சிறப்பு செய்திகள்

கோட்டையில் நமது வெற்றி கொடியே பறக்க வேண்டும்

கழகத்தின் வெற்றிக்கு அணிவகுக்கு இளைஞர்களுக்கு முதலமைச்சர் வேண்டுகோள்

சென்னை

கோட்டையில் நமது வெற்றிக் கொடியே பறக்க வேண்டும் எனவே கழகத்தின் வெற்றிக்கு இளைஞர்கள் அணிவகுக்க வேண்டும் என்று முதலமைச்சர் எடப்பாடி கே.பழனிசாமி கேட்டுக் கொண்டுள்ளார்.

முதலமைச்சர் எடப்பாடி கே.பழனிசாமி திருநெல்வேலி மாவட்டம், அம்பாசமுத்திரத்தில் கழக தகவல் தொழில்நுட்ப பிரிவு மற்றும் இளைஞர் இளம்பெண்கள் பாசறை நிர்வாகிகளுடன் நடைபெற்ற கலந்துரையாடல் நிகழ்ச்சியில் பேசியதாவது:-

இளைஞர்களின் எதிர்காலம் சிறக்க வேண்டும், அவர்கள் ஏற்றம் பெற வேண்டும் என்பதற்காக அம்மாவுடைய அரசு புதிய தொழில் கொள்கையையும் வெளியிட்டிருக்கிறது. தமிழகத்திலே குறிப்பாக தென் மாவட்டங்களிலே புதிதாக தொழில் துவங்க வருகின்றவர்களுக்கு அவர்கள் வாங்கும் நிலத்தின் மதிப்பீட்டில் 50 சதவிகிதம் அரசு மானியமாக கொடுக்கப்படும்.

தென் மாவட்டங்களை தொழில்வளம் மிக்க மாவட்டங்களாக உருவாக்க வேண்டும் என்பதற்காக எங்களுடைய அரசு அங்கு தொழில் தொடங்குபவர்களுக்கு தொழில் முதலீட்டு மானியமும் கொடுக்க முன் வந்திருக்கிறது. ஆக தென் மாவட்டங்களை தொழிற்சாலைகள் மிகுந்த மாவட்டங்களாக உருவாக்குவதற்கு எங்களுடைய அரசு தொடர்ந்து பாடுபட்டு வருகிறது என்ற செய்தியை இந்த நேரத்தில் தெரிவித்துக கொள்கிறேன்.

தென் மாவட்டங்களில் புதிய புதிய தொழில்கள் துவங்கினால் தான் படித்த இளைஞர்களுக்கு வேலைவாய்ப்பு கிடைக்கும். அதையும் எங்களுடைய அரசு செயல்படுத்தி கொண்டிருக்கிறது. அம்மா அவர்கள் இருக்கின்ற காலக்கட்டத்தில் பல்வேறு பகுதிகளில் வேலைவாய்ப்பு முகாம்கள் நடத்தினோம்.

அதன் மூலமாக படித்த இளைஞர்களுக்கு வேலைவாய்ப்புகளை பெற்று தந்தோம். அண்மையில் கூட நான் நாமக்கல் மாவட்டத்திற்கு சென்றிருந்த போது அங்கே குமாரபாளையத்தில், இளைஞர்களுக்கு வேலைவாய்ப்பை உருவாக்கி தர வேண்டும் என்பதற்காக மின்துறை அமைச்சர் வேலைவாய்ப்பு முகாமை நடத்தினார்.

சுமார் 1900 இளைஞர், இளம்பெண்களுக்கு அந்த முகாம் மூலமாக வேலைவாய்ப்பு பெற்று தரப்பட்டது. அம்மாவுடைய அரசாங்கம் தான் இளைஞர்களுக்கு வேலைவாய்ப்பை உருவாக்கி தந்து வருகிறது.

தேர்தல் என்ற போர் விரைவில் வரவிருக்கின்றது. அந்த போரிலே இளைஞர் பட்டாளங்கள் எதிரிகளை தேர்தல் களத்திலே ஓட ஓட விரட்டி மீண்டும் கழகத்தின் வெற்றி கொடியை கோட்டையில் பறக்க வேண்டும் என்பதை லட்சியமாக கொண்டு செயல்பட வேண்டும். இளைஞர்கள் எதையும் சாதிக்க கூடிய ஆற்றல் மிக்கவர்கள்.

இளம் வயதிலே தான் எதையும் சாதிக்க முடியும். சாதிக்க பிறந்தவர்கள் இளைஞர்கள். ஆகவே, இங்கே அமர்ந்திருக்கின்ற இளைஞர்கள், நாளை தமிழகத்தை ஆளக்கூடியவர்கள். நாளை இந்தியாவை ஆளக்கூடிய இளஞ்சிங்கங்கள் இங்கே அமர்ந்திருக்கின்றீர்கள்.

உங்களுடைய எதிர்காலம் சிறக்க, ஏற்றம் பெற, மீண்டும் அம்மாவுடைய ஆட்சி தொடர, கழக வேட்பாளர்களுக்கு இரட்டைஇலை சின்னத்தில் வாக்குகளை சேகரித்து, அம்மாவுடைய ஆட்சி தொடர பாடுபட வேண்டும் என்று அன்போடு இந்த நேரத்தில் கேட்டுக் கொள்கிறேன்.

இங்கே வருகை தந்துள்ள இளைஞர் பட்டாளங்களுக்கு அம்மாவுடைய அரசும், கழகமும் உங்களுக்கு பிரகாசமான எதிர்காலத்தை உருவாக்கி தரும் என்பதை இந்த நேரத்திலே தெரிவிக்க விரும்புகின்றேன். இன்றைக்கு தமிழகத்தில் எத்தனையோ கட்சிகள் இருக்கின்றன.

ஆனால் கழகத்தில்தான் இளைஞர்கள் நிறைந்த கட்சி என்ற நிலையை உருவாக்கி இருக்கிறது. அம்மா அவர்கள் இருக்கின்ற போது, இளைஞர் பட்டாளங்கள் கழகத்தில் இணைகின்ற போது, கழகத்திற்கு புது ரத்தம் பாய்ச்சப்படுகிறது என்று குறிப்பிடுவார். அதன்படி இன்றைக்கு கழகத்திற்கு புதிய ரத்தம் பாய்ச்சப்பட்டுள்ளது.

இளைஞர் பட்டாளங்கள் சிறப்பாக செயல்பட வேண்டும். நீங்கள் பொறுப்பேற்று முதன்முதலிலே சந்திக்கின்ற சட்டமன்ற பொதுத் தேர்தல் இந்த தேர்தல். ஆகவே, இந்த பொதுத்தேர்தலில் கழகம் வெற்றி பெறுவதற்கு அணிவகுத்து நிற்க வேண்டும் என்று கேட்டுக்கொள்கிறேன்.

இவ்வாறு முதலமைச்சர் எடப்பாடி கே.பழனிசாமி பேசினார்.