தற்போதைய செய்திகள்

திருமங்கலம் அம்மா திருக்கோயிலில் 501 பொங்கல் வைத்து சிறப்பு வழிபாடு

பொதுமக்களுக்கு நலத்திட்ட உதவிகளை அமைச்சர் ஆர்.பி.உதயகுமார் வழங்கினார்

மதுரை

புரட்சித்தலைவி அம்மாவின் 73 வது பிறந்தநாளை முன்னிட்டு திருமங்கலம் அம்மா திருக்கோயிலில் கழக அம்மா பேரவை மற்றும் மதுரை புறநகர் மேற்கு மாவட்ட கழகம் சார்பில் 501 பொங்கல் வைத்து சிறப்பு வழிபாடு நடத்தப்பட்டது. இந்நிகழ்ச்சியில் அமைச்சர் ஆர்.பி.உதயகுமார் பொது மக்களுக்கு நலத்திட்ட உதவிகளை வழங்கினார்.

மதுரை புறநகர் மேற்கு மாவட்டம் திருமங்கலம் தொகுதி டி.குண்ணத்தூரில் உள்ள அம்மா திருகோயிலில் புரட்சித்தலைவி அம்மா அவர்களின் 73-வது பிறந்தநாளை முன்னிட்டு கழக அம்மா பேரவை மற்றும் மதுரை புறநகர் மேற்கு மாவட்ட கழகம் சார்பில் அமைச்சர் ஆர்.பி.உதயகுமார் ஏற்பாட்டில் 501 பொங்கல் வைக்கும் நிகழ்ச்சி நடைபெற்றது.

அதிகாலை 6 மணிக்கு 501 பெண்கள் புதிய பானைகளில் பொங்கல் வைத்து புரட்சித்தலைவி அம்மாவின் திருவுருவ சிலைக்கு முன் படைத்து சிறப்பு வழிபாடு நடத்தினர். இதனைத் தொடர்ந்து வேத விற்பன்னர்கள் மந்திரம் ஓத அம்மா திருவுருவ சிலைக்கு வருவாய்த் துறை அமைச்சர் ஆர்.பி.உதயகுமார் மலர் தூவி மரியாதை செலுத்தி அன்னதானம் மற்றும் நலத்திட்ட உதவிகளை வழங்கினார்

இந்நிகழச்ச்சியில் அமைச்சர் ஆர்.பி.உதயகுமார் பேசியதாவது:-

புரட்சித்தலைவி அம்மாவின் 73 வது அவதார திருநாளை முன்னிட்டு முதலமைச்சர், துணை முதலமைச்சர் ஆணைக்கிணங்க திருமங்கலம் அம்மா திருக்கோயிலில் 501 பொங்கல் வைத்து சிறப்பு வழிபாடு நடத்தப்பட்டது. இக்கோயில் தென்தமிழகத்தின் எல்லைச்சாமியாக உள்ளது. வாழ்ந்தவர் கோடி, மறைந்தவர் கோடி. ஆனால் மக்கள் மனதில் என்றைக்கும் தெய்வமாக அம்மா வாழ்ந்து வருகிறார்.

பல்வேறு துறைகளில் முதலிடத்தில் அம்மாவின் அரசு உள்ளது. தமிழக அரசு நிதி மேலாண்மையில் முதலிடத்தில் உள்ளது. கடன் சுமையும் கட்டுக்குள் உள்ளது. ஆனால் எதிர்க்கட்சிகள் வேண்டுமென்றே பொய் பிரச்சாரம் செய்கின்றனர். கடந்த 5 ஆண்டுகளில் ரூ.17,000 கோடிக்கு மேல் பயிர்க்கடன் ரத்து செய்யப்பட்டுள்ளது.

இதில் 33 லட்சத்துக்கும் மேற்பட்ட விவசாயிகள் பயன் பெற்றனர். முதலமைச்சர் காவேரி- குண்டாறு திட்டத்தை தொடங்கி வைத்து உள்ளார். இதன் மூலம் ராமநாதபுரம், விருதுநகர், மதுரை உள்ளிட்ட வறண்ட வானம் பார்த்த பூமியை இனிமேல் வளம் கொழிக்கும் மாவட்டமாக மாறும். கொரோனா காலகட்டங்களில் மொத்தம் 4,500 ரூபாய் மக்களின் வாழ்வாதாரத்துக்காக முதலமைச்சர் எடப்பாடி கே.பழனிசாமி வழங்கியுள்ளார்.

தேர்தல் வந்தவுடன் யார் வேண்டுமானாலும் முதலமைச்சர் ஆகலாம் என்று கனவு காணலாம். ஆனால் அதற்கு ஒரு தகுதி வேண்டும். 4 ஆயிரம் ஆண்டுகளுக்கு முன்பாக காண வேண்டிய வளர்ச்சிகளை 4 ஆண்டுகளில் தற்சமயம் செய்து முடித்துள்ளார் முதலமைச்சர். 110 விதியின் கீழ் அறிவிக்கப்பட்ட அறிவிப்புகளை 100 சதவீதம் நிறைவேற்றியுள்ளோம்.

தேர்தல் வாக்குறுதிகளை 100 சதவீதம் நிறைவேற்றியுள்ளோம். அமைச்சர்கள் மானிய கோரிக்கையில் அறிவித்துள்ள திட்டங்களை முதலமைச்சர் எடப்பாடி கே.பழனிசாமி நிறைவேற்றி கொடுத்துள்ளார். மக்கள் மனதில் நம்பிக்கையையும் செல்வாக்கையும் முதலமைச்சர் எடப்பாடி கே.பழனிசாமி பெற்றுள்ளார்.

ரூ.12,110 கோடி பயிர்க்கடன்களை முதலமைச்சர் எடப்பாடி கே.பழனிசாமி ரத்து செய்ததோடு அதற்கான சான்றிதழையும் விவசாயிகளுக்கு முதலமைச்சர் வழங்கியுள்ளார். ஆனால்
மனதில் ஈரம் இல்லாமல் ஸ்டாலின் பேசி வருகிறார். முதலமைச்சர் திட்டங்களுக்கு ஸ்டாலின் பாராட்டு விழா நடத்த வேண்டாம். கொச்சைப்படுத்தாமல் இருந்தால் போதும்.

ஆட்சி அதிகார பசியோடு தற்சமயம் களத்தில் நின்று கொண்டிருக்கிறார் திமுக தலைவர் ஸ்டாலின். முன்னாள் முதலமைச்சர் கருணாநிதி இருந்த பொழுது முதலமைச்சராகிவிட வேண்டும் என்று நினைத்தார்.

அதை கருணாநிதியும் விரும்பவில்லை, மக்களும் விரும்பவில்லை. 2021-ல் எப்படியாக முதலமைச்சராகி விடலாம் என்று ஸ்டாலின் நினைக்கிறார். மக்கள் விரும்பாததால் அவரால் எப்போதும் முதலமைச்சராக முடியாது. முதலமைச்சருக்கு மந்திரவாதி என்று பெயர் சூட்டியுள்ளார் ஸ்டாலின். முதலமைச்சருக்கு மந்திரமும், தந்திரமும் தெரியாது. ஆனால் மக்களின் தேவை அறிந்து உழைக்க தெரியும்.

ஒவ்வொரு பகுதியாக செல்கிறார் ஸ்டாலின். அவர் சொல்கிற இடத்தில் கட்சி உறுப்பினர்களை சந்தித்து வருகிறார். ஆனால் தமிழகத்தின் முதலமைச்சர் பொதுமக்களை சந்தித்து வருகிறார். 2021 தேர்தலுக்கு பிறகு திமுக அழிந்து விடும். இதில் எந்தவித மாற்றமும் கிடையாது.

தி.மு.க.வில் தகுதி வாய்ந்த தலைவர் இல்லை. தடுமாறும் தலைவர் தான் இருக்கிறார். ஆனால் நமக்கு உள்ள தலைவர்கள் நிரந்தரமான எளிமையான தலைவர்கள் என்பதில் மாற்றமில்லை. கொங்கு நாடு, சோழநாடு கழகத்திற்கு வெற்றிக்கொடி நாட்டி வருவதைப்போல் பாண்டிய நாடும் வெற்றிக்கொடி நாட்டி முதலிடத்தை பிடிக்கும், இது சத்தியம்.

32 ஆண்டுகளுக்கு பிறகு ஆண்ட இயக்கமே மறுபடியும் ஆண்ட வரலாற்றை புரட்சித்தலைவி அம்மா உருவாக்கினார். அதேபோல் மீண்டும் ஒரு வரலாற்றை நாம் படைக்க இருக்கிறோம். புரட்சித்தலைவர் இந்த இயக்கத்தை தொடங்கியபோது திமுக என்ற தீய சக்தியை நாட்டை விட்டு அப்புறப்படுத்த வேண்டும் என்று கூறினார். வரும் தேர்தலில் திமுகவை அப்புறப்படுத்தி புதிய வரலாறு படைப்போம்.

திமுக அழிவின் விளிம்பில் உள்ளது. எனவே வரும் தேர்தலில் குறுக்கு வழியில் வெற்றி பெற முயற்சிப்பார்கள். ஆகவே நீங்கள் அனைவரும் திமுகவினரின் சதிகளை முறியடிக்க வேண்டும். அது மட்டுமல்லாது கழக நிர்வாகிகள் ஒவ்வொருவரும் கழக அரசின் சாதனைகள் எடுத்துச் சொல்லி மதுரையில் உள்ள 10 தொகுதிகளிலும் கழத்திற்கு வெற்றியை தேடித்தர அயராது பாடுபடுவோம் என்று அம்மா கோயில் முன் அனைவரும் சூளுரை ஏற்க வேண்டும்.

இவ்வாறு அமைச்சர் ஆர்.பி.உதயகுமார் பேசினார்.