சிறப்பு செய்திகள்

பச்சை பொய் பேசுகிறார் ஸ்டாலின் – முதலமைச்சர் ஆவேசம்

சென்னை

எடப்பாடி தொகுதியில் எந்த பணியும் நடக்கவில்லை என்று பச்சைப் பொய் பேசுகிறார் ஸ்டாலின் என்று முதலமைச்சர் எடப்பாடி கே.பழனிசாமி கூறினார்.

முதலமைச்சரும், கழக இணை ஒருங்கிணைப்பாளருமான எடப்பாடி கே.பழனிசாமி நேற்று சேலம் மாவட்டம், எடப்பாடி சட்டமன்றத் தொகுதிக்குட்பட்ட நங்கவள்ளியில் நடைபெற்ற தேர்தல் பிரச்சாரத்தில் பேசியதாவது:-

ஸ்டாலின் கடந்த 20 நாட்களுக்கு முன்பு இந்த எடப்பாடியிலே ஒரு கூட்டத்தைப்போட்டு பேசினார். இந்த எடப்பாடி தொகுதியிலே எந்த பணியும் நடைபெறவில்லை என்றும், தமிழ்நாட்டின் முதலமைச்சராக பழனிசாமி இருக்கின்றார். ஆனால், இந்த தொகுதிக்கு எந்த நலத்திட்ட உதவியும் கிடைக்கவில்லை என்று ஒரு பச்சைப்பொய் கூறிவிட்டு சென்றுள்ளார்.

2011 மற்றும் 2016-ம் ஆண்டு இந்த தொகுதியிலே நின்று வெற்றிபெற்றேன். 2011-ம் ஆண்டுக்கு முன்பு இந்த தொகுதி எப்படி இருந்தது. தற்போது 2011 முதல் 2021 வரை எப்படி உள்ளது என்பதை மக்கள் எண்ணிப் பார்க்க வேண்டும். இந்த 10 ஆண்டு காலத்திலே நீங்கள் வைத்த கோரிக்கைகளை ஒவ்வொன்றாக நான் நிறைவேற்றியுள்ளேன்.

இந்தப்பகுதியில் ஒரு பாலிடெக்னிக் கல்லூரி வேண்டும் என்று கோரிக்கை வைத்தீர்கள். நான் பாலிடெக்னிக் கல்லூரியைக் கொண்டு வந்தேன். ரூ.52 கோடியில் பிரம்மாண்டமான பாலிடெக்னிக் கல்லூரியை தந்தது நான் என்பதை பெருமையுடன் சொல்லிக்கொள்ள கடமைப்பட்டுள்ளேன்.

நம்முடையை பகுதி வறண்ட பகுதி, இங்குள்ள ஏரிகளை நிரப்ப வேண்டும் என்று கோரிக்கை வைத்தீர்கள். நம்முடைய 50 ஆண்டுகால கனவினை நிறைவேற்றி இருக்கின்றேன். சுமார் ரூ.565 கோடியில் 100 வறண்ட ஏரிகளை நீரேற்று மூலமாக நிரப்ப நானே திட்டத்தை அறிவித்து, நானே திட்டத்திற்கு அடிக்கல் நாட்டி, நானே திட்டத்தை துவக்கி வைத்த வரலாற்றைப் படைத்துள்ளேன். இதெல்லாம் ஸ்டாலினுக்கு தெரிந்திருக்க வாய்ப்பே இல்லை. இப்படிப்பட்ட திட்டத்தை அவர்கள் செய்ததாக வரலாறு கிடையாது.

நம்முடைய பகுதி கிராமம் சூழ்ந்த பகுதி, கிராமப்புறங்களில் 41 சதவீதம் மாணவர்கள் அரசு பள்ளியில் பயில்கின்றனர். அவர்களின் மருத்துவராக வேண்டும் என்ற கனவினை நினைவாக்க, அரசு பள்ளியில் படித்த மாணவர்களுக்கு, மருத்துவ சேர்க்கையில் 7.5 சதவீதம் உள் ஒதுக்கீடு கொண்டு வந்து அவர்களது கனவினை நனவாக்கி உள்ளேன்.

அதன்மூலம் 435 பேர் மருத்துவம் படிக்கின்ற வாய்ப்பினை உருவாக்கி உள்ளோம். அதோடு 11 மருத்துவ கல்லுரியை திறக்கவுள்ளோம். இதனால் 1650 கூடுதல் இடங்கள் கிடைக்கும். அதன் மூலம் அடுத்த ஆண்டு முதல் கூடுதலாக அரசு பள்ளியில் படித்த 600 பேர் மருத்துவம் படிக்கின்ற வாய்ப்பினை உருவாக்கி உள்ளோம்.

ஏழை, எளிய மாணவர்கள் மருத்துவ படிப்பை நல்ல முறையில் படிக்க வேண்டும் என்பதற்காக அவர்களது கல்விக் கட்டணத்தை அரசே ஏற்கும் என அறிவித்து, கட்டணம் செலுத்தப்பட்டுள்ளது. அதோடு இடஒதுக்கீட்டை வழங்கியஅரசு கழக அரசு.

அதேபோல, எல்லா ஜாதியினருக்கும் மக்கள் தொகைக்கு ஏற்ப பிரதிநிதித்துவம் கிடைக்க வேண்டும் என்பதற்காக, ஆணையம் ஏற்படுத்தப்பட்டு, ஜாதி வாரி கணக்கெடுக்கப்பட்டு, அனைவரும் வேலைவய்ப்பு, கல்வியில் சம உரிமை கிடைக்கும் பணியினையும் துவக்கி வைத்துள்ளேன்.

2011-ம் ஆண்டு முன்பு இந்த எடப்பாடி சட்டமன்றத் தொகுதியில் சாலை வசதிஎப்படி இருந்தது, தற்போது எவ்வாறு சாலை வசதி உள்ளது என்பதை பொதுமக்கள் எண்ணிப்பார்க்க வேண்டும். 2011-ம் ஆண்டு வாக்கு சேகரிக்கும் போது, தாய்மார்கள் எங்களுடைய பகுதி வறண்ட பகுதியாக இருக்கின்றது.

1000 அடிக்கு கீழ் தான் தண்ணீர் கிடைக்கின்றது. அதுவும் உப்புத்தண்ணீராக இருக்கின்றது. எங்களுக்கு காவிரி ஆற்றில் இருந்து பாதுகாக்கப்பட்ட குடிநீர் வசதி செய்து தர வேண்டும் என்று கோரிக்கை வைத்தார்கள். அந்த கோரிக்கையையும் நிறைவேற்றி மேச்சேரி-நங்கவள்ளி கூட்டுக்குடிநீர் திட்டத்தை செயல்படுத்தினேன்.

நங்கவள்ளி மற்றும் வனவாசி பேரூராட்சியில் இருக்கின்ற பொதுமக்கள் அந்த கூட்டுக்குடிநீர் திட்டத்தில் இருந்து தனியாக குழாய் அமைத்து மேல்நிலை நீர்த்தேக்கத் தொட்டியின் மூலம் பாதுகாக்கப்பட்ட குடிநீர் வழங்க கோரிக்கை வைத்தார்கள். அதையும் நிறைவேற்றித் தந்துள்ளோம்.

நெசவாளர்கள் நிறைந்தபகுதி, பெங்களூருக்கு செல்ல பேருந்து வேண்டும் என்று கோரிக்கை வைத்தார்கள். அந்த கோரிக்கையினை ஏற்று சேலம், ஜலகண்டாபுரம், வனவாசி, நங்கவள்ளி வழியாக பெங்களூருக்கு பேருந்து இயக்கப்படுகிறது.

அதே போல, பல்வேறு பணிக்கு நங்கவள்ளி, ஜலகண்டாபுரம், வனவாசி பகுதியில் இருந்து கோயம்புத்தூருக்குச் செல்ல வேண்டும் என்று கோரிக்கை வைத்தீர்கள்.

நங்கவள்ளியிலிருந்து கோயம்புத்தூருக்கு பேருந்து இயக்கப்படுகிறது. ஈரோட்டுக்குச் செல்ல பேருந்து, என நீங்கள் பேருந்து வழித்தடம் வேண்டும் என்று கோரிக்கை வைத்த போதெல்லாம் பேருந்து வழித்தடம் இயக்க நடவடிக்கை எடுத்தது அம்மாவின் அரசு.

நங்கவள்ளியில் உள்ள ஆரம்ப சுதார நிலையம் 30படுக்கை வசதி கொண்ட மேம்படுத்தப்பட்ட ஆரம்ப சுகாதார நிலையமாக மாற்ற வேண்டும் என்ற பொதுமக்களின் கோரிக்கையை ஏற்று மாற்றப்பட்டுள்ளது. ஒன்றிய அலுவலகத்திற்கு புதிய கட்டடம் கட்டித் தந்துள்ளேன்.

இவ்வாறு முதலமைச்சர் எடப்பாடி கே.பழனிசாமி பேசினார்.