தமிழகம்

புயலால் ஏற்பட்ட பயிர் சேதங்களை கணக்கிட்டு அறிக்கை அளிக்க மாவட்ட ஆட்சியர்களுக்கு முதலமைச்சர் உத்தரவு

சென்னை

புயலால் ஏற்பட்ட பயிர் சேதங்களை கணக்கிட்டு அறிக்கை அளிக்க மாவட்ட ஆட்சியர்களுக்கு உத்தரவிடப்பட்டுள்ளதாக முதலமைச்சர் எடப்பாடி கே.பழனிசாமி தெரிவித்தார்.முதலமைச்சர் எடப்பாடி கே.பழனிசாமி புரெவி புயல் மற்றும் கனமழையால் நாகப்பட்டினம் மற்றும் திருவாரூர் மாவட்டங்களில் பாதிக்கப்பட்ட பகுதிகளை பார்வையிட்ட பின் செய்தியாளர்களுக்கு அளித்த பேட்டி வருமாறு:-

நிவர் புயல் மற்றும் கனமழையால் பாதிக்கப்பட்டு, உயிரிழந்தவர்கள் 6 நபர்கள், காயமடைந்தவர்கள் 12 நபர்கள். நிவர் புயலால் 3,673 குடிசை வீடுகள், 725 ஓட்டு வீடுகள் என மொத்தம் 4,398 வீடுகள் நிவர் புயலால் பாதிக்கப்பட்டிருக்கின்றன. கால்நடைகளை பொறுத்தவரை, 381 ஆடு, மாடுகளும், 31,011 பறவைகளும் இறந்திருக்கின்றன. அதேபோல சேதமடைந்த மரங்களின் எண்ணிக்கை 2,297. நிவர் புயலின்போது 3,040 முகாம்கள் அமைக்கப்பட்டன. அந்த முகாம்களில் 93,067 ஆண்கள்,

97,142 பெண்கள், 40,233 குழந்தைகள் என மொத்தம் 2,27447 நபர்கள் தங்கவைக்கப்பட்டு, அவர்களுக்குத் தேவையான உணவு, சுகாதார வசதிகள் போன்ற அனைத்து வசதிகளும் செய்து கொடுக்கப்பட்டன. நிவர் புயலால் பாதிக்கப்பட்ட மின்கம்பங்கள் சரி செய்யப்பட்டிருக்கின்றன. 1,257 மருத்துவ முகாம்கள் நடத்தப்பட்டன. 445 நடமாடும் மருத்துவக்குழு அமைக்கப்பட்டு, மக்கள் பாதிப்புக்குள்ளாகியிருக்கும் பகுதிகளுக்கு சென்று அங்கேயே அவர்களுக்கு உரிய சிகிச்சை அளிக்கப்பட்டது. அதன்மூலம், 1,01,679 நபர்கள் பயனடைந்துள்ளனர். நிவர் புயலால் ஏற்பட்ட பயிர் சேதத்தை பொறுத்தவரை, 12,187 ஹெக்டேர் பாதிக்கப்பட்டது. தோட்டப் பயிர் ஏறத்தாழ 3,473 ஹெக்டேர் பாதிப்பிற்குள்ளாகியிருக்கிறது.

புரெவி புயலால், இறந்தவர்கள் 7 நபர்கள், காயமடைந்தவர்கள் 9 நபர்கள், சேதமடைந்த வீடுகள் 5,509, குடிசை வீடுகள் 4,534, ஓட்டு வீடுகள் 927. கால்நடைகளைப் பொறுத்தவரை, 219 ஆடு, மாடுகளும், 19,292 பறவைகளும் உயிரிழந்துள்ளன. சேதமடைந்த மரங்களின் எண்ணிக்கை 920, சேதமடைந்த மின்கம்பங்களின் எண்ணிக்கை 739, அவை உடனடியாக சரிசெய்யப்பட்டிருக்கின்றன.

புரெவி புயலின்போது, தாழ்வான பகுதிகளில் வசிக்கின்ற மக்களுக்கு பாதுகாப்பான பகுதிகளில் முகாம் அமைக்கப்பட்டு, அதில் தங்கவைக்கப்பட்டு அவர்களுக்குத் தேவையான உணவு, மருத்துவ வசதி போன்றவை செய்து கொடுக்கப்பட்டன. புரெவி புயலால் முகாம்களில் தங்கவைக்கப்பட்ட 2,07,461 நபர்களில் 82,463 ஆண்கள் மற்றும் 89,000 பெண்கள் மற்றும் 35,998 குழந்தைகள். 492 மருத்துவ முகாம்கள் அமைக்கப்பட்டன. 35 நடமாடும் மருத்துவக்குழு அமைக்கப்பட்டு, பல்வேறு இடங்களுக்குச் சென்று சிகிச்சை அளிக்கப்பட்டதில், 22,914 நபர்கள் பயனடைந்துள்ளனர்.

பயிர் சேதத்தை பொறுத்தவரை, இதுவரை கணக்கிடப்பட்டதன் அடிப்படையில், நெற்பயிர் 53,063 ஹெக்டேர், இதர பயிர் 13,250 ஹெக்டேர் மற்றும் வாழை பயிரிட்டவர்கள் 561 ஹெக்டேர். இன்னும் தண்ணீர் வடியவில்லை. சில பகுதிகள் விடுபட்டிருந்தாலும் அதைக் கணக்கிட்டு, அறிக்கை தாக்கல் செய்ய வேண்டுமென்று மாவட்ட ஆட்சித்தலைவர்களுக்கு உத்தரவு வழங்கியுள்ளேன்.

இவ்வாறு முதலமைச்சர் எடப்பாடி கே.பழனிசாமி தெரிவித்தார்.