தற்போதைய செய்திகள்

கூட்டுறவுத்துறை செயல்பாடு, திட்டங்களின் முன்னேற்றம் – அமைச்சர் செல்லூர் கே.ராஜூ ஆய்வு

சென்னை

முதலமைச்சர் ஆணைக்கிணங்க, கூட்டுறவுத்துறை அமைச்சர் செல்லூர் கே.ராஜூ நேற்று தலைமைச் செயலகத்தில், கூட்டுறவுத்துறையின் செயல்பாடுகள் மற்றும் அறிவிக்கப்பட்ட திட்டங்களின் முன்னேற்றங்கள் குறித்து, துறை உயர் அலுவலர்களுடன் ஆய்வு மேற்கொண்டார்.

இக்கூட்டத்தில் பாரத பிரதமர் அறிவித்த வேளாண்மை உட்கட்டமைப்பு திட்டத்தில், தமிழ்நாட்டிற்கு நபார்டு வங்கியால் வழங்கப்படவுள்ள ரூ.6,000 கோடியில், மாநிலத்தில் உள்ள 4,449 தொடக்க வேளாண்மைக் கூட்டுறவுக் கடன் சங்கங்களை 3 ஆண்டுகளில் புதுப்பித்தல், நவீனமயமாக்குதல், சுற்றுச்சுவர் கட்டுதல் சங்கத்திற்கான அத்தியாவசியத் தேவைகளை பூர்த்தி செய்தல் உள்ளிட்ட உட்கட்டமைப்பு வசதிகளை மேம்படுத்துதல் குறித்தும், தொடக்க வேளாண்மைக் கூட்டுறவுக் கடன் சங்கங்களுக்கு 6 சதவீத வட்டியில் கடன் வழங்குவதற்கு நடவடிக்கை எடுத்தல், ஏடிஎம் செயல்பாடுகள், மைக்ரோ ஏடிஎம் நிறுவுதல் மற்றும் கோவிட்-19 சிறப்பு கடனுதவி திட்டத்தின் கீழ் கூடுதலாக மகளிர் சுய உதவி குழுக்களுக்கு கடன் வழங்குதல் குறித்தும் ஆய்வு மேற்கொண்டார்.

இக்கூட்டத்தில், கூட்டுறவு, உணவு மற்றும் நுகர்வோர் பாதுகாப்புத்துறை கூடுதல் தலைமைச் செயலாளர் தயானந்த் கட்டாரியா, கூட்டுறவுச் சங்கங்களின் பதிவாளர் முனைவர் இல.சுப்பிரமணியன், கூடுதல் பதிவாளர் (நுகர்வோர் பணிகள்) கிரேஸ் லால்ரின்டிகி பச்சாவ், சிறப்புப் பணி அலுவலர் முனைவர் க.ராஜேந்திரன், கூடுதல் பதிவாளர்கள் ம.அந்தோணிசாமி ஜான் பீட்டர், கு.ரவிக்குமார், ஆர்.ஜி.சக்தி சரவணன், இரா.பிருந்தா, கே.ஜி.மாதவன், டாக்டர். எஸ்.செந்தமிழ்செல்வி, வெ.லட்சுமி, டாக்டர் டி.அமலதாஸ், எம்.முருகன், டாக்டர் கே.வி.எஸ்.குமார் மற்றும் கூட்டுறவுத்துறை உயர் அலுவலர்கள் கலந்து கொண்டனர்.