சிறப்பு செய்திகள்

வீட்டுவசதி திட்ட பணிகளை உரிய காலக்கெடுவுக்குள் செயல்படுத்த வேண்டும் – அதிகாரிகளுக்கு, துணை முதலமைச்சர் உத்தரவு

சென்னை

வீட்டுவசதி திட்ட பணிகளை உரிய காலக்கெடுவுக்குள் விரைந்து செயல்படுத்த வேண்டும் என்று அதிகாரிகளுக்கு, துணை முதலமைச்சர் ஓ.பன்னீர்செல்வம் உத்தரவிட்டுள்ளார்.

துணை முதலமைச்சர் ஓ.பன்னீர்செல்வம் நேற்று தமிழ்நாடு குடிசைப்பகுதி மாற்று வாரிய கூட்ட அரங்கில், தமிழ்நாடு குடிசைப் பகுதி மாற்று வாரிய தலைமை அலுவலக மற்றும் மாவட்ட அதிகாரிகளுடன் ஆய்வு மேற்கொண்டார்.

இந்த ஆய்வு கூட்டத்தில் அனைவருக்கும் வீட்டு வசதி திட்டம், பயனாளிகளின் தலைமையிலான கட்டுமானம் (தனி வீடுகள்) மற்றும் அடுக்குமாடி குடியிருப்புகள் கட்டுதல், உலக வங்கி நிதி உதவியுடன் தமிழ்நாடு வீட்டு வசதி மற்றும் உறைவிட மேம்பாட்டு திட்டம், ஆசிய வளர்ச்சி வங்கியின் உதவியுடன் நகர்ப்புற ஏழை எளியவர்களுக்கான பேரிடர்களை எதிர்கொள்ளும் நிலைக்கத்தக்க வீட்டு வசதி திட்டம் ஆகிய திட்டங்களின் முன்னேற்ற நிலைகள் குறித்து துணை முதலமைச்சர் ஓ.பன்னீர்செல்வம் கேட்டறிந்து, மேற்கண்ட திட்டப்பணிகளை உரிய காலக்கெடுவிற்குள் விரைந்து செயல்படுத்த அறிவுறுத்தினார்.

இக்கூட்டத்தில், வீட்டு வசதி மற்றும் நகர்ப்புற வளர்ச்சி துறையின் அரசு முதன்மை செயலாளர் ராஜேஷ்லக்கானி, தமிழ்நாடு குடிசைப் பகுதி மாற்று வாரிய மேலாண்மை இயக்குநர் முனைவர் தா.கார்த்திகேயன், இணை மேலாண்மை இயக்குநர் ச.கோபால சுந்தர ராஜ், வாரியத் தலைமைப் பொறியாளர்கள், மேற்பார்வைப் பொறியாளர்கள், நிர்வாகப் பொறியாளர்கள் மற்றும் மாவட்ட அளவிலான அதிகாரிகள் கலந்து கொண்டனர்.