தற்போதைய செய்திகள்

மக்கள் மத்தியில் நம்பிக்கை நட்சத்திரமாக முதல்வர் திகழ்ந்து வருகிறார் – அமைச்சர் ஆர்.பி.உதயகுமார் பெருமிதம்

சென்னை

கொரோனா பணியாக இருந்தாலும், நிவாரண பணியாக இருந்தாலும் மக்கள் மத்தியில் நம்பிக்கை நட்சத்திரமாக முதல்வர் திகழ்ந்து வருகிறார் என்று அமைச்சர் ஆர்.பி.உதயகுமார் பெருமிதத்துடன் தெரிவித்தார்.

சென்னை திருவிக நகர் மண்டலத்திற்குட்பட்ட பெரம்பூரில் கொரோனா தொற்றுநோய் தொற்று தடுப்பு பணியில் ஈடுபட்டுள்ள 136 களப்பணியாளர்களுக்கு நோய் எதிர்ப்புச் சக்தி பொருட்கள் அடங்கிய 6 மருந்து பெட்டகங்களை வழங்கினார்.

அதே போன்று கொரோனோ தொற்றில் குணமடைந்த 5 நபர்களுக்கு பழங்களை அமைச்சர் உதயகுமார் வழங்கினார். இதைத் தொடர்ந்து காய்ச்சல் சிகிச்சை முகாமில் ஈடுபட்டுள்ள 3 மருத்துவர்களுக்கு சால்வை அணிவித்து வருவாய், பேரிடர் மற்றும் தகவல் தொழில்நுட்ப துறை அமைச்சர் ஆர்.பி.உதயகுமார் கௌரவப்படுத்தினார். இதையடுத்து களப்பணியாளர்களிடையே அமைச்சர் உதயகுமார் பேசியதாவது.

கொரோனா தொற்றை கட்டுப்படுத்துவதற்காக மாவட்டந்தோறும் முதல்வர் நேரில் சென்று மாவட்ட ஆட்சியர்கள், அனைத்து துறை அதிகாரிகளுடன் ஆய்வு மேற்கொண்டு உரிய அறிவுரைகளை வழங்கி வருகிறார். சென்னை மாநகரைப் பொறுத்த வரை 1 லட்சத்து 8 ஆயிரத்து 124 பேர் பாதிக்கப்பட்டவர்களில் 94,100 பேர் குணமடைந்து வீடு திரும்பி உள்ளனர், மருந்தே இல்லாத இந்த நோய்க்கு மருத்துவர்கள், செவிலியர்கள், களப்பணியாளர்கள் உழைப்பால் , தங்கள் உயிரைப் பணயம் வைத்து இந்த பணியைச் செய்து வரும் உங்களை வணங்கி, வாழ்த்தி நன்றியைத் தெரிவித்துக் கொள்கிறேன். முதல்வரின் சீரிய நடவடிக்கையின் காரணமாகவே 87 சதவீதம் பேர் சென்னையில் குணமடைந்து வீடு திரும்பியிருப்பது சாத்தியமாகியுள்ளது. இதைத் தொடர்ந்து அமைச்சர் ஆர்.பி. உதயகுமார் செய்தியாளர்களுக்குப் பேட்டி அளித்தார்.

திருவிக நகர் மண்டலத்தில் 8610 பேர் பாதிக்கப்பட்டு இதில் 7276 பூரண குணமடைந்து வீடு திரும்பி உள்ளனர். தற்போது 1070 பேர் மட்டும் சிகிச்சை மேற்கொண்டு வருகின்றனர். இதுவரை திருவிக நகர் மண்டலத்தில் 20,101 பரிசோதனைகள் மேற்கொள்ளப்பட்டுள்ளது. தற்போது நாளென்று 540 பரிசோதனைகளாக அதிகரிக்கப்பட்டுள்ளது. மொத்தம் உள்ள 2307 தெருக்களில் 1897 தெருக்கள் பாதிக்கப்பட்டிருந்த நிலையில், தற்போது 544 தெருக்கள் மட்டுமே பாதிக்கப்பட்டு தீவிரமாகக் கண்காணிக்கபட்டு வருகிறது.

அரசு மேற்கொண்டு வரும் பல்வேறு நடவடிக்கை காரணமாக திருவிக நகர் மண்டலத்தில் தொற்று என்பது படிப்படியாகக் குறைந்து வருகிறது. தற்போது தமிழகத்தில் கொரோனா தொற்று என்பது 7 சதவீதமாக உள்ளது. இதனை 0 சதவீதமாக மாற்றத் தொடர் நடவடிக்கை மேற்கொள்ளப்பட்டு வருகிறது. சென்னையில் மண்டல வாரியாக அதிகாரிகள் நியமிக்கப்பட்டு, இரவு பகலாக பணியாற்றி வருகின்றனர்.

உலகம் முழுவதும் கொரோனா கால கட்டத்தில் பொருளாதார பின்னடைவைச் சந்தித்து வரும் நிலையில், இந்தியாவில் எந்த மாநிலமும் இல்லாத நிலையில் இந்த கொரோனா கால கட்டத்தில் 30 ஆயிரம் கோடி ரூபாய் முதலீடுகளை 44 தொழிழ் நிறுவனங்களோடு புரிந்துணர்வு ஒப்பந்தம் மேற்கொண்டு முதல்வர் சாதனை செய்துள்ளார்.அதே போன்று வேளாண் , கட்டுமானம், தொழில் துறை என அனைத்து துறைகளிலும் இந்தியாவிலேயே தமிழகம் சிறந்த மாநிலமாகத் திகழ்ந்து வருவதற்கு முதல்வரின் சீரிய நடவடிக்கையே காரணம். ஒவ்வொரு மாவட்டத்திற்கும் முதல்வர் ஆய்வு மேற்கொள்ளச் செல்லும் போது அங்கு தொழிற் நிறுவனத்தினர், வேளாண் விவசாயிகள் என பலதரப்பட்டவர்களை அழைத்து ஆலோசனை நடத்தி என்னென்ன நடவடிக்கைகளை மேற்கொள்வது எனக் கேட்டறிந்து வருகிறார்.

வளிமண்டல மேலடுக்கு சுழற்சி காரணமாகத் தமிழகத்தில் தற்போது பல்வேறு மாவட்டங்களில் மழை பெய்து வருகிறது. தென் மேற்கு பருவ மழை காரணமாக அண்டை மாநிலங்களிலும் அதிகளவு மழை பெய்து வருகிறது. தமிழகத்தில் ஜூன்1 ம் தேதி முதல் ஆக.9ம் தேதி வரை 56 சதவீதம் மழை பெய்துள்ளது. கோழிக்கோடு, மூணாறு பகுதிகளில் தமிழகத்தைப் பூர்வீகமாகக் கொண்டவர்கள் வசித்து வந்த பகுதியில் ஏற்பட்ட நிலச்சரிவு காரணமாக ஏராளமானோர் உயிரிழந்துள்ளனர், அவர்களுக்கு ஆழ்ந்த இரங்கலை இந்த கூட்டத்தின் மூலம் தெரிவித்துக் கொள்கிறேன்.

அதே போன்று முதல்வர் கேரள முதல்வரை தொலைபேசியில் தொடர்பு கொண்டு தேவையான உதவிகளைச் செய்வதாகத் தெரிவித்துள்ளார். நிலச்சரிவில் மீட்கப்படும் உடல்கள் மிகுந்த சிதலமடைந்தால், அடையாளம் காணப்பட்டு அங்கேயே இறுதிச் சடங்கு செய்யப்படுகிறது.

கொரோனா தொற்று படிப்படியாகக் குறைந்து வருவதால் பல்வேறு தளர்வுகளை முதல்வர் அறிவித்து வருகிறார். அதன் படி சிறு வழிபாட்டுத் தலங்கள், ஜிம், வாகன பயிற்சி பள்ளிகள் திறக்க அனுமதி அளிக்கப்பட்டுள்ளது . வருங்காலத்தில் முதல்வர் மேலும் சில தளர்வுகளை அறிவிப்பார். இ-பாஸ் முறையைப் பொறுத்தவரை இரு குழுக்கள் அமைக்கப்பட்டு எளிமையாக்கப்பட்டுள்ளது.

கொரோனா கால கட்டத்தில் எதிர்க்கட்சி தலைவர் மற்றும் அவரது கட்சிக் காரர்கள் 4 மாதமாக எந்த நிவாரண பணியும் செய்யவில்லை. கொரோனா நிவாரண பணியைப் பொறுத்தவரை எதிர்க்கட்சி தலைவர், அவரது கட்சியினர் செய்த பணி என்பது பூஜ்ஜியம் ஆகும். கொரோனா தடுப்பு பணியாக இருந்தாலும் நிவாரண பணியாக இருந்தாலும் மக்கள் மத்தியில் முதல்வர் நம்பிக்கை நட்சத்திரமாகத் திகழ்ந்து வருகிறார். அமைச்சர் ஆர்.பி.உதயகுமார் தெரிவித்தார்.