தமிழகம்

தனியார் பள்ளிகள் கல்வி கட்டணங்களை இணையவழி மூலம் மட்டுமே பெற வேண்டும் – பள்ளிக்கல்வித்துறை உத்தரவு

சென்னை

தனியார் பள்ளிகள் கல்வி கட்டணங்களை இணையவழி மூலம் மட்டுமே பெற வேண்டும் என, மெட்ரிக்குலேஷன் பள்ளிகள் இயக்குநர் உத்தரவு பிறப்பித்துள்ளார்.

இது குறித்து மெட்ரிக்குலேஷன் பள்ளிகள் இயக்குனர் கருப்புசாமி அனைத்து மாவட்ட முதன்மைக் கல்வி அலுவலர்களுக்கும் அனுப்பியுள்ள கடிதத்தில், கொரோனா வைரஸ் பரவல் காரணமாக தமிழ்நாட்டில் பொது முடக்கம் அமல்படுத்தப்பட்டு, பள்ளிகளை மூடுதல் உள்ளிட்ட நடவடிக்கைகள் மேற்கொள்ளப்பட்டன. அந்த நடவடிக்கைகள் தற்போது வரை நீட்டிக்கப்பட்டு வருகின்றன.

இந்தநிலையில், கடந்த 2020-21-ம் ஆண்டிற்கான கல்வி கட்டணம் வசூல் மற்றும் புதிய மாணவர் சேர்க்கை ஆகிய நடவடிக்கைகள் மேற்கொள்ளப்பட்டுவரும் நிலையில், கல்வி கட்டணங்களை இணைய வழியாக பெறுதல் பாதுகாப்பாக கருதப்படுகிறது.கட்டணம் செலுத்துதல் பொருட்டு பெற்றோர்களை பள்ளிக்கு அல்லது பள்ளி கணக்கு பராமரிக்கும் வங்கிகளுக்கு நேரில் வரவழைத்து, தனிமனித இடைவெளியை பின்பற்றுகிறது என்பதை சரிவர கண்காணிப்பது என்பது மிகவும் சிரமமாக இருக்கும்.

எனவே, தனியார் சுயநிதி பள்ளிகளில் கல்வி கட்டணங்களை இணையதளம் வழியாக பெற நடவடிக்கைகள் மேற்கொள்ள முதன்மை கல்வி அலுவலர்களுக்கு உத்தரவிடப்படுகிறது.மேலும் கட்டணம் பெற இணையவழி வசதி இதுவரை ஏற்படுத்தாத பள்ளிகள் அதனை உடனே ஏற்படுத்தி பெற்றோர்களுக்குத் தகவல் தெரிவித்து நடைமுறைப்படுத்த வேண்டும்.

இவ்வாறு அந்த கடிதத்தில் குறிப்பிட்டுள்ளார்.