தற்போதைய செய்திகள்

இலங்கை தமிழர்கள் படுகொலைக்கு தி.மு.க.- காங்கிரஸ் தான் காரணம்

அமைச்சர் கே.டி.ராஜேந்திரபாலாஜி குற்றச்சாட்டு

விருதுநகர்

இலங்கைத் தமிழர்கள் படுகொலைக்கு தி.மு.க., காங்கிரஸ் தான் காரணம் என்று அமைச்சர் கே.டி.ராஜேந்திர பாலாஜி குற்றம் சாட்டியுள்ளார்.

விருதுநகர் மாவட்டம் ராஜபாளையம் சட்ட மன்ற தொகுதியில் போட்டியிடும் கழக வேட்பாளரும், பால்வளத்துறை அமைச்சருமான கே.டி.ராஜேந்திர பாலாஜி ராஜபாளையம் நகர் மற்றும் ஒன்றிய பகுதிகளில் வீதி வீதியாக சென்று இரட்டை இலை சின்னத்திற்கு வாக்கு சேகரித்து வருகின்றார்.

பிரச்சாரத்தின்போது அமைச்சர் கே.டி.ராஜேந்திர பாலாஜி பேசியதாவது:-

நமது தொப்புள் கொடி உறவான ஈழத்தமிழர்களை கொன்று குவிக்க காரணமாக இருந்த காங்கிரஸ் கட்சியோடு திமுக கூட்டணி வைத்துள்ளது. தமிழ், தமிழ் என்று தமிழர்களை தி.மு.க. ஏமாற்றி வருகிறது. தமிழர்களுக்காக குரல் கொடுக்கும் ஒரே இயக்கம் கழகம் மட்டும்தான். மத்தியில் மோடி தலைமையிலும், தமிழகத்தில் எடப்பாடியார், ஓ.பன்னீர்செல்வம் தலைமையிலும் சிறப்பான ஆட்சி நடைபெற்று கொண்டிருக்கிறது.

ஏழைகளுக்கான ஆட்சி என்றால் அது புரட்சித் தலைவி அம்மா, எடப்பாடியார் ஆட்சிதான். 10 ஆண்டுகளாக ஆட்சியில் அண்ணா திமுக இருக்கும்போது திட்டங்களை மட்டும் திமுகவினர் எப்படி கொண்டு வரமுடியும். எங்களது அமைச்சரவை கொடுக்காமல் நிதி ஒதுக்காமல் திமுகவினர் எங்கிருந்து நிதி வாங்கி திட்டங்களை கொண்டு வந்ததாக கூறுகின்றனர்.

2011-ல் சேத்தூரில் பூமிபூஜை போட்டு நான் தொடங்கி வைத்த கூட்டுக்குடிநீர் திட்டத்தை இப்போதுள்ள திமுக எம்.எல்.ஏ. நான்தான் கொண்டு வந்தேன் என்று கூறுகிறார். சத்திரப்பட்டி ரயில்வே மேம்பாலம், பாதாள சாக்கடை திட்டம், தாமிரபரணி கூட்டு குடிநீர் திட்டம் என ராஜபாளையம் தொகுதிக்கு கடந்த 10 ஆண்டுகளில் ஆயிரம் கோடிக்கு மேல் திட்டங்களை நான்தான் கொண்டு வந்துள்ளேன்.

கழக அரசினால் தான் ராஜபாளையம் தொகுதிக்கு திட்டங்கள் கிடைத்துள்ளது. இப்போது எல்லாம் யாரையும் ஏமாற்ற முடியாது. நாட்டு மக்கள் தெளிவாக உள்ளனர். எடப்பாடியார், ஓ.பன்னீர்செல்வம் தலைமையில் நல்லாட்சி மீண்டும் தொடர வாக்காளர்கள் இரட்டை இலை சின்னத்துக்கு வாக்களிக்க வேண்டும்.

2006-ல் நாங்கள் ஆட்சிக்கு வந்தால் இரண்டு ஏக்கர் நிலம் தருவோம் என்று திமுகவினர் கூறினார்கள். அரை சென்டு இடம் கூட யாருக்கும் கொடுக்கவில்லை. ராஜபாளையம் சட்டமன்ற தொகுதியில் கே.டி.ராஜேந்திரபாலாஜி 50 ஆயிரம் வாக்குகள் வித்தியாசத்தில் வெற்றி பெற்றார் என்ற வரலாற்றை நீங்கள் உருவாக்க வேண்டும்.

இவ்வாறு அமைச்சர் கே.டி.ராஜேந்திர பாலாஜி பேசினார்.