கன்னியாகுமரி

பொதுமக்கள் அனைவரும் கபசுரக் குடிநீரை பருகி,நோய் எதிர்ப்பு சக்தியினை அதிகரித்து தங்களை பாதுகாத்து கொள்ள வேண்டும் – என்.தளவாய் சுந்தரம் பேச்சு

கன்னியாகுமரி

கன்னியாகுமரி மாவட்டம், தோவாளை வட்டத்திற்குட்பட்ட, பேரூராட்சிகள் மற்றும் கிராம ஊராட்சிகளுக்கு, தோவாளை ஒன்றிய கழக செயலாளரும், மாவட்ட கூட்டுறவு ஒன்றியப் பெருந்தலைவருமான எஸ்.கிருஷ்ணகுமார் தனது சொந்த நிதியிலிருந்து, கபசுரக் குடிநீர் பொடி பாக்கெட்டுகள், கேன் உள்ளிட்ட உபகரணங்களை வழங்கினார்.

பின்னர் டெல்லி சிறப்புப் பிரதிநிதி என்.தளவாய் சுந்தரம் பேசியதாவது:-

புரட்சித்தலைவி அம்மா வழியில் பொதுமக்கள் நலனில் அக்கறை கொண்டு செயல்படும், முதலமைச்சர் எடப்பாடி கே.பழனிசாமி ஆணைக்கிணங்க, கொரோனா நோயால் பாதிக்கப்பட்டு, சிகிச்சை பெற்றுவரும் நோயாளிகளுக்கு, தனியார் உணவகங்கள் வாயிலாக, தரமான, சத்தான உணவுகள் வழங்கப்பட்டு வருகிறது. மேலும், நோயாளிகளின் நோய் எதிர்ப்பு சக்தியை அதிகரிக்கும் வகையில், அவர்களுக்கு மூலிகையினால் தயாரிக்கப்பட்ட முட்டையுடன் கூடிய சிக்கன் பிரியாணி மற்றும் மீன் சாப்பாடுகள் வழங்கப்பட்டு வருகிறது.

நமது நாட்டில் பாரம்பரிய மருத்துவமான, ஆயுர்வேத மருத்துவர்களின் ஆலோசனையின்பேரில், பொதுமக்களின் உடலில் நோய் எதிர்ப்பு சக்தியினை மேலும் அதிகரித்திடவும், கொரோனா வைரஸ் தொற்று நோயிலிருந்து பாதுகாத்திடவும், கபசுரக் குடிநீர் வழங்க நடவடிக்கை எடுக்கப்பட்டுள்ளது. எனவே, பொதுமக்கள் அனைவரும் கபசுரக் குடிநீரை பருகி, தங்களது உடலில் நோய் எதிர்ப்பு சக்தியினை அதிகரித்து, தங்களை பாதுகாத்து கொள்ள வேண்டும்.

தற்போதைய கொரோனா தொற்றுநோய் பரவாமல் தடுப்பதற்காக, அனைத்து மருத்துவத்துறை மருத்துவர்களும், மருத்துவ அலுவலர்களும், செவிலியர்களும், மருத்துவ பணியாளர்களும் தங்களது கஷ்டத்தை பொருட்படுத்தாமல், மிகச் சிறப்பாக பணியாற்றி வருகிறார்கள். கொரோனா தடுப்பு பணிகளில் ஈடுபட்டு வரும் மருத்துவர்களின் ஆலோசனைக்கேற்ப, பொதுமக்களாகிய நீங்கள் உங்களது உடலில் நோய் எதிர்ப்பு சக்தியை உருவாக்குகின்ற கபசுரக் குடிநீரை தவறாமல் குடிக்க வேண்டும்.

கபசுரக் குடிநீரை பொதுமக்களுக்கு வழங்கும் பணியில் ஈடுபடும் மக்கள் பிரதிநிதிகள், கழக நிர்வாகிகள், தாங்கள் எந்த அளவிற்கு முடியுமோ, அந்த அளவிற்கு மக்கள் பணியாற்றிட வேண்டும். நீங்கள் செய்கின்ற மக்கள் பணி உங்களது எதிர்காலத்திற்கு உறுதுணையாக இருக்கும். மக்கள் பணியினை சிறப்பாக மேற்கொண்டால் தான், பொதுமக்களும் உங்கள் மீதும், நீங்கள் சார்ந்த இயக்கம் மீதும் நம்பிக்கை வைப்பார்கள்.

கபசுரக் குடிநீர் வழங்குவதற்கு தேவையான ஆலோசனைகள் எதுவாக இருந்தாலும், அதை மருத்துவ அலுவலர்களிடம் தொடர்பு கொண்டால், உடனடியாக ஆலோசனைகளை மருத்துவர்கள் வழங்குவார்கள். பொதுமக்களாகிய நீங்கள், மக்கள் பிரதிநிதிகள் மற்றும் களப்பணியாளர்களுக்கு ஒத்துழைப்பு நல்கிட வேண்டும்.

முதலமைச்சர் எடப்பாடி கே.பழனிசாமி, கொரோனா சிகிச்சைக்காக தேவையான மருந்துகளையும், ஆக்ஸிஜன், வெண்டிலேட்டர்களையும் போதுமான அளவிற்கு வழங்க ஆணையிட்டு, அதனடிப்படையில், ஆக்ஸிஜன், வெண்டிலேட்டர்கள் வழங்கப்பட்டுள்ளது. கழக நிர்வாகிகள் அனைவரும் தங்கள் சொந்த செலவில், இதுபோன்ற கொரோனா நோய் தடுப்பு பணிக்காக பல்வேறு உதவிகளை செய்திட வேண்டும்.

அதன் முன்னோட்டமாக, தோவாளை ஒன்றிய கழகத்தின் சார்பில், ஒன்றிய செயலாளர் எஸ்.கிருஷ்ணகுமார் தனது சொந்த நிதியிலிருந்து வழங்கி, இப்பணியினை துவங்கி உள்ளார். நோய் காலத்தில், பொதுமக்களுக்கு செய்கின்ற பணி என்றென்றும் உங்களுக்கு புண்ணியம் சேர்க்கும் என்பதை மனதில் கொண்டு செயல்பட வேண்டும்.

இவ்வாறு டெல்லி சிறப்புப் பிரதிநிதி என்.தளவாய் சுந்தரம் பேசினார்.

கன்னியாகுமரி மாவட்டத்தில், தற்போது, கொரோனா தொற்று காலத்தில் பொதுமக்கள் அதிக அளவில் பாதிக்கப்பட்டு, சிகிச்சை பெற்று வருகின்றனர். நோயாளிகளுக்கு, நோய் எதிர்ப்பு சக்தியை அதிகரித்திடும் வகையில், கபசுரக் குடிநீர் வழங்கப்பட்டு வருகிறது. அதனடிப்படையில், தோவாளை வட்டத்திற்குட்பட்ட, பேரூராட்சிகள் மற்றும் கிராம ஊராட்சிகளில் வீடு, வீடாக சென்று கபசுரக் குடிநீர் வழங்க ஏற்பாடு செய்யப்பட்டுள்ளது.

தற்போது, தோவாளை வட்டத்திற்குட்பட்ட, 4 பேரூராட்சிகள் மற்றும் 16 கிராம ஊராட்சி ஆகிய பகுதிகளில் வசிக்கும் பொதுமக்களுக்கு, வீடு, வீடாக சென்று, அப்பகுதி மக்களின் நோய் எதிர்ப்பு சக்தியை அதிகரித்திடும் வகையில், கபசுரக் குடிநீர் வழங்க, டெல்லி சிறப்புப் பிரதிநிதி என்.தளவாய் சுந்தரம் அறிவுரை வழங்கினார்.

இப்பகுதி பொதுமக்களுக்கு கபசுரக் குடிநீர் வழங்குவதற்கு தேவையான கபசுரக்குடிநீர் பாக்கெட்டுகள் மற்றும் கபசுரக் குடிநீர் தயாரித்து வழங்குவதற்காக கேன் உள்ளிட்ட உபகரணங்களை, தோவாளை ஒன்றிய கழக செயலாளரும், மாவட்ட கூட்டுறவு ஒன்றியப்பெருந்தலைவருமான எஸ்.கிருஷ்ணகுமார் தனது சொந்த நிதியிலிருந்து ஏற்பாடு செய்தார்.

அதனை, தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம், தோவாளை ஊராட்சி ஒன்றியத்தலைவர் இ.சாந்தினி பகவதியப்பன் முன்னிலையில், மாவட்ட சித்த மருத்துவ அலுவலர் மேபல் அருள்மணி தலைமையில், தோவாளை அரசு ஆரம்ப சுகாதார நிலையத்தில் நடைபெற்ற நிகழ்ச்சியில், ஊராட்சி மன்றத்தலைவர்கள், ஊராட்சி ஒன்றிய உறுப்பினர்கள், ஊராட்சி மன்ற உறுப்பினர்கள் மற்றும் பேரூர் கழக நிர்வாகிகள் ஆகியோருக்கு வழங்கினார்.

இந்நிகழ்ச்சியில், அகஸ்தீஸ்வரம் ஊராட்சி ஒன்றியப்பெருந்தலைவர் எஸ்.அழகேசன், மாவட்ட ஊராட்சி உறுப்பினர் மா.பரமேஸ்வரன், தோவாளை ஊராட்சி ஒன்றிய துணைத்தலைவர் எம்.டி.என்.ஷேக், ஊராட்சி மன்ற தலைவர்கள், அறங்காவலர் குழு உறுப்பினர் கே.பாக்கியலெட்சுமி, தோவாளை ஊராட்சி ஒன்றிய குழு உறுப்பினர் தா.மேரி ஜாய், ஊராட்சி மன்ற உறுப்பினர்கள், தோவாளை வட்டார மருத்துவ அலுவலர் மரு.ராஜ்குமார், மாவட்ட கழக இணைச்செயலாளர் லதா ராமச்சந்திரன், ஒன்றிய கழக இணைச்செயலாளர் ரமணி, ஒன்றிய தகவல் தொழில்நுட்ப பிரிவு செயலாளர் பூதைமகேஷ் உள்ளிட்ட பலர் கலந்து கொண்டனர்.