் ஆய்வு மேற்கொள்ளப்பட்டது. விரைந்து அப்பணிகள் நிறைவேற்றப்படும்.

பள்ளிக்கல்வித்துறையை பொறுத்தவரை 12-ம் வகுப்பு பொதுத்தேர்விற்கு அட்டவணை வெளியிடப்பட்டுள்ளது. தேர்விற்கு கூடுதல் மையங்கள் அமைக்கவும் ஆணைகள் வழங்கப்பட்டுள்ளது. தேர்விற்கு குறுகிய காலம் உள்ள நிலையில், ஆசிரியர்கள் மாணவர்களை தங்களது குழந்தைகள் போல் எண்ணி மனித நேயத்தோடு பாடங்களை நடத்தி வருகிறார்கள். பள்ளிக்கல்வித்துறையில் ஆசிரியர்களது பணி எண்ணிலடங்கா பணியாக உள்ளது.

நம்பியூர் ஊராட்சி ஒன்றியம், செம்மாம்பாளையம் ஊராட்சி ஒன்றிய துவக்க பள்ளியில் மெய்நிகர் வகுப்பறை அமைக்க பள்ளியின் தலைமையாசிரியர் தனது சொந்த செலவில் ரூ.1 லட்சம் நிதி வழங்கியுள்ளார்.

இவ்வாறு அமைச்சர் கே.ஏ.செங்கோட்டையன் பேசினார்.

அதைத்தொடர்ந்து, பொதுப்பணித்துறை, நீர்வள ஆதாரத்துறை சார்பில், குண்டேரிப்பள்ளம் ஓடையில் தடுப்புச்சுவர் அமைக்கும் பணி, நம்பியூர் ஊராட்சி ஒன்றியம், ஒழலக்கோவில் ஊராட்சியில் ரூ.21.7 லட்சம் மதிப்பீட்டில் புதிய தார்சாலை அமைக்கும் பணி ஆகியவற்றை பூமிபூஜை செய்து அமைச்சர் கே.ஏ.செங்கோட்டையன் தொடங்கி வைத்தார். மேலும் அத்திக்கடவு-அவிநாசி திட்டத்தின் கீழ் வரப்பாளையம் நீரேற்று நிலைய பணிகளை பார்வையிட்டு ஆய்வு மேற்கொண்டார்.

இந்நிகழ்ச்சியில், மாவட்ட கூட்டுறவு பால் உற்பத்தியாளர்கள் ஒன்றியம் தலைவர் கே.கே.காளியப்பன், கோபிசெட்டிபாளையம் வருவாய் கோட்டாட்சியர் சி.ஜெயராமன், பொதுப்பணித்துறை (நீர்வளஆதாரம்) செயற்பொறியாளர் தாமோதரன், உதவி செயற்பொறியாளர் (பாசன உபகோட்டம்) ப.திருமூர்த்தி, உதவி பொறியாளர் கல்பனா உட்பட தொடர்புடைய துறை அலுவலர்கள் கலந்து கொண்டனர்.