திண்டுக்கல்

பாதிக்கப்பட்ட மக்களுக்கு மறுக்கப்படாமல் நிவாரணம் – வி.பி.பி.பரமசிவம் வலியுறுத்தல்

திண்டுக்கல்

கொரோனா மரணங்கள் மூடி மறைக்கப்படுவது போல் பாதிக்கப்பட்ட மக்களுக்கு மறுக்கப்படாமல் நிவாரணம் வழங்க வேண்டும் என்று கழக இளைஞர் மற்றும் இளம்பெண்கள் பாசறை மாநில செயலாளர் டாக்டர் வி.பி.பி.பரமசிவம் வலியுறுத்தி உள்ளார்.

திண்டுக்கல் மாவட்ட ஆட்சித்தலைவர் விஜயலட்சுமியை கழக இளைஞர் மற்றும் இளம்பெண்கள் பாசறை மாநில செயலாளரும், வேடசந்தூர் தொகுதி முன்னாள் சட்டமன்ற உறுப்பினருமான டாக்டர் வி.பி.பி.பரமசிவம் சந்தித்து கோரிக்கை மனு ஒன்றை கொடுத்தார். அதில் அவர் கூறியிருப்பதாவது:-

வேடசந்தூர் தொகுதி மற்றும் திண்டுக்கல் மாவட்டத்தின் பல்வேறு பகுதிகளில் இருந்து கொரோனா நோய் அறிகுறியுடன் அரசு மருத்துவமனைகளில் அனுமதிக்கப்பட்டு ஆர்.டி.-பி.சி.ஆர். பரிசோதனையில் நெகடிவ்வாகவும், சி.டி. ஸ்கேன் பரிசோதனையில் தொற்று இருப்பது உறுதி செய்யப்பட்டும், சிகிச்சை பெற்று வந்த பலர் உயிரிழந்துள்ளனர்.

அவர்கள் sari வார்டு பகுதிகளில் சிகிச்சை பெற்று வந்துள்ளனர். அவ்வாறு இறந்தவர்களுக்கு இறப்பு சான்றிதழ் வழங்கும் போது இறப்பிற்கான காரணத்தை கொரோனா அல்லாத மரணம் (மாரடைப்பு, மூச்சு திணறல், நிமோனியா) என்று குறிப்பிட்டு வழங்குகிறார்கள்.

இதனால் தமிழக அரசு அறிவித்துள்ள பெற்றோர்களை இழந்த குழந்தைகளுக்கான நிவாரண தொகை பெறுவதில் பாதிக்கப்பட்டுள்ளவர்களுக்கு பெரும் சிரமம் ஏற்பட்டுள்ளது.

இவ்விஷயத்தில் தெளிவான மேற்கோள்களையும், வழிகாட்டுதல்களையும் ஏற்கனவே இந்திய அரசாங்கம் 22.04.2020 நாளிட்ட கடிதத்தின் மூலம் கொரோனா வைரஸ் கண்டறியப்பட்டு இறந்தவர்களுக்கு Code-U07.1 Covid 19 என்றும், வைரஸ் கண்டறியப்படாமல் சிடி ஸ்கேன் மற்றும் அறிகுறிகள் மூலம் கொரோனா தொற்று உறுதி செய்யப்பட்டு சிகிச்சை பலனளிக்காமல் இறந்தவர்களுக்கு Code-U07.2 Covid 19 ) என்றும் இறப்பு சான்றிதழில் குறிப்பிட்டு வழங்க வேண்டும் என ICD-10 Codes for COVID-19 Mortality coding-reg என்ற பொருள் தலைப்பில் அனைத்து மாநில பிறப்பு, இறப்பு தலைமை பதிவாளருக்கு வழங்கியுள்ளது.

எனவே தமிழக அரசும், மாவட்ட நிர்வாகமும் ஆர்.டி.-பி.சி.ஆர். பரிசோதனை இல்லாமல் கொரோனா தொற்று அறிகுறிகளுடன் சிகிச்சை பெற்று மரணமடைந்தவர்களின் குழந்தைகளுக்கும் அரசு அறிவித்த 5 அல்லது 3 லட்சம் நிவாரணத்தொகை கிடைக்க வழிவகை செய்யும் வகையில் தெளிவான ஒரு வழிகாட்டு நெறிமுறையை மருத்துவர்களுக்கும், சுகாதார ஆய்வாளர்களுக்கும், பிறப்பு இறப்பு பதிவாளர்களுக்கும் வழங்கிட வேண்டும்.

இச்சிரமங்களை களைய ஒவ்வொரு மாவட்டத்திலும் இணை இயக்குநர் தலைமையில் ஒரு குழு அமைத்திட வேண்டும் என்று கேட்டுக் கொள்கிறேன்.

இவ்வாறு அந்த மனுவில் கூறப்பட்டுள்ளது.

இதன் பின்னர் மாநில இளைஞர் இளம்பெண்கள் பாசறை செயலாளரும், முன்னாள் சட்டமன்ற உறுப்பினருமான டாக்டர் வி.பி.பி பரமசிவம் செய்தியாளர்களிடம் கூறியதாவது:-

தமிழகத்தில் கொரோனா மரணங்கள் மறைக்கப்படுவது போல் பாதிக்கப்பட்ட மக்களுக்கு நிவாரணங்களும் மறுக்கப்படாமல் இருக்க வேண்டும். ஆகவே, தக்க நடவடிக்கையை தமிழக அரசு எடுக்க வேண்டும். மேலும் அம்மா மினி கிளினிக்கிற்கு தேர்வு செய்யப்பட்ட 2 ஆயிரம் தற்காலிக செவிலியர்களுக்கு நிரந்தர பணி ஆணை வழங்க தமிழக அரசு நடவடிக்கை மேற்கொள்ள வேண்டும்.

இவ்வாறு அவர் கூறினார்.