சிறப்பு செய்திகள்

தமிழக வீரர், வீராங்கனைகளின் சாதனை பயணம் தொடரட்டும்-எதிர்க்கட்சி தலைவர் எடப்பாடி கே.பழனிசாமி வாழ்த்து

சென்னை

டோக்கியோ ஒலிம்பிக் போட்டியில் விளையாட தகுதி பெற்றுள்ள தமிழக வீரர், வீராங்கனைகளின் சாதனை பயணம் தொடரட்டும் என்று எதிர்க்கட்சி தலைவர் எடப்பாடி கே.பழனிசாமி வாழ்த்து தெரிவித்துள்ளார்.

இதுகுறித்து கழக இணை ஒருங்கிணைப்பாளரும், முன்னாள் முதலமைச்சரும், தமிழ்நாடு சட்டமன்ற எதிர்க்கட்சி தலைவருமான எடப்பாடி கே.பழனிசாமி தனது டுவிட்டர் பக்கத்தில் பதிவிட்டிருப்பதாவது:-

ஜப்பான் தலைநகர் டோக்கியோவில் நடைபெறும் ஒலிம்பிக் போட்டிக்கு தமிழகத்தை சேர்ந்த பவானிதேவி வாள்சண்டை, சத்தியன் ஞானசேகரன் டேபிள் டென்னிஸ், சரத் கமல் டேபிள் டென்னிஸ், இளவேனில் வாலறிவன் துப்பாக்கி சுடுதல், நேத்ரா குமணன் பாய்மர படகு, கணபதி பாய்மர படகு, வருண் பாய்மர படகு, ரேவதி வீரமணி (கலப்பு 4X400 மீட்டர் தொடர் ஓட்டம்), தனலட்சுமி (கலப்பு 4X400 மீட்டர் தொடர் ஓட்டம்), சுபா வெங்கடேசன் (கலப்பு 4X400 மீட்டர் தொடர் ஓட்டம்), ஆரோக்கிய ராஜீவ் (ஆண்கள் 4X400 மீட்டர் தொடர் ஓட்டம்) நாகநாதன் பாண்டி (ஆண்கள் 4X400 மீட்டர் தொடர் ஓட்டம்) ஆகிய பிரிவுகளில் பங்கேற்க தகுதி பெற்று உள்ளனர்.

டோக்கியோவில் நடைபெறவுள்ள ஒலிம்பிக் போட்டிக்கு தேர்வாகியுள்ள தமிழக வீரர்களுக்கு என் பாராட்டுக்கள். கடும் உழைப்பினாலும், ஈடுபாட்டாலும் தமிழ்நாட்டிற்கும், தாய்நாட்டிற்கும் உலக அரங்கில் பெருமை சேர்க்கவுள்ள உங்களின் சாதனை பயணம் தொடர என் மனமார்ந்த வாழ்த்துக்களை தெரிவித்துக் கொள்கிறேன்.

இவ்வாறு கழக இணை ஒருங்கிணைப்பாளரும், முன்னாள் முதலமைச்சரும், தமிழ்நாடு சட்டமன்ற எதிர்க்கட்சி தலைவருமான எடப்பாடி கே.பழனிசாமி தனது டுவிட்டர் பக்கத்தில் பதிவிட்டுள்ளார்.