தற்போதைய செய்திகள்

நீடாமங்கலத்தில் சிறப்பு கால்நடை மருத்துவ முகாம் – அமைச்சர் ஆர்.காமராஜ் தொடங்கி வைத்தார்

திருவாரூர்

திருவாரூர் மாவட்டம், நீடாமங்கலம் வட்டம், வடுவூர் ஊராட்சியில் நடைபெற்ற சிறப்பு கால்நடை மருத்துவ முகாமினை உணவுத்துறை அமைச்சர் ஆர்.காமராஜ் தொடங்கி வைத்து பார்வையிட்டார். இந்நிகழ்ச்சிக்கு மாவட்ட ஆட்சித்தலைவர் த.ஆனந்த் தலைமை வகித்தார்.

நீடாமங்கலம் வட்டம், வடுவூர் ஊராட்சியில் சிறப்பு கால்நடை மருத்துவ முகாம் நடைபெற்றது. இம்முகாமில் நோயுற்ற கால்நடைகளுக்கு சிறப்பு சிகிச்சையாக தொண்டை அடைப்பான், கோமாரி நோய் தடுப்பூசி, குடற்புழு நீக்க மருந்து, செயற்கைமுறை கருவூட்டல் ஊசி மற்றும் தடுப்பூசி போடப்பட்டது. இம்முகாமில் கலந்துகொண்ட கால்நடை விவசாயிகளுக்கு இலவச தீவனப்புல் குருணையும், தாது உப்புகளையும் உணவுத்துறை அமைச்சர் ஆர்.காமராஜ் வழங்கினார். இம்முகாமில் 175 விவசாயிகள் கலந்து கொண்டனர். 800 கால்நடைகள் பயன்பெற்றன.

பின்னர் உணவுத்துறை அமைச்சர் ஆர்.காமராஜ் செய்தியாளர்களிடம் தெரிவித்ததாவது:-

முதலமைச்சர், கொரோனா தடுப்பு நடவடிக்கைகளால் மக்களுக்கு தேவையான வளர்ச்சி பணிகளும், நலத்திட்டங்களும் தடைபடாமல் மக்கள் பயன்பெறும் வகையில் அமைய வேண்டும் என உத்தரவிட்டுள்ளார். அதனடிப்படையில் இன்றைய தினம் நீடாமங்கலம் வட்டம், வடுவூர் ஊராட்சியில் சிறப்பு கால்நடை மருத்துவ முகாம் நடத்தப்படுகிறது.

விவசாயிகள் மற்றும் சாதாரண மக்களுக்கு பொருளாதாரத்தை பெருக்கி தரும் கால்நடைகளை பாதுகாக்கின்ற வகையில் சிறப்பு மருத்துவ முகாம் நடத்தப்படுகிறது. இம்முகாமில் கோமாரி நோய் தடுப்பூசி, குடற்புழு நீக்க மருந்து, செயற்கைமுறை கருவூட்டல் ஊசி போன்ற மருத்துவ சிகிச்சைகள் கால்நடைகளுக்கு வழங்கப்படுகிறது.மாவட்டத்தில் கால்நடைகள் நலம் பேணுவதற்காக நோய்கள் வராமல் தடுப்பதற்கு பல்வேறு முன்னெச்சரிக்கை நடவடிக்கைகள் பல எடுக்கப்பட்டு வருகின்றது. நோய் தாக்கும் பகுதிகள் கண்டறியப்பட்டு நோய்களுக்கு எதிரான தடுப்பூசிகள் போடப்படுகிறது.

அன்றாடம் அனைத்து கால்நடை மருந்தகங்களிலும் கால்நடைகளுக்கு சிகிச்சை மற்றும் பிறநல பணிகள் மேற் கொள்ளப்படுவது தவிர தொலை தூரத்தில் உள்ள கால்நடைகளுக்காக நலமுகாம்கள் கால்நடை பராமரிப்புத் துறையால் நடத்தப்படுகிறது.

கால்நடைகள் இருக்கும் இடங்களிலேயே அவைகளுக்கு மருத்துவ வசதி கிடைக்க வேண்டும் என்ற உன்னத நோக்கத்திற்காக அரசால் அறிமுகப்படுத்தப்பட்ட இலவச திட்டமே கால்நடை பாதுகாப்புத் திட்டம் ஆகும். இத்திட்டத்தின்கீழ் குக்கிராமங்கள் அளவில் கால்நடை நல முகாம்கள் நடத்தப்படுகின்றன. முகாம்கள் முறையான அறிவிப்பு மற்றும் விளம்பரங்களுடன் நடத்தப்பட்டு அதில் கால்நடை நலப்பணிக்கான செயற்கைமுறை கருவூட்டல், குடற்புழு நீக்கம் முதலிய பணிகள் மருத்துவக் குழுவினரால் மேற்கொள்ளப்படுகிறது.

முகாமில் அறுவை, ஈனியல், மலட்டுத்தன்மை முதலிய பிரிவில் தேவைப்படும் சிறப்பு சிகிச்சைக்கான கால்நடைகள் கண்டறியப்பட்டு அவை அருகிலுள்ள கால்நடை மருத்துவமனைக்கு அனுப்பப்படுகிறது. கால்நடைகளை பாதுகாக்கும் வகையில் இது போன்ற பல்வேறு பாதுகாப்பு நடவடிக்கைகள் மேற்கொள்ளப்பட்டு வருகிறது.

இவ்வாறு உணவுத்துறை அமைச்சர் ஆர்.காமராஜ் தெரிவித்தார்.

இந்நிகழ்வில் கால்நடை பராமரிப்புத்துறை இணை இயக்குனர் டாக்டர் தனபாலன், வருவாய் கோட்டாட்சியர் புண்ணியகோட்டி, உதவி இயக்குனர் டாக்டர்.ராமலிங்கம், முன்னாள் ஊராட்சி மன்றத்தலைவர் அரிகிருஷ்ணன், முன்னாள் ஒன்றியக்குழு தலைவர் ராஜேந்திரன், மாவட்ட அறங்காவலர் நியமனக் குழு தலைவர் செந்தில் ராஜ் மற்றும் அரசு அலுவலர்கள், உள்ளாட்சி அமைப்பின் பிரதிநிதிகள் கலந்து கொண்டனர்.