தற்போதைய செய்திகள்

கொரோனாவுக்கு பலியாவோர் உடல்களை அடக்கம் செய்யும் 2 மனிதநேயர்கள்

திருவள்ளூர்

கொரோனா தொற்றால் தாய்-மகன் அடுத்தடுத்து உயிரிழந்த நிலையில் அவர்களின் உறவுகள் முன்வராததால் இருவரின் உடல்களையும் கழக ஒன்றிய கவுன்சிலர் மற்றும் ஊராட்சி தலைவர் ஆகியோர் இணைந்து அடக்கம் செய்தனர். இவர்களின் மனிதநேயத்தை மக்கள் பாராட்டுகின்றனர்.

கொரோனாவால் நாடு முழுவதும் நாள்தோறும் ஆயிரக்கணக்கானோர் உயிரிழந்து வருவது பெரும் வேதனையையும், சோகத்தையும் ஏற்படுத்தியுள்ளது. உறவுகளை இழந்து பல குடும்பங்கள் நிர்கதியான நிலைக்கு தள்ளப்பட்டு விட்டன.

கொரோனாவால் இறந்தவர்களை நல்லடக்கம் செய்யக்கூட வசதியற்ற மக்கள் ஒருபுறம் என்றால், பணம் இருந்தும் கொரோனா தொற்றால் இறந்தவர்களை அடக்கம் செய்வதற்குக் கூட தயங்கும் உறவுகளால் அநாதை பிணங்களாக அடக்கம் செய்யப்படும் நிலை இன்னொரு பக்கம்.

கொரோனா தொற்றுக்கு ஆளானவரை அக்கம், பக்கத்தினர் தீண்டத்தகாதவரை போல பார்க்கின்றனர். இதைவிட கொடுமை சில இடங்களில் குடும்ப உறுப்பினர்களும், உறவுகளும் கூட தொற்று பாதித்தவரிடம் நடந்து கொள்ளும் விதம் நெஞ்சை பிழிவதாக உள்ளது.

அதிலும் வயதானவர்களோ, வசதியற்றவர்களோ கொரோனாவால் உயிரிழக்க நேரிட்டால் உறவுகளால் புறக்கணிக்கப்பட்டு அநாதை பிணங்களாக அடக்கம் செய்யப்படுகின்றனர்.

மனிதம் மரணித்து போய்விட்டதோ என்று எண்ணும் அளவுக்கு சில சம்பவங்கள் அரங்கேறி வருகின்றன. ஆனாலும் இப்படிப்பட்ட சூழ்நிலையில் மனிதம் இன்னும் உயிர்ப்புடன் தான் இருக்கிறது என்று சொல்லும் விதமாக பலர் தன்னார்வத்துடன் கொரோனாவால் பாதிக்கப்பட்டவர்களுக்கு உதவி செய்வதுடன், கொரோனாவால் உயிரிழந்தவர்களை நல்லடக்கம் செய்வதற்கும் உதவி வருகின்றனர்.

அந்த வகையில் பூந்தமல்லி ஒன்றியம் காட்டுப்பாக்கம் ஊராட்சியை சேர்ந்த காட்டுப்பாக்கம் ஒன்றியக் கவுன்சிலரும், பூந்தமல்லி ஒன்றிய கழக செயலாளருமான கே.ஜி.டி.கவுதமன், ஊராட்சி மன்ற தலைவர் ஷீலா சரவணன் ஆகியோர் கடந்த இரண்டு வருடமாக கொரோனாவால் இறந்தவர்களின் உடல்களை அடக்கம் செய்து வருகின்றனர்.

காட்டுப்பாக்கத்தில் உள்ள அடுக்குமாடி குடியிருப்பில் வயதான தாயுடன்,மகன் வசித்து வந்தார். மகனுக்கு கொரோனா உறுதி செய்யப்பட்டதையடுத்து அவர் சிகிச்சைக்காக மருத்துவமனையில் அனுமதிக்கப்பட்டார்.

இதையடுத்து அவரது தாய்க்கும் கொரோனா பரிசோதனை செய்யப்பட்டது. இதில் சிகிச்சை பலனின்றி அவரது மகன் இறந்த நிலையில், கொரோனா பரிசோதனை செய்யப்பட்ட அடுத்த நாளே தாயும் இறந்தார். ஆனால் தாய், மகன் இருவரின் உடல்களை அடக்கம் செய்ய உறவினர்கள் யாரும் முன் வரவில்லை.

இதையறிந்த காட்டுப்பாக்கம் ஒன்றியக் கவுன்சிலரும், பூந்தமல்லி ஒன்றிய கழக செயலாளருமான கே.ஜி.டி.கவுதமன்,
ஊராட்சி மன்ற தலைவர் ஷீலா சரவணன் ஆகியோர் இணைந்து தாய்-மகன் உடல்களை அடக்கம் செய்வதற்கான ஏற்பாடுகளை செய்தனர்.

தாய்-மகன் இருவரின் உடல்களையும் ஊராட்சி மன்றம் சார்பில் இறுதி மரியாதையுடன் அடக்கம் செய்தனர். காட்டுப்பாக்கம் ஊராட்சிக்குட்பட்ட பகுதியில் கொரோனாவுக்கு பலியாவோர்களின் உடல்களை எந்தவித அச்சமுமின்றி அடக்கம் செய்து வருகின்றனர்.

குறிப்பாக இந்த பகுதியில் மின் தகன மேடை, விறகு, பயோ கேஸ் என மூன்று விதமாக பயன்படுத்தும் உடல்களை எரிக்கும் சுடுகாடு இருப்பதால் இங்கு தினமும் 10-க்கும் மேற்பட்ட உடல்கள் எரியூட்டப்படுகிறது.

கடந்த 2015-ம் ஆண்டு ஏற்பட்ட வெள்ளத்தின் போது இறந்தவர்களின் உடல்களை அதிக அளவில் எரிக்க இந்த சுடுகாடு பயன்படுத்தப்பட்டது. அதேபோல் தற்போதும் கொரோனாவால் இறந்தவர்களின் உடல்களை எரிக்க இந்த சுடுகாடு அதிகளவில் பயன்படுத்தப்படுவது குறிப்பிடத்தக்கது.