தற்போதைய செய்திகள்

எடப்பாடியார் தலைமையில் நல்லாட்சி தொடர இரட்டை இலை சின்னத்திற்கு வாக்களிப்பீர் – அமைச்சர் பி.தங்கமணி வேண்டுகோள்

நாமக்கல்,

எடப்பாடியார் தலைமையில் நல்லாட்சி தொடர இரட்டை இலை சின்னத்திற்கு வாக்களிப்பீர் என்று அமைச்சர் பி.தங்கமணி வேண்டுகோள் விடுத்துள்ளார்.

நாமக்கல் மாவட்டம் குமாரபாளையம் சட்டமன்ற தொகுதி கழக வேட்பாளரும், நாமக்கல் மாவட்ட கழக செயலாளரும், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி நேற்று தொகுதியில் பிரச்சாரம் செய்து இரட்டைஇலை சின்னத்திற்கு வாக்கு சேகரித்தார். இந்த பிரச்சாரத்தின் போது கழக நிர்வாகிகள் தொண்டர்கள் உடனிருந்தனர்.

அப்போது அவர் செய்தியாளர்களுக்கு அளித்த பேட்டியின் போது கூறியதாவது:-

சாமானியரான விவசாயி, கிராமத்தில் இருந்து வந்த முதலமைச்சர் எடப்பாடி கே.பழனிசாமி தலைமையில் ஆட்சி அமைய மக்கள் வாய்ப்பளிக்க வேண்டும். 2006, 2011, 2016ம் ஆண்டு மூன்று முறை குமாரபாளையம் சட்டமன்றத் தொகுதியில் புரட்சித்தலைவி அம்மா அவர்கள் எனக்கு வாய்ப்பு கொடுத்துள்ளார். மீண்டும் கட்சி தலைமை வாய்ப்பளித்துள்ளது. திமுக தலைவர் ஸ்டாலினும், அவரது மகன் உதயநிதி ஸ்டாலினும், எடப்பாடி கே.பழனிசாமி ஆட்சி விரைவில் முடிந்துவிடும் என்று கூறி வந்த நிலையில் ஐந்து ஆண்டுகள் சிறப்பாக ஆட்சி செய்துள்ளார் முதலமைச்சர்.

குமாரபாளையம் பகுதியில் நெசவாளர் குழந்தைகள் படிப்பதற்கு அரசு கல்லூரி அமைக்கப்பட்டுள்ளது. தமிழகத்தில் குமாரபாளையம் நகராட்சியில் மட்டும் 200 கோடி ரூபாய் நிதி ஒதுக்கீடு செய்து புதைமின்வட திட்டம் கொண்டு வரப்பட்டுள்ளது. முதலமைச்சர் எடப்பாடி கே.பழனிசாமி சாதாரண தொண்டனாக இருந்து இந்த நிலைக்கு உயர்ந்துள்ளார். ஆனால் திமுகவை பொறுத்தவரை கழகத்தில் இருந்து அங்கு சென்ற வசதி உள்ளவர்களுக்கு சீட் வழங்கப்பட்டுள்ளது. முதலமைச்சர் எடப்பாடி கே.பழனிசாமி தலைமையிலான நல்லாட்சி மீண்டும் தொடர வரும் சட்டமன்றத் தேர்தலிலும் மக்கள் வாய்ப்பளிக்க வேண்டும். தாய்மார்களின் கஷ்டத்தை உணர்ந்து வருடத்திற்கு 6 கேஸ் சிலிண்டர்கள் வழங்கப்படும் என்று முதலமைச்சர் எடப்பாடி கே.பழனிசாமி அறிவித்துள்ளார். கழகத்தின் தேர்தல் அறிக்கையில் பல்வேறு அறிவிப்புகள் இடம்பெற உள்ளது.

தமிழகத்தில் கழகம் தலைமையிலான நல்லாட்சி தொடர வேண்டுமென செல்லும் இடமெல்லாம் பொதுமக்கள் நல்ல வரவேற்பு அளித்து வருகின்றனர். மீண்டும் இந்த நல்லாட்சி தமிழகத்தில் அமையும். அனைத்து தொகுதிகளிலும் கழகம் மற்றும் கூட்டணிக் கட்சிகள் சார்பில் சிறப்பான முறையில் பிரச்சாரம் மேற்கொள்ளப்படும். மாவட்டத்தில் அனைத்து தொகுதிகளிலும் கழகம் வெற்றிபெறும். நாமக்கல் மாவட்டம் கழகத்தின் கோட்டை என்பதை நிரூபிப்போம். மீண்டும் கழக ஆட்சி அமைய பாடுபடுவோம்.

நான் பொறுப்பாளராக இருக்கக்கூடிய ஈரோடு, திருச்சி மாவட்டங்களிலும் தேர்தல் பிரச்சாரம் சிறப்பாக மேற்கொள்ளப்படும். மிகப்பெரிய கட்சியான கழகம் தலைமை ஒரு வேட்பாளரை அறிவிக்கும்போது சில சலசலப்புகள் வருவது சகஜம் தான். ஒரு தொகுதிக்கு நூற்றுக்கணக்கானோர் வாய்ப்பு கேட்கின்றனர். அவர்களில் ஒருவருக்குத்தான் வாய்ப்பு வழங்க முடியும். வாய்ப்பு கிடைக்காதவர்கள் தங்களுடைய ஆதங்கத்தை தெரிவித்து வருகிறார்கள். அதெல்லாம் உள்கட்சியில் நாங்கள் சரி செய்து விடுவோம்.

இவ்வாறு அமைச்சர் பி.தங்கமணி கூறினார்.