தமிழகம்

பல்வேறு சம்பவங்களில் உயிரிழந்த 3 பேர் குடும்பங்களுக்கு தலா ரூ.1 லட்சம் – முதலமைச்சர் உத்தரவு

சென்னை

பல்வேறு சம்பவங்களில் உயிரிழந்த 3 பேர் குடும்பங்களுக்கு தலா ரூ.1 லட்சம் வழங்க முதலமைச்சர் எடப்பாடி கே.பழனிசாமி உத்தரவிட்டுள்ளார்.

இதுகுறித்து முதலமைச்சர் எடப்பாடி கே.பழனிசாமி வெளியிட்டுள்ள அறிக்கை வருமாறு:-

திருவாரூர் மாவட்டம், குடவாசல் வட்டம், ஆலத்தூர் கிராமத்தை சேர்ந்த அனிதா என்பவரின் கணவர் சரவணக்குமார் இருசக்கர வாகனத்தில் செல்லும் போது, எதிர்பாராதவிதமாக மரம் சாய்ந்து விழுந்து உயிரிழந்தார் என்ற செய்தியையும்,
சேலம் மாவட்டம், ஓமலூர் வட்டம், தாரமங்கலம் கிராமத்தைச் சேர்ந்த காவேரி என்பவரது மகன் மாரியப்பன் என்பவர் மரத்தில் ஏறி கிளைகளை வெட்டும் போது, தவறி விழுந்து உயிரிழந்தார் என்ற செய்தியையும்,

சென்னை மாவட்டம், புரசைவாக்கம் வட்டம், வ.உ.சி கிராமத்தை சேர்ந்த ஜாகீர்உசேன் என்பவரின் மகன் ரியாஸ் தேநீர் வியாபாரத்தின் போது மாடியிலிருந்து தவறி விழுந்து உயிரிழந்தார் என்ற செய்தியையும் அறிந்து நான் மிகுந்த துயரம் அடைந்தேன்.

மேற்கண்ட சம்பவங்களில் உயிரிழந்த மூன்று நபர்களின் குடும்பத்திற்கு எனது ஆழ்ந்த இரங்கலையும் அனுதாபத்தையும் தெரிவித்துக் கொள்கிறேன். இந்த துயரச் சம்பவங்களில் உயிரிழந்தவர்களின் குடும்பத்திற்கு தலா ஒரு லட்சம் ரூபாய் முதலமைச்சரின் பொது நிவாரண நிதியிலிருந்து வழங்க நான் உத்தரவிட்டுள்ளேன்.

இவ்வாறு முதலமைச்சர் அந்த அறிக்கையில் தெரிவித்துள்ளார்.