தற்போதைய செய்திகள்

ஆரணியில் ரூ.2.45 கோடியில் வளர்ச்சி திட்டப் பணிகள் – அமைச்சர் சேவூர் எஸ்.இராமச்சந்திரன் ஆய்வு

திருவண்ணாமலை

திருவண்ணாமலை மாவட்டம், ஆரணியில் ரூ.2.45 கோடி மதிப்பில் நடைபெறும் வளர்ச்சித் திட்டப் பணிகளை இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் ஆய்வு செய்தார்.

திருவண்ணாமலை மாவட்டம், ஆரணி அடுத்த வெட்டியாந்தொழுவம் கிராமத்தில் ஏரிக்கரையை அகலப்படுத்தியும் இருபுறமும் தடுப்பு சுவர் கட்டுதல் உள்ளிட்டபணிகள் நடைபெற்று வருகிறது. கனிமவளநிதி ரூ.1.70 கோடியிலும், நெடுஞ்சாலைத்துறை சார்பில் ரூ.45 லட்சம் மதிப்பிலும் ஊராட்சி நிதி ரூ.30 லட்சம் மதிப்பிலும் ஆக மொத்தம் ரூ.2.45 கோடி மதிப்பீட்டில் ஏரிக்கரை தற்போதுள்ள 3.5 மீட்டர் நீளத்தை அகலப்படுத்தி 7 மீட்டர் நீளத்திற்கு அகலப்படுத்தி தார்சாலையும், கரையை பலப்படுத்தும் வகையில் தடுப்பு சுவர் அமைக்கும் பணிகள் நடைபெற்று வருகிறது இப்பணிகளை இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் ஆய்வு செய்தார்.

பின்னர் அமைச்சர் சேவூர் எஸ்.இராமச்சந்திரன் கூறியதாவது:- 

மொழுகம்பூண்டி ஏரி சாலை அகலப்படுத்த ஏரிக்கரையை கடந்து செல்லும் முள்ளண்டிரம், பூசிமலைக்குப்பம், 12 புத்தூர், உள்ளிட்ட 10க்கும் மேற்பட்ட கிராமமக்களின் கடந்த 25 ஆண்டுகளுக்கு மேலான கோரிக்கையாகும், பலமுறை கேட்டும் கோரிக்கைகள் நிறைவேறாமல் இருந்து வந்தது. இதனால் இப்பகுதி விவசாயிகள் லாரியில் நெல், கரும்பு உள்ளிட்ட விளை பொருட்களை ஏற்றிவர பெரிதும் சிரமப்பட்டு வந்தனர். தற்போது மக்களின் கோரிக்கையை நிறைவேற்றும் வகையில் பல்வேறு நிதியின் கீழ் ரூ.2.45 கோடி மதிப்பீட்டில் 1 கிலோ மீட்டர் தூரத்திற்கு சாலை அகலப்படுத்தியும், கரைதடுப்பும் அமைக்கும் பணி நடைபெற்று வருகிறது.

இவ்வாறு அமைச்சர் சேவூர் எஸ்.இராமச்சந்திரன் கூறினார்.

இந்த ஆய்வின் போது நெடுஞ்சாலைத்துறை கோட்டப்பொறியாளர் முரளி, ஒன்றிய செயலாளர் பிஆர்ஜி.சேகர், முன்னாள் மாவட்ட கவுன்சிலர் ஜெ.சம்பத், மாணவரணி குமரன், தகவல் தொழில் நுட்ப அணி சரவணன், வட்டார வளர்ச்சி அலுவலர் மூர்த்தி, ஒன்றியக்குழு உறுப்பினர் சிவப்பிரகாசம், முன்னாள் ஒன்றியக்குழு உறுப்பினர்கள் புங்கம்பாடி சுரேஷ், குமரன், தொழிற்சங்க நிர்வாகி உதயசங்கர் உள்ளிட்டோர் உடனிருந்தனர்.