தற்போதைய செய்திகள்

ஸ்டாலின் அறிக்கையை படித்து பார்த்து அதிகாரிகள் சிரிக்கிறார்கள் – அமைச்சர் க.பாண்டியராஜன் கிண்டல்

சென்னை

மூன்று லட்சம் பேர் நோய்த்தொற்றால் பாதிக்கப்பட்டிருக்கிறார்கள் என்று ஸ்டாலின் வெளியிட்ட அறிக்கையை கண்டு அதிகாரிகள் சிரிக்கிறார்கள் என்று அமைச்சர் க.பாண்டியராஜன் தெரிவித்தார்.

தமிழக முதலமைச்சரின் உத்தரவை ஏற்று ஆர்.கே.நகர் பகுதி 39-வது வார்டு பூண்டித்தங்கம்மாள் தெரு அரசு மீனவர் குடியிருப்பு பகுதியில் கொரோனா தொற்றை முற்றிலும் கட்டுப்படுத்தும் வகையில் நோய் தொற்று தடுப்பு முகாம் நடைபெற்றது இதில் அமைச்சர் க.பாண்டியராஜன், வடசென்னை வடக்கு (கிழக்கு) மாவட்ட கழக செயலாளர் ஆர்.எஸ்.ராஜேஷ், ஆகியோர் நோய் தடுப்பு பணிகளை ஆய்வு செய்து பார்வையிட்டனர்.

பின்னர் அமைச்சர் க.பாண்டியராஜன் செய்தியாளர்களிடம் கூறியதாவது:- 

கடந்த மே 22-ந்தேதி முதல் இன்று வரை தமிழ்நாட்டில் நோய்த்தொற்று அதிகமுள்ள பகுதியாக இருந்த தண்டையார்பேட்டையில் குறைந்திருக்கிறது. 50 சதவீதமாக சென்னையில் நோய்த்தொற்று இப்போது 7 சதவீதத்தில் இருந்து 6 சதவீதமாக குறைந்திருக்கிறது, கடைசி காலக்கட்டத்தில் நாம் மிகுந்த கவனத்துடன் இருக்க வேண்டும். காரணம் 6 சதவீதம் நோய்த்தொற்று இருந்த கர்நாடக மாநிலம் பெங்களுருவில் இப்போது 40 சதவீதம் அளவுக்கு அதிகரித்துள்ளது என்பதை கவனத்தில் கொள்ள வேண்டும்.

சென்னையில் நோய்த்தொற்று என்பது அதிகரித்து விட்டது என்று ஸ்டாலின் திரும்ப திரும்ப கூறி வருகிறார். 30 சதவீதம் மக்களுக்கு தெரிந்தோ தெரியாமலோ நோய்த்தொற்று வந்து சென்று விட்டது. 50 சதவீதம் பேருக்கு நோய்த்தொற்று வருவதற்கு வாய்ப்பில்லை. அவ்வாறு 50 சதவீதம் பேருக்கு நோய்த்தொற்று வந்தால் திரும்ப வருவதற்கு வாய்ப்பில்லை. ஆரம்ப நிலையிலேயே தமிழ்நாட்டில் நோய்த்தொற்று குணப்படுத்தப்பட்டுள்ளது.

இந்தியாவிலேயே நோய்த்தொற்றால் குணமடைந்தோர் எண்ணிக்கை 61 சதவீதம் தான். ஆனால் தமிழ்நாட்டில் குணமடைந்தோர் எண்ணிக்கை 79 சதவீதமாகும். அகில இந்திய அளவில் குணமடைந்தோர் விகிதத்தை விட 10 சதவீதம் அதிகமாகும். இதற்கு காரணம் தமிழ்நாட்டில் மருத்துவர்களின் சிகிச்சை முறை. முதல்வர் எடப்பாடி கே.பழனிசாமியின் நிர்வாக திறமையாகும். இந்த நிலையில் ஸ்டாலின் பீதியை ஏற்படுத்துவதற்காக இங்கு நோய்த்தொற்று அதிகரித்து விட்டதாக கூறுகிறார். இதை தெரிந்து செய்கிறாரா, தெரியாமல் செய்கிறாரா என்பது தெரியவில்லை.

மேலும் தமிழ்நாட்டில் தான் இறப்பு விகிதம் மிக குறைவாக இருக்கிறது, இந்தியாவிலேயே 100க்கு ஒன்றரை சதவீதம் தமிழ்நாட்டில் இறப்பு விகிதமாக இருக்கிறது, தமிழ்நாட்டில் 43 மருத்துவர்கள் கொரோனாவால் உயிரிழந்ததாக ஸ்டாலினின் மகன் உதயநிதி கூறுகிறார். இவர்களுக்கு ஐசிஎம்ஆருக்கும் ஐஎம்ஏவுக்கும் உள்ள வித்தியாசமே தெரியாமல் பேசுகிறார்கள். தமிழ்நாட்டில் 43 மருத்துவர்கள் கொரோனாவால் உயிரிழந்திருக்கிறார்கள் என்பது தவறான தகவல். இதை இந்திய மருத்துவர் சங்கமே மறுத்திருக்கிறது. அவர்கள் என்ன காரணத்தால் உயிரிழந்தார்கள் என்பதை பார்க்க வேண்டும்.

அது தெரியாமல் குத்துமதிப்பாக ஒரு தகவலை சொல்லி விட்டு அப்படியானால் எத்தனை பேர் இறந்தார்கள் என்று சொல்லுங்கள் என்றால் அதில் என்ன நியாயம் தவறான தகவல்களை சொல்லி விட்டு புரளியை கிளப்பிக் கொண்டிருக்கிறார்கள். இப்போது இ-பாஸை ரத்து செய்ய வேண்டும் என்று சொன்ன ஸ்டாலின் தான் முன்பு கொரோனா ஊரடங்கை முறையாக அமல்படுத்த வேண்டும் என்று கூறினார். 3 லட்சம் பேருக்கு மேல் நோய்த்தொற்றால் பாதிக்கப்பட்டுள்ளார்கள் என்று ஸ்டாலின் வெளியிடும் அறிக்கையை கண்டு அதிகாரிகள் சிரிக்கிறார்கள்.

இவ்வாறு அமைச்சர் க.பாண்டியராஜன் கூறினார்.

பின்னர் மாவட்ட செயலாளர் ஆர்.எஸ்.ராஜேஷ் கூறியதாவது:-

தமக்கும் தனது குடும்பத்தினருக்கும் நோய்த்தொற்று ஏற்பட்டு சுவை உணர்விழந்து சுவாசிப்பதில் பிரச்சனை ஏற்பட்டு மருத்துவமனையில் அனுமதிக்கப்பட்டோம்.

தற்போது சிகிச்சைக்கு பின் முதல்வர் மற்றும் துணை முதல்வரின் நல்லாசியுடன் நலமுடன் வீடு திரும்பிய பின் மீண்டும் மக்கள் பணிகளை தொடங்கியுள்ளேன். சிகிச்சையின் போது மூச்சு பயிற்சி தியான பயிற்சியுடன் மருத்துவ சிகிச்சை பெற்று கொரோனா வைரஸ் தொற்றில் இருந்து விடுபட்டு நலமுடன் உள்ளேன் எனது தாய், மற்றும் குடும்பத்தினர் சிகிச்சையில் இருந்து மீண்டு ஒரு சில தினங்களில் வீடு திரும்ப உள்ளனர்.

ஆகவே பொதுமக்கள் கொரோனாவை கண்டு பயம் கொள்ள தேவையில்லை அரசின் துரித தடுப்பு பணியால் சென்னையில் நோய்த்தொற்றில் விடுபட்டு பல ஆயிரம் பேர் குணமாகி வீடு திரும்பி விட்டனர். இதற்கான அரசின் வழிகாட்டுதலின் படி முககவசம், கைகளை சுத்தப்படுத்துதல், சமூக இடைவெளி உள்ளிட்டவைகளை கடைபிடிக்க வேண்டும்.

இவ்வாறு மாவட்ட செயலாளர் ஆர்.எஸ்.ராஜேஷ் கூறினார்.

இதில் அரசு அதிகாரிகள், மாநகராட்சி சுகாதார துறையினர், பகுதி செயலாளர் ஆர்.எஸ்.ஜெனார்தனம், ஏ.கணேசன், பி.ஜெகன், ஜெ.எம்.நரசிம்மன், குமுதா பெருமாள், கே.பி.கர்ணன், கே.பி.விஜி, தனபால் நகர் சிவகுமார், எல்.அன்பு, பத்மா, கணேசன் உள்ளிட்ட பலர் இருந்தனர்.