தற்போதைய செய்திகள்

திருவாரூர் மாவட்டத்தில் கொரோனா தொற்றால் பாதிக்கப்பட்டவர்கள் ஓரிரு நாட்களில் சிகிச்சை முடிந்து வீடு திரும்புவார்கள் – அமைச்சர் ஆர்.காமராஜ் தகவல்

திருவாரூர்

திருவாரூர் மாவட்டத்தில் கொரோனா தொற்றால் பாதிக்கப்பட்வர்கள் ஓரிரு நாட்களில் சிகிச்சை முடிந்து வீடுகளுக்கு திரும்புவார்கள் என்று அமைச்சர் ஆர்.காமராஜ் தெரிவித்துள்ளார்.

திருவாரூர் மாவட்டம், மன்னார்குடி ஒன்றியம், ஆலங்கோட்டை மற்றும் மகாதேவபட்டினம் ஊராட்சிகளில் நடைபெற்ற மருத்துவ முகாமை உணவுத்துறை அமைச்சர் ஆர்.காமராஜ் தொடங்கி வைத்து பார்வையிட்டார். இந்நிகழ்ச்சிக்கு மாவட்ட ஆட்சித்தலைவர் த.ஆனந்த் தலைமை வகித்தார்.

பின்னர் அமைச்சர் ஆர்.காமராஜ் தெரிவித்ததாவது:-

புரட்சித்தலைவி அம்மா அவர்களின் நல்ஆசியோடு தமிழக முதல்வர் கொரோனா வைரஸ் நோய் தொற்று தடுப்பு நடவடிக்கைகளில் தன்னை முழுமையாக ஈடுபடுத்தி கொண்டு கொரோனா வைரஸ் தொற்றை தமிழகத்திலிருந்து அகற்றுவதற்குரிய பல்வேறு முன்னெச்சரிக்கை நடவடிக்கைகளை தொடர்ந்து எடுத்து வருகிறார்.

மேலும் முதல்வர் வழிகாட்டுதலின்படி அனைத்து மாவட்டங்களிலும் மாவட்ட ஆட்சித்தலைவர், மக்கள் நல்வாழ்வுத்துறை, உள்ளாட்சித்துறை, வருவாய்துறை, காவல்துறை உள்ளிட்ட அனைத்துறை அலுவலர்களும், பணியாளர்களும் ஒன்றிணைந்து கொரோனா வைரஸ் தொற்று தடுப்பு பணிகளில் அர்ப்பணிப்போடு பணியாற்றி வருகின்றனர்.

அந்த வகையில், இதுபோன்ற மருத்துவ முகாம்கள், அனைத்து பகுதிகளிலும், மக்களை தேடி மக்கள் வசிக்கின்ற இடங்களில் நேரடியாக சென்று கொரோனா வைரஸ் பரிசோதனை மேற்கொள்வது, கொரோனா வைரஸ் தொற்று தொடர்பான விழிப்புணர்வு ஏற்படுத்துவது போன்ற பல்வேறு முன்னெச்சரிக்கை நடவடிக்கைகள் எடுக்கப்பட்டு வருகிறது.

திருவாரூர் மாவட்டத்தில் தொடக்கத்தில் கொரோனா வைரஸ் தொற்றானது குறைவாக இருந்த நிலையில் பின்னர், கொரோனா வைரஸ் இல்லாத மாவட்டமாக இருந்து தற்பொழுது வெளி மாவட்டங்கள், வெளிநாடுகள், வெளி மாநிலங்களிலிருந்து வந்தவர்கள் மூலம் 2431 நபர்களுக்கு கொரோனா வைரஸ் தொற்று உறுதி செய்யப்பட்டுள்ளது.

இருப்பினும் கொரோனா வைரஸ் தொற்றால் பாதிக்கப்பட்டவர்களின் எண்ணிக்கை அதிகமாக காணப்பட்டாலும், தற்பொழுது சிகிச்சையில் உள்ளவர்களின் எண்ணிக்கை 387 மட்டுமே. இவர்களுக்கும் முறையான சிகிச்சை அளிக்கப்பட்டு வருகிறது. இவர்களும் ஓரிரு நாட்களில் சிகிச்சை முடிந்து வீடுகளுக்கு திரும்ப உள்ளனர்.

திருவாரூர் மாவட்டத்தினை பொறுத்தவரையில் 83 சதவீத நபர்கள் குணமடைந்து வீடுகளுக்கு திரும்பியுள்ளனர். இறப்பு சதவீதமும் 1.06 என குறைவான விகிதத்திலேயே உள்ளது. அதேசமயம், மக்கள் இந்நோயை கண்டு அச்சப்பட வேண்டாம் முதல்வர் அறிவுரையின்படி அடிக்கடி கைகளை கழுவுதல், பொது இடங்களுக்கு செல்லும் போது சமூக இடைவெளியினை பின்பற்றுதல், கட்டாயம் முகக்கவசம் அணிவது போன்ற முன்னெச்சரிக்கை நடவடிக்கையை பின்பற்றி பாதுகாப்போடு இருக்க வேண்டும்.

இவ்வாறு அமைச்சர் ஆர்.காமராஜ் தெரிவித்தார்.

இம்முகாமில் வருவாய் கோட்டாட்சியர் புண்ணியகோட்டி, பொது சுகாதாரம் மற்றும் நோய் தடுப்பு மருந்துத்துறை துணை இயக்குநர் விஜயகுமார், மன்னார்குடி ஒன்றியக்குழு தலைவர் டி.மனோகரன், முன்னாள் நகர்மன்ற தலைவர் சிவா.ராஜமாணிக்கம், முன்னாள் ஒன்றியக்குழு துணைத்தலைவர் கா.தமிழ்ச்செல்வம், முன்னாள் மாவட்ட ஊராட்சி உறுப்பினர் பொன்.வாசுகிராமன் மற்றும் அரசு அலுவலர்கள், உள்ளாட்சி அமைப்பு பிரதிநிதிகள் கலந்து கொண்டனர்.