பெரம்பலூர்

பெரம்பலூர் மாவட்ட கூட்டுக்குடிநீர் திட்ட செயல்பாடு அதிகாரிகளுடன் ஆட்சியர் ஆலோசனை

பெரம்பலூர்

தமிழ்நாடு குடிநீர் வடிகால் வாரியத்தால் விநியோகம் செய்யப்படும் கூட்டுக்குடிநீர் திட்டம் குறித்த ஆய்வுக்கூட்டம் பெரம்பலூர் மாவட்ட ஆட்சித்தலைவர் வே.சாந்தா தலைமையில் நடைபெற்றது.

பெரம்பலூர் மாவட்டத்தில் நகராட்சி, ஊராட்சி மற்றும் பேரூராட்சி பகுதிகளுக்கு தமிழ்நாடு குடிநீர் வடிகால் வாரியம், தமிழ்நாடு மின்சார வாரியம், நெடுஞ்சாலைத்துறை, நகராட்சி, பேரூராட்சி மற்றும் ஊரக வளர்ச்சி மற்றும் ஊராட்சித் துறையை சார்ந்த அலுவலர்களுடனான ஆய்வுக்கூட்டம் மாவட்ட ஆட்சித்தலைவர் அலுவலக கூட்டரங்கத்தில் மாவட்ட ஆட்சித்தலைவர் வே.சாந்தா தலைமையில் நடைபெற்றது.

இதுகுறித்து மாவட்ட ஆட்சித்தலைவர் தெரிவித்ததாவது:-

மத்திய, மாநில அரசுகளால் செயல்படுத்தப்படும் ஜல் ஜீவன் மிஷன் திட்டத்தினை அனைத்து துறை சார்ந்த அலுவலர்களும் ஒருங்கிணைந்து சிறப்பாக செயல்படுத்திடவும், பெரம்பலூர் மாவட்டத்திற்கு ஒதுக்கீடு செய்யப்பட்டுள்ள 25 கிராமங்களில் தற்போது, 9 கிராமங்களில் மட்டும் இத்திட்டம் நடைமுறைப்படுத்தப்பட்டுள்ளது. மீதமுள்ள 16 கிராமங்களில் நாளது வரை செயல்படுத்த முடியாததற்கான காரணங்களை உடன் கண்டறிந்து அதனை நிவர்த்தி செய்திட நடவடிக்கை மேற்கொள்ள வேண்டும்.

தற்சமயம் மழைக்காலம் வருவதால், அனைத்து ஊராட்சி ஒன்றியத்திற்குட்பட்ட கிராம ஊராட்சிகளிலும் தேங்கி இருக்கும் குப்பைகளை அகற்றிட வேண்டும். தினசரி பிளீச்சிங் பவுடர் தெளித்து சுற்றுப்புறத்தை தூய்மையாக வைத்துக் கொள்ள வேண்டும். மேல்நிலை நீர்த்தேக்க தொட்டிகளை சுத்தம் செய்து, சுத்தம் செய்த தேதியினை குறிப்பிட்டு, ஒவ்வொரு முறை தண்ணீர் ஏற்றும் போதும் குளோரினேசன் செய்யப்பட வேண்டும்.

அனைத்து கிராம ஊராட்சிகள், நகர்ப்புற பகுதிகளில் நிலுவையாக உள்ள குடிநீர் கட்டணம் மற்றும் மின்வாரிய கட்டணத் தொகையினை வசூலித்திட தொடர்புடைய அனைத்து அலுவலர்களும் தேவையான நடவடிக்கைகளை மேற்கொள்ள வேண்டும்.

பெரம்பலூர் மாவட்டத்தில் கூட்டுக்குடிநீர் திட்டத்தின் கீழ் குடிநீர் வழங்குவது தொடர்பான தற்போதைய நிலையினை ஒவ்வொரு கூட்டத்தின் போதும் தமிழ்நாடு குடிநீர் வடிகால் வாரியம் மற்றும் தமிழ்நாடு மின்சார வாரிய அலுவலர்கள் தெரிவித்திட வேண்டும். அனைத்து வட்டார வளர்ச்சி அலுவலர்களும் தினசரி டெங்கு, மலேரியா மற்றும் டைபாய்டு காய்ச்சலினால் பாதிக்கப்பட்ட நபர்களின் பெயர் பட்டியலை தொடர்புடைய வட்டார மருத்துவ அலுவலரை தொடர்பு கொண்டு தெரிவித்து உரிய நடவடிக்கை மேற்கொள்ள வேண்டும்.

அனைத்து பேரூராட்சி செயல் அலுவலர்கள் தவறாமல் கூட்டுக்குடிநீர் திட்ட ஒருங்கிணைப்பு குழு கூட்டத்தில் கலந்து கொள்ள வேண்டும். வேப்பந்தட்டை ஊராட்சி ஒன்றியம், பெரியம்மாபாளையம் ஊராட்சியில் ஊராட்சி மன்ற அலுவலகத்திலிருந்து குடியிருப்பு பகுதிகளுக்கு மேல் தாழ்வாக உயர் மின் அழுத்த கம்பிகள் செல்கிறது. அதனை மின்சார வாரியத்தின் மூலம் உடனடியாக சரிசெய்ய வேண்டும்.

இவ்வாறு மாவட்ட ஆட்சித்தலைவர் தெரிவித்தார்.

மேலும் பெரம்பலூர் நகராட்சிக்குட்பட்ட பகுதிகளில் கூட்டுக்குடிநீர் திட்டத்தின்கீழ் குடிநீர் விநியோகம் செய்யப்பட்ட விவரம் மற்றும் வேப்பூர் ஊராட்சி ஒன்றியம், பெருமத்தூர், ஓலைப்பாடி, அத்தியூர், அகரம்சீகூர், வயலப்பாடி மற்றும் கிழுமத்தூர் ஆகிய ஊராட்சிகளில் குடிநீர் விநியோகம் செய்யப்பட்ட விவரங்களை தமிழ்நாடு குடிநீர் வடிகால் வாரிய அலுவலர்களிடம் மாவட்ட ஆட்சித்தலைவர் வே.சாந்தா கேட்டறிந்தார்.

ஆய்வுக்கூட்டத்தில் தமிழ்நாடு குடிநீர் வடிகால் வாரிய நிர்வாக பொறியாளர் அரு. சுப்ரமணியன், உதவி இயக்குநர் (பேரூராட்சிகள்) பாரதிதாசன், தமிழ்நாடு மின்சார வாரியம், நெடுஞ்சாலைத்துறை, நகராட்சி, பேரூராட்சி மற்றும் ஊரக வளர்ச்சி மற்றும் ஊராட்சித் துறையை சார்ந்த அலுவலர்கள் உள்பட அரசு அலுவலர்கள் பலர் கலந்து கொண்டனர்.