தமிழகம்

முதல்வர்- அமைச்சர்கள் உள்பட கழக வேட்பாளர்கள் மனு தாக்கல்

சேலம்

முதலமைச்சர், அமைச்சர்கள் உள்பட கழக வேட்பாளர்கள் நேற்று ஒரே நாளில் மனு தாக்கல் செய்தனர்.

தமிழக சட்டசபைக்கு ஏப்ரல் 6-ந்தேதி ஒரே கட்டமாக தேர்தல் நடத்தப்படுகிறது. இதற்கான வேட்பு மனு தாக்கல் கடந்த 12-ந்தேதி தொடங்கியது. அன்றைய தினம் கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம் போடிநாயக்கனூரில் தனது வேட்பு மனுவை தாக்கல் செய்தார். இதேபோல் அமைச்சர்கள் திண்டுக்கல் சி.சீனிவாசன், எம்.சி.சம்பத் ஆகியோரும் மனு தாக்கல் செய்திருந்தனர். இரண்டாம் நாள் கழகம் சார்பில் யாரும் மனு தாக்கல் செய்யவில்லை. சனி, ஞாயிறு ஆகிய இரண்டு நாட்கள் மனு தாக்கல் கிடையாது.

இந்நிலையில் நேற்று கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி சேலம் மாவட்டம் எடப்பாடியில் தனது வேட்பு மனுவை தாக்கல் செய்தார். சுமார் 100 மீட்டர் நடந்தே சென்று அவர் எடப்பாடி வட்டாட்சியர் அலுவலகத்தில் தேர்தல் அதிகாரி எஸ்.தனலிங்கத்திடம் மனு கொடுத்தார். இதன் பின்னர் பத்திரிகையாளர்களுக்கு பேட்டி கொடுத்து விட்டு அங்கிருந்து புறப்பட்டு சென்றார்.

இதனைத் தொடர்ந்து முதலமைச்சர் எடப்பாடி கே.பழனிசாமி எடப்பாடியில் கழகம் மற்றும் கூட்டணி கட்சி தேர்தல் அலுவலகத்தை திறந்து வைத்தார். பின்னர் அவர் எடப்பாடி தொகுதியில் தேர்தல் பிரச்சாரம் மேற்கொண்டு இரட்டை இலை சின்னத்திற்கு வாக்கு சேகரித்தார். மேலும் பெரியசோரகையில் பொதுமக்களிடம் சாதனை விளக்க துண்டு பிரசுரங்களை வழங்கி வாக்கு சேகரித்தார்.

இதேபோல் தமிழ்நாடு முழுவதும் அமைச்சர்கள், கழக வேட்பாளர்கள் நேற்று ஒரே நாளில் தங்களது வேட்பு மனுக்களை தாக்கல் செய்தனர். சட்டப்பேரவை தலைவர் ப.தனபால் அவினாசியிலும், கழக துணை ஒருங்கிணைப்பாளர் கே.பி.முனுசாமி சூளகிரியிலும் தங்களது வேட்பு மனுவை தாக்கல் செய்தனர். இதுதவிர அமைச்சர்கள் பி.தங்கமணி, எஸ்.பி.வேலுமணி, கே.பி.அன்பழகன், சி.வி.சண்முகம், செல்லூர் ேக.ராஜூ, ஆர்.காமராஜ், ஆர்.பி.உதயகுமார், கே.சி.வீரமணி, ஓ.எஸ்.மணியன், எம்.ஆர்.விஜயபாஸ்கர், டாக்டர் வெ.சரோஜா மற்றும் கழக வேட்பாளர்கள் தாங்கள் போட்டியிடும் தொகுதிகளில் வேட்பு மனுக்களை தாக்கல் செய்தனர்.