சிறப்பு செய்திகள்

மேகதாது அணை கட்டுவதை தடுக்க சட்டப்பூர்வ நடவடிக்கை-தமிழக முதலமைச்சருக்கு, ஒருங்கிணைப்பாளர் அறிவுறுத்தல்

சென்னை

மேகதாது அணை கட்டப்படும் என்று தன்னிச்சையாக அறிவித்து இருக்கும் கர்நாடக முதலமைச்சருக்கு கழகம் சார்பில் கண்டனத்தை தெரிவித்துள்ள கழக ஒருங்கிணைப்பாளர் ஓ.பன்னீர்செல்வம், மேகதாது அணை கட்டும் கர்நாடக அரசின் நடவடிக்கையை தடுக்க சட்டப்பூர்வ நடவடிக்கை எடுக்க வேண்டும் என்று தமிழக முதலமைச்சருக்கு, அறிவுறுத்தி உள்ளார்.

இதுகுறித்து கழக ஒருங்கிணைப்பாளரும், முன்னாள் முதலமைச்சரும், தமிழ்நாடு சட்டமன்ற எதிர்க்கட்சி தலைவருமான ஓ.பன்னீர்செல்வம் வெளியிட்டுள்ள அறிக்கையில் கூறியிருப்பதாவது:-

உச்சநீதிமன்றத்திற்கு இணையான காவேரி நடுவர் மன்றத்தின் இறுதி ஆணையை முற்றிலும் அவமதிக்கும் வகையிலும், இதுகுறித்த வழக்கு உச்சநீதிமன்றத்தில் நிலுவையில் உள்ள நிலையிலும், தமிழ்நாடு நீர்வளத்துறை அமைச்சர், மத்திய நீர்வளத்துறை அமைச்சரை சந்தித்தப்பிறகும் “மேகதாதுவில் அணை கட்டப்படும்” என்று கர்நாடக முதலமைச்சர் அறிவித்து இருப்பது அதிர்ச்சியை அளிக்கிறது.

மேகதாதுவில் அணைகட்ட 2014-ம் ஆண்டு கர்நாடக அரசு திட்ட அறிக்கையை தயார் செய்வதற்காக 25 கோடி ரூபாயை ஒதுக்கியபோதே அதனைத்தடுத்து நிறுத்த வேண்டுமென்றும், அணை கட்டுவதற்கான எந்த ஒரு நடவடிக்கையையும் கர்நாடகா எடுக்கக்கூடாது என கர்நாடக அரசுக்கு உரிய அறிவுரையை மத்திய அரசு வழங்க வேண்டும் என்றும், எந்த நீர் திட்டத்திற்கும் மத்திய அரசு அனுமதி வழங்கக்கூடாது என்றும் வலியுறுத்தி
இரண்டு தீர்மானங்கள் தமிழ்நாடு சட்டமன்றப் பேரவையில் அம்மா அவர்களின் ஆணைப்படி என்னால் 5-12-2014 மற்றும் 27-03-2015 ஆகிய நாட்களில் முன்மொழியப்பட்டு ஒருமனதாக நிறைவேற்றப்பட்டது என்பதையும், இந்த தீர்மானங்கள் 12-12-2014 மற்றும் 27-02-2015 ஆகிய கடிதங்கள் மூலம் மத்திய அரசிற்கு உடனடி நடவடிக்கைகாக அனுப்பப்பட்டது என்பதையும் நான் இந்த தருணத்தில் சுட்டிக்காட்டுவதோடு, இது தொடர்பாக 26-03-2015 அன்று தமிழ்நாடு அரசின் சார்பில் உச்சநீதிமன்றத்தில் கூடுதல் மனு ஒன்று தாக்கல் செய்யப்பட்டதையும் நான் இங்கே தெரிவித்துக்கொள்ள கடமைப்பட்டு இருக்கிறேன்.

குடிநீர் வழங்கல் என்ற போர்வையில், மேகதாதுவில் அணை கட்டப்படும் என்ற கர்நாடக முதலமைச்சரின் தன்னிச்சையான அறிவிப்பு தமிழக மக்களை, குறிப்பாக விவசாய பெருங்குடி மக்களை வேதனையில் ஆழ்த்தியுள்ளது. இதன் விளைவாக, பாசனத்திற்கும், குடிநீருக்கும் காவேரியிலிருந்து தமிழ்நாட்டிற்கு வரும் நீரின் அளவு வெகுவாக குறையும் என்பதோடு மட்டுமல்லாமல், தமிழ்நாடு பாலைவனமாகக்கூடிய சூழ்நிலையும் உருவாகும். இது உடனடியாக தடுத்து நிறுத்தப்பட வேண்டும் என்பதே அனைவரின் எதிர்பார்ப்பு.

“அணை கட்டுவதை யாராலும் தடுத்து நிறுத்த முடியாது” என்று கர்நாடக முதலமைச்சர் தன்னிச்சையாக அறிவித்து
இருப்பதற்கு அனைத்திந்திய அண்ணா திராவிட முன்னேற்றக் கழகத்தின் சார்பில் எனது கண்டனத்தை தெரிவித்துக் கொள்கிறேன். இதுபோன்ற ஒருதலைபட்சமான செயல் இரு மாநில உறவையும் பாதிக்கும்.

எனவே தமிழ்நாடு முதலமைச்சர் இதில் தனிக்கவனம் செலுத்தி, மேகதாது அணை கட்டுவதற்கான எந்த ஒரு
நடவடிக்கையையும் கர்நாடக அரசு எடுக்காத வகையில் சட்டப்பூர்வமான நடவடிக்கையை எடுக்க வேண்டுமென்று கேட்டுக்கொள்கிறேன்.

இவ்வாறு கழக ஒருங்கிணைப்பாளரும், முன்னாள் முதலமைச்சரும், தமிழ்நாடு சட்டமன்ற எதிர்க்கட்சி தலைவருமான ஓ.பன்னீர்செல்வம் அந்த அறிக்கையில் தெரிவித்துள்ளார்.