தற்போதைய செய்திகள்

குடும்ப அட்டைதாரர்களுக்கு விலையில்லா முக கவசம் வழங்கும் பணி – அமைச்சர் வி.எம்.ராஜலெட்சுமி தொடங்கி வைத்தார்

திருநெல்வேலி

முதலமைச்சர் அறிவித்துள்ள குடும்ப அட்டைதாரர்களுக்கு விலையில்லா முககவசம் வழங்கும் திட்டத்தினை தென்காசி மாவட்டம் சங்கரன்கோவில் நகராட்சியில் ஆதி திராவிடர் மற்றும் பழங்குடியினர் நலத்துறை அமைச்சர் வி.எம்.ராஜலெட்சுமி விலையில்லா முக கவசங்களை பயனாளிகளுக்கு வழங்கி தொடங்கி வைத்தார்.

முதலமைச்சர் அறிவித்துள்ள குடும்ப அட்டைதாரர்களுக்கு விலையில்லா முககவசம் வழங்கும் திட்டத்தினை தென்காசி மாவட்டம் சங்கரன்கோவில் நகராட்சி கழுகுமலை சாலையில் அமைந்துள்ள பொதுவிநியோக கடையில்
ஆதிதிராவிடர் மற்றும் பழங்குடியினர் நலத்துறை அமைச்சர் வி.எம்.ராஜலெட்சுமி, மாவட்ட ஆட்சித்தலைவர் ஜி.கே.அருண் சுந்தர் தயாளன் முன்னிலையில் நேற்று தொடங்கி வைத்து விலையில்லா முககவசங்களை வழங்கினார்.

பின்னர் அமைச்சர் வி.எம்.ராஜலெட்சுமி தெரிவித்ததாவது:-

தென்காசி மாவட்டத்தில் மொத்தம் 665 நியாய விலைக்கடைகள் உள்ளன. இந்த நியாய விலைக்கடைகளில் 3,04,133 குடும்ப அட்டைகள் இணைக்கப்பட்டுள்ளன. இதில் முதல் கட்டமாக நகராட்சி மற்றும் பேரூராட்சி பகுதிகளில் உள்ள நியாய விலைக்கடைகளில் இணைக்கப்பட்டுள்ள 1,73,083 குடும்ப அட்டைதாரர்களுக்கு அவர்களின் குடும்ப உறுப்பினர்கள் 5,75,947 நபர்களுக்கு நபர் ஒருவருக்கு தலா இரண்டு முககவசம் வீதம் 11,51,894 முககவசங்கள் வழங்கப்பட உள்ளன. முக கவசங்கள் அனைத்தும் மாதாந்திர பொருட்களுடன் விநியோகிக்கப்படும். படிப்படியாக தென்காசி மாவட்டத்தில் அனைவருக்கும் விலையில்லா முககவசங்கள் கிடைப்பதற்கான நடவடிக்கை மேற்கொள்ளப்பட்டுள்ளது.

தென்காசி மாவட்டத்தில் உள்ள 3,04,133 குடும்ப அட்டைதாரர்களுக்கு கொரோனா நிவாரண தொகை ரூ.1000 வழங்கப்பட்டுள்ளது. மேலும், குடும்ப அட்டைதாரர்களுக்கு ஏப்ரல், மே, ஜூன் மற்றும் ஜுலை மாதங்களுக்கு நியாய விலைக்கடைகள் மூலம் சர்க்கரை, துவரம்பருப்பு, பாமாயில் போன்றவை சுமார் ரூ.120 கோடி மதிப்பீட்டில் வழங்கப்பட்டுளள்து. மேலும் பிரதமர் அறிவிப்பின்படி ஏப்ரல் மாதம் முதல் நபர் ஒருவருக்கு ஐந்து கிலோ வீதம் விலையில்லாமல் அரிசி வழங்கப்பட்டு வருகிறது.

இவ்வாறு அமைச்சர் வி.எம்.ராஜலெட்சுமி தெரிவித்தார்.

இந்நிகழ்ச்சியில் மாவட்ட வழங்கல் மற்றும் நுகர்வோர் பாதுகாப்பு அலுவலர் கோகிலா, துணை பதிவாளர் பொது விநியோகத்திட்டம் வீரபாண்டி, துணை பதிவாளர் பணியாளர் அலுவலர் குருசாமி, மாவட்ட கூட்டுறவு அச்சக சங்க தலைவர் கண்ணன் என்ற ராஜு, மாவட்ட நெசவாளர் கூட்டுறவு சங்கத் தலைவர் ஆறுமுகம், முன்னாள் சட்ட மன்ற உறுப்பினர் சுப்பையா பாண்டியன், முன்னாள் ஆவின் சேர்மன் ரமேஷ், முக்கிய பிரமுகர்கள் வேல்முருகன், வாசுதேவன், சங்கர், ராமநாதன் மற்றும் கூட்டுறவு சார் பதிவாளர்கள் மோகன், சுரேஷ், செல்வ கணேஷ் உட்பட அரசு அலுவலர்கள் கூட்டுறவு சங்க நிர்வாகிகள் பொதுமக்கள் கலந்து கொண்டனர்.