வேலூர்

கூட்டுறவு சங்கத்தில் நுழைந்து தலைவரை தாக்க முயற்சித்து தி.மு.க. செயலாளர் அடாவடி

வேலூர்
காட்பாடி அடுத்த திருவலம் தொடக்க வேளாண்மை கூட்டுறவு கடன் சங்க கூட்டத்தில், திமுகவினர் நுழைந்து தலைவர் மற்றும் நிர்வாக உறுப்பினர்களை தாக்க முயற்சித்து அராஜக செயலில் ஈடுபட்டனர். இதுதொடர்பாக கூட்டுறவு சங்கத் தலைவர் பாதுகாப்பு கோரி காவல் நிலையத்தில் புகார் அளித்துள்ளார்.

வேலூர் மாவட்டம், காட்பாடி அடுத்த திருவலம் தொடக்க வேளாண்மை கூட்டுறவு கடன் சங்கத்தில் தலைவராக கழகத்தை சேர்ந்த எஸ்.சுலோசனா உள்ளார்.

இவர் வேலூர் மாநகர் மாவட்ட மகளிரணி இணை செயலாளராகவும், தமிழ்நாடு கூட்டுறவு இணையத்தின் இயக்குனராகவும், மாவட்ட கூட்டுறவு மொத்த விற்பனை பண்டகசாலையின் இயக்குனராகவும் பொறுப்பு வகித்து வருகிறார். நஷ்டத்தில் இயங்கி வந்த கூட்டுறவு சங்கம் சுலோசனா தலைவரான பிறகு லாபத்தில் இயங்கி வருகிறது.

இந்நிலையில் சங்க வளர்ச்சியை பொறுத்துக்கொள்ள முடியாத திமுக ஒன்றிய செயலாளர் சரவணன், நடராஜன், ராஜேந்திரன் உள்பட 50க்கும் மேற்பட்ட அடியாட்களுடன் திடீரென சங்கத்தில் புகுந்துள்ளனர்.

அப்போது நடந்து கொண்டிருந்தசங்க நிர்வாகிகள் கூட்டத்தை தடுத்து நிறுத்தி, நிர்வாக அஜென்டா புத்தகங்களை பிடுங்கி,
கூட்டுறவு சங்க தலைவரை ஒரு பெண் என்று பாராமல் தகாத வார்த்தைகளால் பேசி, தாக்க முயற்ச்சித்தனர்.

மேலும் தமிழகத்தில் எங்கள் திமுக ஆட்சி தான் நடைபெற்று வருகிறது. இனிமேல் நாங்கள் வைத்தது தான் சட்டம். எங்களை கேட்காமல் நிர்வாகம் செய்யக்கூடாது. எங்களைகேட்டுத்தான் எதிலும் கையெழுத்து போட வேண்டும்.

இனிமேல் எதை செய்தாலும் எங்களை கேட்டு தான் செய்ய வேண்டும். எங்களைகேட்காமல் கூட்டம் நடத்தினால் சங்கத்தை இழுத்து மூடி விடுவோம். எங்கு வேண்டுமானாலும் புகார் செய்யுங்கள்.

எங்களுக்கு பயம் கிடையாது என்று திமுகவினர் மிரட்டி அடாவடித்தனத்தில் ஈடுபட்டனர். கூட்டுறவு நிர்வாகத்தில் தலையிட்டு நிர்வாக வளர்ச்சிக்கு குந்தகம் ஏற்படுத்தி நீதிமன்ற உத்தரவை காற்றில் பறக்க விட்டுள்ளனர் தி.மு.க.வினர். இதனால் மன உளைச்சலுக்கு ஆளான கூட்டுறவு சங்க தலைவர் சுலோசனா, துணைத்தலைவர் கோவிந்தராஜ் மற்றும் நிர்வாக உறுப்பினர்கள் திருவலம் காவல் நிலையத்தில் புகார் செய்துள்ளனர்.

அதில் அராஜக செயலில் ஈடுபட்ட திமுக ஒன்றிய செயலாளர் சரவணன், முன்னாள் தலைவர்கள் நடராஜன், ராஜேந்திரன் ஆகியோர் மீது நடவடிக்கை எடுக்குமாறு கூறி உள்ளார். திமுகவினரின் அராஜக செயலுக்கு பொதுமக்கள், சமூக ஆர்வலர்கள் கடும் கண்டனம் தெரிவித்துள்ளனர்.

இதுகுறித்து கூட்டுறவு சங்க தலைவர் சுலோசனா போலீசில் அளித்துள்ள புகாரில் தெரிவித்திருப்பதாவது:-

கடந்த 4 நாட்களாக திமுகவினர் ஒன்று சேர்ந்து கூட்டுறவு சங்கத்தின் நடவடிக்கைகளில் தலையிட்டு பிரச்சனை செய்து வருகின்றனர். இதில் திமுக இயக்குனர்கள் மூன்று நபர்களும் திமுகவினருடன் சேர்ந்து ரேஷன் கடை விற்பனையாளர்களை பணி செய்ய விடாமல் தடுத்தும் கடையை திறக்க விடாமல் தடுத்தும் அராஜக செயலில் ஈடுபடுகின்றனர்.

திமுக ஒன்றிய செயலாளர் சரவணன், நடராஜன் சதீஷ், கோபி, கணேஷ், ராஜேந்திரன் மற்றும் 50-க்கும் மேற்பட்ட திமுகவினர் கூட்டுறவு சங்க அலுவலகத்தில் நுழைந்து கூட்டம் நடப்பதை தடுத்து என்னையும் நிர்வாக உறுப்பினர்களையும் தகாத வார்த்தையில் பேசினர்.

என்னுடைய நிர்வாகம் சம்பந்தப்பட்ட மினிட் புத்தகத்தை பிடுங்கி அதிகாரிகள் வசம் ஒப்படைத்துள்ளனர். திமுகவை சேர்ந்த நடராஜன் என்னிடம் தகாத வார்த்தைகளை பேசி என்னை அடிக்க முற்பட்டார்.

திமுக.வை சேர்ந்த சதீஷ் என்னை அடையாளம் இல்லாமல் செய்து விடுவேன் என்று மேற்கண்ட குறிப்பிட்ட நபர்களுடன் சேர்ந்து என்னை மிரட்டி நிர்வாக குழு கூட்டம் நடத்த விடாமல் செய்தனர்.இதனால் நான் மிகுந்த மன உளைச்சலில் இருக்கிறேன். ஒரு பெண் என்றும் பாராமல் தகாத வார்த்தைகள் பேசி, நிர்வாகப்பணிகளை செய்ய விடாமல் தடுத்து கொலை மிரட்டல் விடுக்கின்றனர். நான் நிர்வாகத்தை திறம்பட செய்து கொண்டிருக்கிறேன். என்னை பணியை செய்யவிடாமல் மிரட்டுகின்றனர்.

எனக்கு காவல் உயரதிகாரிகள் தக்க பாதுகாப்பு தரும்படி கேட்டுக்கொள்கிறேன்.கூட்டுறவு சட்டத்தின் சட்டவிதிகளை மீறி நிர்வாகத்தில் திமுகவினர் தலையிட்டு அத்துமீறி செயல்படுகின்றனர். ஆகவே அவர்கள் மீது நடவடிக்கை எடுக்குமாறு கேட்டுக்கொள்கிறேன்.
இவ்வாறு காவல் நிலையத்தில் கூட்டுறவு சங்க தலைவர் எஸ்.சுலோசனா புகார் அளித்துள்ளார்.
இதுகுறித்து சமூக ஆர்வலர்கள் கூறியதாவது:-


தமிழகத்தில் திமுகவினரின் அராஜகம் தொடர் கதை ஆகிவிட்டது. திமுக.வினரின் செயல்பாடுகள் கூட்டுறவு சங்க சட்ட விதிகளை மீறும் செயலாகும். கூட்டுறவு சங்க நிர்வாக செயல்பாடுகளில் திமுக நிர்வாகிகளை கேட்டு தான் செயல்பட வேண்டும் என்பது ஜனநாயகத்துக்கு விரோதமானது.


திமுகவினரின் அராஜக செயல்கள், அத்துமீறல்கள், அதிகார துஷ்பிரயோகங்களை அக்கட்சியின் தலைவர், முதல்வர் ஸ்டாலின் கட்டுப்படுத்தாமல் வேடிக்கை பார்த்துக் கொண்டிருக்கிறார். கூட்டுறவு சங்க தலைவர் ஒரு பெண் என்றும் பாராமல் அவரை திமுகவினர் தாக்க முயற்சிப்பது, தகாத வார்த்தைகள் பேசுவது, கொலை மிரட்டல் விடுவது மிகவும் கண்டனத்துக்குரிய செயலாகும். ஆகவே அராஜக செயலில் ஈடுபடும் திமுகவினர் மீது காவல்துறை தக்க நடவடிக்கை எடுக்க வேண்டும்.


இவ்வாறு சமூக ஆர்வலர்கள் தெரிவித்துள்ளனர்.
நீதிமன்ற உத்தரவை காற்றில் பறக்க விட்ட திமுகவினர் மீது காவல்துறை நடவடிக்கை எடுக்குமா என்று பொதுமக்கள், மற்றும் சமூக ஆர்வலர்கள் எதிர்பார்க்கின்றனர்.