தற்போதைய செய்திகள்

கொரோனா தடுப்பு பணியில் பாதுகாப்புடன் ஈடுபடுங்கள்-முன்களப் பணியாளர்களுக்கு முன்னாள் அமைச்சர் பி.தங்கமணி அறிவுரை

நாமக்கல்

கொரோனா தடுப்புப் பணியில் பாதுகாப்புடன் ஈடுபடுங்கள் என்று முன்களப் பணியாளர்களுக்கு முன்னாள் அமைச்சர் பி.தங்கமணி அறிவுரை வழங்கியுள்ளார்.

நாமக்கல் மாவட்டம், பள்ளிபாளையம் நகராட்சி பகுதியில் கொரோனா தடுப்பு பணியில் ஈடுபட்டு வரும் மருத்துவர்கள், செவிலியர்கள், காவல் துறையினர், சுகாதாரத்துறையினர், நகராட்சி ஊழியர்கள், அம்மா உணவகத்தில் பணிபுரியும் பெண்கள் உள்ளிட்ட முன் களப் பணியாளர்கள் 350 பேருக்கு முன்னாள் அமைச்சரும், கழக அமைப்பு செயலாளரும்,

நாமக்கல் மாவட்ட கழக செயலாளரும், குமாரபாளையம் தொகுதி சட்டமன்ற உறுப்பினருமான பி.தங்கமணி தனது சொந்த செலவில் அரிசி மற்றும் மளிகை பொருட்கள் அடங்கிய அத்தியாவசிய பொருட்களின் தொகுப்புகளை வழங்கினார். அதைத்தொடர்ந்து கொரோனா தடுப்பு பணியில் பாதுகாப்புடன் ஈடுபட வேண்டும் என்று அவர் கேட்டுக்கொண்டார்.

இந்நிகழ்ச்சியில் நகராட்சி ஆணையாளர் சரவணன், பள்ளிபாளையம் ஒன்றியக்குழு தலைவரும், ஒன்றிய கழக செயலாளருமான எஸ்.செந்தில், பள்ளிபாளையம் வடக்கு ஒன்றிய கழக செயலாளர் சந்திரசேகரன், நகர பேரவை செயலாளர் டி.கே.சுப்பிரமணி உள்பட பலர் கலந்து கொண்டனர்.