சிறப்பு செய்திகள்

அம்மா அவர்களின் 73-வது பிறந்தநாள் விழா – அம்மா திருவுருவ சிலைக்கு ஒருங்கிணைப்பாளர்கள் மாலை அணிவித்து மரியாதை

சென்னை

புரட்சித்தலைவி அம்மா அவர்களின் 73-வது பிறந்தநாள் விழா தலைமை கழகத்தில் நேற்று 73 கிலோ கேக் வெட்டி கோலாகலமாக கொண்டாடப்பட்டது.

தலைமை கழகத்தில் உள்ள புரட்சித்தலைவி அம்மாவின் திருவுருவ சிலைக்கு கழக ஒருங்கிணைப்பாளர்கள் மாலை அணிவித்து மரியாதை செலுத்தினர். மேலும் கழக கொடியேற்றி தொண்டர்களுக்கு இனிப்பு வழங்கினர்.

அம்மா பிறந்தநாளையொட்டி தமிழகம் முழுவதும் கழக உடன்பிறப்புகள் வீடுகளில் தீபம் ஏற்றி மீண்டும் அம்மா ஆட்சி அமையஉறுதிமொழி ஏற்றுக் கொண்டனர்.

இது குறித்து தலைமை கழகம் வெளியிட்டுள்ள செய்திக்குறிப்பில் கூறப்பட்டிருப்பதாவது:-

கழக நிரந்தர பொதுச் செயலாளராகவும், தமிழ்நாடு முதலமைச்சராகவும் அரும் பணியாற்றிய இதயதெய்வம் புரட்சித்தலைவி அம்மா அவர்களின் 73-வது பிறந்தநாளான நேற்று காலை 9.30 மணிக்கு சென்னை ராயப்பேட்டை அவ்வை சண்முகம் சாலையில் உள்ள தலைமை கழக வளாகத்தில் அமைந்துள்ள இதயதெய்வம் புரட்சித்தலைவி அம்மா அவர்களின் திருவுருவச் சிலைக்கு கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம்,

கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி ஆகியோர் மாலை அணிவித்து மலர் தூவி மரியாதை செலுத்தியதோடு கழக நிறுவனத் தலைவர் பொன்மனச் செம்மல் புரட்சித்தலைவர் எம்.ஜி.ஆரின் திருவுருவ சிலைக்கும் மலர் தூவி மரியாதை செலுத்தினர். இதைத்தொடர்ந்து தலைமை கழக நிர்வாகிகளும், அமைச்சர்களும் மரியாதை செலுத்தினர்.

இதனையடுத்து நமது புரட்சித்தலைவி அம்மா நாளிதழ் சார்பில் தயார் செய்யப்பட்டுள்ள புரட்சித்தலைவி அம்மா அவர்களின் 73-வது பிறந்தநாள் சிறப்பு மலரை ஒருங்கிணைப்பாளர்கள் வெளியிட முதல் பிரதியை கழக அவைத்தலைவர் இ.மதுசூதனன் பெற்றுக் கொண்டார். தொடர்ந்து அங்கே குழுமியிருந்த கழக நிர்வாகிகளுக்கும், கழக உடன்பிறப்புகளுக்கும், பத்திரிகையாளர்களுக்கும் ஒருங்கிணைப்பாளர்கள் இனிப்பு வழங்கினர்.

நிகழ்ச்சியின் முத்தாய்ப்பாக கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம், கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி ஆகியோர் தலைமை கழக கூட்ட அரங்கில் தமிழ்நாடு, புதுச்சேரி மற்றும் கேரளா மாநில சட்டமன்றப் பேரவை பொதுத்தேர்தல்கள் நடைபெற உள்ளதை முன்னிட்டு கழகத்தின் சார்பில் போட்டியிட வாய்ப்பு கோரும் கழக உடன்பிறப்புகளுக்கு விருப்ப மனு வழங்கும் நிகழ்ச்சியை தொடங்கி வைத்தனர்.

அடுத்ததாக இதயதெய்வம் புரட்சித்தலைவி அம்மா அவர்களின் வழித்தோன்றலாக திகழும் கழக ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி கே.பழனிசாமி ஆகியோர் தங்களது அன்புக் கரங்களால் பல்வேறு காரணங்களால் மரணமடைந்த 6 கழக உடற்பிறப்புகளின் குடும்பங்களுக்கு குடும்ப நல நிதியுதவியாக தலா 3 லட்சம் ரூபாய் வீதம் மொத்தம் 18 லட்சம் ரூபாய்க்கான வரைவோலைகளை வழங்கி கழக உடன்பிறப்புகளின் குடும்பங்களுக்கு ஆறுதல் கூறினர்.

நிறைவாக அனைத்துலக எம்.ஜி.ஆர். மன்ற செயலாளர் டாக்டர் அ.தமிழ்மகன் உசேன் ஏற்பாட்டின்பேரில் அனைத்துலக எம்.ஜி.ஆர். மன்றத்தின் சார்பில் அம்மா அவர்களின் பிறந்தநாளையொட்டி தயார் செய்யப்பட்டிருந்த 73 கிலோ எடை கொண்ட கேக்கினை கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம், கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி ஆகியோர் வெட்டி கழக நிர்வாகிகளுக்கும், கழக உடன்பிறப்புகளுக்கும்வ ழங்கினர். மேலும் கழகத்தின் சார்பில் போட்டயிட வாய்ப்பு கோரும் கழக உடன்பிறப்புகளுக்கு விருப்ப மனு வழங்கப்படுவதையும் பார்வையிட்டனர்.

கழக அமைப்பு செயலாளரும், புதுக்கோட்டை வடக்கு மாவட்ட கழக செயலாளரும், சுகாதாரம் மற்றும் குடும்ப நலத்துறை அமைச்சருமான டாக்டர் சி.விஜயபாஸ்கரால் ஏற்பாடு செய்யப்பட்டிருந்த மருத்துவ முகாமை ஒருங்கிணைப்பாளர்கள் தொடங்கி வைத்தனர்.

இந்த முகாமில் பொது மருத்துவம், இருதய சிறப்பு பரிசோதனை, தோல், கண் பரிசோதனை, ரத்த பரிசோதனை, மூட்டு வலி, எலும்பு முறிவு சிகிச்சை, இ.சி.ஜி., பி.பி. மற்றும் சர்க்கரையின் அளவு கண்டறிதல், சித்த மருத்துவம் உள்ளிட்ட அனைத்து வகையான பரிசோதனைகளும் செய்யப்பட்டு உரிய மாத்திரைகளும், ஆலோசனைகளும் வழங்கப்பட்டு வருகின்றன.

பொதுமக்கள் அனைவரும் பயன்பெறும் வகையில் இந்த மருத்துவ முகாம் 26.2.2021 வரை நடைபெற உள்ளது. கழக இலக்கிய அணி செயலாளரும், கழக செய்தி தொடர்பாளரும், தமிழ்நாடு பாடநூல் நிறுவன தலைவருமான பா.வளர்மதி ஏற்பாட்டின் பேரில் கழக இலக்கிய அணியின் சார்பில் எளிமை முதல்வரின் ஏற்றமிகு அரசு பாகம் -2 என்ற குறுந்தகட்டினை ஒருங்கிணைப்பாளர்கள் வெளியிட்டனர். மேலும் கழக இலக்கிய அணி சார்பில் ஏற்பாடு செய்யப்பட்டிருந்த அன்னதான நிகழ்ச்சியையும் தொடங்கி வைத்து அனைவருக்கும் அறுசுவை உணவு வழங்கினர்.

நிகழ்ச்சியில் தலைமை கழக நிர்வாகிகளும், அமைச்சர்களும், மாவட்ட கழக செயலாளர்களும், கழக நாடாளுமன்ற, சட்டமன்ற உறுப்பினர்களும், முன்னாள் அமைச்சர்களும், முன்னாள் நாடாளுமன்ற, சட்டமன்ற உறுப்பினர்களும், கழகத்தில் பல்வேறு நிலைகளில் பணியாற்றி வரும் நிர்வாகிகளும், கழக அண்ணா தொழிற்சங்கத்தை சேர்ந்த நிர்வாகிகளும், தொழிலாளர்களும், கழகத்தின் பல்வேறு நிலைகளில் பணியாற்றி வரும் நிர்வாகிகளும் பெரும் திரளாக கலந்து கொண்டனர்.

புரட்சித்தலைவி அம்மா பிறந்த நாளை முன்னிட்டு தலைமைக் கழக வளாகத்தை ஒட்டியுள்ள சாலைகளின் இருமருங்கிலும் கழக கொடித் தோரணங்கள், குருத்தோலைகள் அழகுற அமைக்கப்பட்டு விழாக்கோலம் பூண்டிருந்தது.

அதேபோல் சாலையின் இரு மருங்கிலும் கழக உடன்பிறப்புகள் கழக கொடியையும், அண்ணா தொழிற்சங்கத்தை சேர்ந்த தொழிலாளர்கள் அண்ணா தொழிற்சங்க கொடியையும் தங்கள் கைகளில் ஏந்திய வண்ணம் எழுச்சிமிகு வரவேற்பை வழங்கினர்.

இவ்வாறு தலைமை கழக செய்திக்குறிப்பில் கூறப்பட்டுள்ளது.

இதேபோல் தமிழகம் முழுவதும் கழக நிர்வாகிகளும், தொண்டர்களும் புரட்சித்தலைவி அம்மாவின் திருவுருவ சிலைக்கு மாலை அணிவித்து மரியாதை செலுத்தியதோடு ஏழை, எளிய மக்களுக்கு அன்னதானம் மற்றும் நலத்திட்ட உதவிகளை வழங்கினர்.

புரட்சித்தலைவி அம்மா பிறந்தநாளில் மாலை 6 மணிக்கு வீடுகளில் தீபம் ஏற்றி உறுதிமொழி ஏற்க வேண்டும் என்று கழக தொண்டர்களுக்கு ஒருங்கிணைப்பாளர்கள் கடிதம் எழுதியிருந்தனர்.

அதன்படி மாலை கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம் தேனி மாவட்டம் போடிநாயக்கனூரில் உள்ள தனது இல்லத்தில் தீபம் ஏற்றி உறுதிமொழி எடுத்துக் கொண்டார். இதேபோல் கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி சென்னை கிரீன்வேஸ் சாலையில் உள்ள தனது இல்லத்தில் தீபம் ஏற்றி உறுதிமொழி எடுத்துக் கொண்டார்.

உயிர் மூச்சு உள்ளவரை அம்மாவின் வழியில் மக்களையும், மக்களுக்கான இயக்கமான கழகத்தையும் காப்பேன். இது அம்மா மீது ஆணை என்று உறுதிமொழி எடுத்துக் கொண்டனர். ஒருங்கிணைப்பாளர்களை தொடர்ந்து அமைச்சர்களும் தங்களது இல்லங்களில் தீபம் ஏற்றி உறுதிமொழி எடுத்துக் கொண்டனர்.

ஒருங்கிணைப்பாளர்கள் வேண்டுகோளை ஏற்று தமிழகம் முழுவதும் நிர்வாகிகளும், தொண்டர்களும் தங்களது இல்லங்களில் நேற்று மாலை தீபம் ஏற்றி உறுதிமொழி எடுத்துக் கொண்டனர்.

என் இல்லம் அம்மாவின் இல்லம். அம்மாவின் பிள்ளைகளாகிய நாம் மக்களுக்காக என்றும் ஓடி ஓடி உழைப்போம். இன்னும் இன்னும் பல நன்மைகளை ஊருக்கெல்லாம் கொடுப்போம்.

வரும் தேர்தலிலும் ஜெயித்து எதிரிகளை வீழ்த்தி வரும் நூற்றாண்டுகளுக்கும் அன்ைப மட்டுமே வளர்த்து கோட்டையில் நம் கொடியை உயர பறக்க செய்வோம், இது உறுதி உறுதி உறுதி என்று கழக நிர்வாகிகள், தொண்டர்களுடன் இணைந்து ஒருங்கிணைப்பாளர்கள் உறுதிமொழி எடுத்துக் கொண்டனர்.