தற்போதைய செய்திகள்

தூத்துக்குடி மாவட்ட விவசாயிகளுக்கு ரூ.181 கோடி பயிர்க்கடன் தள்ளுபடி

அமைச்சர் கடம்பூர் செ.ராஜூ சான்றிதழ் வழங்கினார்

தூத்துக்குடி, பிப்.27-

தூத்துக்குடி மாவட்டத்தில் 19754 விவசாயிகளுக்கு ரூ.181 கோடி பயிர்க்கடன் தள்ளுபடி செய்ததற்கான சான்றிதழ் வழங்கும் பணியை அமைச்சர் கடம்பூர் செ.ராஜூ விவசாயிகளுக்கு வழங்கி துவங்கி வைத்தார்.

தூத்துக்குடி மாவட்டம் வில்லிசேரி தொடக்க வேளாண்மை கூட்டுறவு கடன் சங்கத்தில் பயிர் கடன் தள்ளுபடி சான்றிதழ்கள் வழங்கும் நிகழ்ச்சி மாவட்ட ஆட்சித்தலைவர் டாக்டர் கி.செந்தில்ராஜ் தலைமையில் நடைபெற்றது.

இவ்விழாவில் செய்தி மற்றும் விளம்பரத்துறை அமைச்சர் கடம்பூர் செ.ராஜூ கலந்து கொண்டு தூத்துக்குடி மாவட்டத்தில் 19754 விவசாயிகளுக்கு ரூ.181 கோடி மதிப்பில் பயிர்க்கடன் தள்ளுபடி செய்ததற்கான சான்றிதழ் வழங்கும் பணியை துவக்கி வைத்தார்.

மேலும் வில்லிசேரி தொடக்க வேளாண்மை கூட்டுறவு கடன் சங்கத்தை சேர்ந்த 196 விவசாயிகளுக்கு ரூ.1.12 கோடி மதிப்பிலான பயிர்க்கடன் தள்ளுபடி சான்றிதழ்களை வழங்கினார்.

இவ்விழாவில் அமைச்சர் கடம்பூர் செ.ராஜூ பேசியதாவது:-

முதலமைச்சர் எடப்பாடி கே.பழனிசாமி ஒரு விவசாயியாக உள்ளதால் விவசாயிகளின் சிரமங்கள் அனைத்தையும் நன்கு அறிந்தவர். பருவம் தவறிய தொடர் மழை காரணமாக ஏற்பட்ட வெள்ள பாதிப்புகளை உடனுக்குடன் கண்டறிந்து எந்த ஒரு உயிரையும் இழக்காத வகையில் மீட்பு நடவடிக்கைகளை எடுக்க வேண்டும் என உத்தரவிட்டார்.

அதனடிப்படையில் நானும், மாவட்ட ஆட்சித்தலைவர், சட்டமன்ற உறுப்பினர்கள் இணைந்து பல்வேறு நடவடிக்கை மேற்கொண்டோம், இருப்பினும் தொடர் மழை காரணமாக வெள்ளத்தாலும், பயிர் முளைத்தும் பல்வேறு சேதங்கள் விவசாயிகளுக்கு ஏற்பட்டது.

சேதங்களை மாநில அளவிலான குழுக்களும், மத்திய அளவிலான குழுக்களும் ஆய்வு செய்தது. முதலமைச்சர் எடப்பாடி கே.பழனிசாமி சேதம் அடைந்த பயிர்களுக்கு நிவாரண உதவியாகவும், இழப்பீடாகவும் ரூ.1042 கோடி ஒதுக்கீடு செய்தார்.

அதனடிப்படையில் நமது மாவட்டத்தில் உள்ள விவசாயிகளுக்கு நிவாரண உதவி, இழப்பீட்டு தொகை வங்கி கணக்கில் வரவு வைக்கப்பட்டு வருகிறது. மேலும் 17 லட்சம் விவசாயிகளின் வாழ்வாதாரத்தை கருத்தில்கொண்டு அவர்கள் கூட்டுறவு சங்கங்களில் பெற்றுள்ள ரூ.12110 கோடி பயிர் கடனை முதலமைச்சர் எடப்பாடி கே.பழனிசாமி தள்ளுபடி செய்து உத்தரவிட்டதோடு மட்டுமின்றி 4-வது நாளிலேயே அரசாணையும் வெளியிட்டார்.

சேலம் தலைவாசல் பகுதியில் நடைபெற்ற விழாவில் பயிர்க்கடன் தள்ளுபடிக்காக சான்றிதழ்களை வழங்கி தமிழகம் முழுவதும் உள்ள அனைத்து மாவட்டங்களிலும் சான்றிழ்களை விவசாயிகளுக்கு உடனடியாக வழங்க உத்தரவிட்டார்.

அதனடிப்படையில் தூத்துக்குடி மாவட்டத்தில் உள்ள 150 கூட்டுறவு சங்கங்களில் உள்ள 19754 விவசாயிகள் பெற்ற பயிர்க்கடன் ரூ.181 கோடி தள்ளுபடிக்கான சான்றிதழ்கள் வழங்கப்படுகிறது. இதில் கோவில்பட்டி சரகத்தில் மட்டும் 14350 விவசாயிகளுக்கு ரூ.96 கோடி மதிப்பில் பயிர்க்கடன் தள்ளுபடி சான்றிதழ் வழங்கப்படுகிறது.

வில்லிசேரியில் நடைபெற்ற நிகழ்ச்சியில் 196 விவசாயிகளுக்கு ரூ.1.12 கோடி கோடி மதிப்பில் பயிர்க்கடன் தள்ளுபடி செய்யப்பட்டதற்கான சான்றிதழ் வழங்கப்பட்டுள்ளது.

இவ்வாறு அமைச்சர் கடம்பூர் செ.ராஜூ பேசினார்.